Ацы аз нæ республикæйы скъолаты уыд 506 рауагъдоны. Уыдон райстой ахуыры хатдзæгтæ бæлвырдгæнæн гæххæтт æмæ ныр та архайынц сæхицæн професситæ равзарыныл. «Россотрудничество»-йы архайды руаджы Уæрæсейы Федерацимæ ахуырмæ чи цæуы, уыдон фæлварæнтæ радтой цалдæр мæйы размæ. Сæ зонындзинæдтæн канд фæлварæнтæм гæсгæ нæ аргъ кодтой. Ацы хатт фылдæр фадæттæ радтой олимпиадæты уæлахиздзаутæн, стæй, ахуыры процессы ЕГЭ-йы тесттæ чи хуыздæр сæххæст кодта, уыдонæн. Раздæр-иу рауагъдонтæ «Россотрудничество»-мæ æрмæстдæр бавдыстой сæ документтæ æмæ нысæнтты табель. Фæстаг азты афтæ нал у, уымæн æмæ æрмæст нысæнттæм гæсгæ зын у ахуыргæнинаджы зонындзинæдтæ сбæлвырд кæнын. Уый тыххæй ныр та сывæллæтты зонындзинæдтæ бæлвырд цæуынц алыгъуызон тесттæй.
Ахуырад æмæ зонады министрады зонæнтæм гæсгæ фæстаг азты Уæрæсейы Федерацийы уæлдæр ахуыргæнæндæттæм чи ацæуы, уыдон вæййынц хорз цæттæ. Уымæн æвдисæн-ахуыргæнæндæттæй бузныджы фыстæджытæ.
Æрæджы Мидхъуыддæгты æмæ Хъахъхъæнынады министрады фæдыл уæлдæр ахуырмæ чи цæуы, уыдон сæ физикон цæттæдзинады нысанæн лæвæрдтой бахыгъдтæ. Раззаг къуырийы кæрон та нæ рауагъдонтæй 80 бæрц фæлварæнтæ радтой Кавказы Хæххон-металлургон университетмæ. Цæгат Ирыстонмæ ацæуын дæр сæ нæ бахъуыд, фæлварæнтæ радтой нæ горæты 3-æм скъолайы.
Хуссарирыстойнаг рауагъдонтæн ис Уæрæсейы финансон æмæ лингвистикæйы фæдыл институттæм онлайн-форматы фæлварæнтæ радтыны фадат. Уый руаджы нæ республикæйы рауагъдонтæй дзæвгар систы студенттæ.
Ацы аз лимитты нымæц фæкъаддæр, уымæн æмæ аивгъуыйгæ азты абитуриенттæй иуæй-иутæ куырдиæттæ уыцыиу рæстæг балæвæрдтой цалдæр ахуыргæнæндонмæ. Кæй зæгъын æй хъæуы, студент ахуырмæ ацæуы иуранмæ, иннæ бынат та баззайы афтидæй. Фарон цалдæр ахуыргæнинаджы сæхи хъæппæрисæй сæ портфолиотæ арвыстой Мæскуыйы паддзахадон университетмæ экономикæйы хайадмæ æмæ фæлварæнтæ æнæратгæйæ систы студенттæ. Хъыгагæн, вæййы ахæм цаутæ дæр, æмæ иуæй-иутæ ныууадзынц сæ ахуыр, кæйдæрты та æвзæр уагахасты тыххæй рацух кæнынц. Æрыздæхынц фæстæмæ Хуссар Ирыстонмæ æмæ бацæуынц нæхи университетмæ.
Уæрæсемæ ацæуыны фадат алкæмæн нæй, ахæмтæ бацæуынц нæхи уæлдæр ахуыргæнæндонмæ, кæнæ бирæпрофилон колледж æмæ медицинон ахуыргæнæндонмæ. Колледжы райсæн ис автомеханик, хуыйæг, хæринагаразæг, агроном, кафелæвæрæг æмæ æндæр дæсныйæдтæ.
Цæвиттон, бафиппайдзыстæм: ныртæккæ нæ горæты ис æрмæстдæр иу автосервис, цыран цалцæг кæнынц фæсарæйнаг машинæтæ. Шофыртæн сæ фылдæр сæ фæсарæйнаг маркæйы машинæтæ аразынмæ фæкæнынц Цæгатмæ. Хуыздæр нæу хъæугæ дæсныйад райсын?
Ныййарджыты фылдæр хатт бафæнды, цæмæй сæ сывæллон уа юрист кæнæ экономист. Афтæмæй не ‘хсæн байдзаг, ацы профессийы дипломтæ кæмæ ис, уыдонæй. Хъуагдзинад та æййафæм бирæ професситæй. Уыцы нымæцы, хъæууон хæдзарады чи хъæуы, ахæмтæй. Бирæпрофилон колледжы рауагъдон, кæнæ хими, биологи, математикæйы ахуыргæнæг тагъддæр ссардзæн куыст престижон университеты рауагъдонимæ абаргæйæ.
УАЗÆГТЫ Марфæ
