ХÆРЗАРÆЗТ ЦÆУЫ ДЗАУЫ СУАРЫ АЛФÆМБЛАЙ

Ирыстоны цы минералон дæттæ ис, æмæ сæудæджерадон æгъдауæй фыццаг кæмæй райдыдтой пайда кæнын, уый у «Дзау-суар». Йæ пайдайы миниуджытæ ахуыргæндтæ сбæрæг кодтой 1925 азы. 1929 азы та ардæм хæстæг арæзт æрцыд пансионат «Дзау», кæцыйы уыцы иурæстæджы сæ бон баулæфын уыд 250 адæймагæн. Пансионаты-иу бынат кæй нæ фæцис, уый та-иу суармæ хæстæг æххуырст фатеры æрцард. Зæххæнкъуыст æмæ уый фæстæ хæстон цаутæ раууатмæ æркодтой Дзауы суар æмæ йæ алфæмблай территори. Советон дуджы пансионаты улæфджытæ сæ рæстæг фылдæр æрвыстой йæ цуры. Суармæ къахвæндаг цыд, йæ алфæмблай кæддæриддæр уыд æфснайд. Фæстагмæ йæм йæ хъус ничиуал дардта. Цалдæр азы размæ Дзауы администрацийы цæрæнуатон-коммуналон хæдзарады кусджытæ суары алфæмблай асыгъдæг кодтой, асинтæ йæм сарæзтой, ныссагътой дзы соцъи бæлæстæ, хъавыдысты дзы фæлладуадзæн парк саразын дæр. Фæлæ та иу афон суар æнæхъусдард аззад. Ныр ацы бонты суары территори хæрзарæзт кæнынмæ ногæй бавнæлдта районы цæрæнуатон-коммуналон хæдзарад. Йæ сæргълæууæг Цхуырбаты Тамерлан куыд зæгъы, афтæмæй ам арæзт æрцæудзæнис мæнгагъуыстытæ фынгтимæ, цæмæй, раздæрау, ацы бынат суа канд дзауæгты нæ, фæлæ æппæт республикæйы цæрджыты уарзондæр бынæттæй сæ иу. Цæмæй йæм бинонтæ æд сабитæ цæуой, уый тыххæй та сабитæн сæвæрдзысты хъеллаугæнæнтæ.

Специалисттæ куыд амо-нынц, афтæмæй ацы суар ахъаз у, ахсæнæй чи хъæрзы, ахæм адæймæгтæн. Гастрит æмæ мисындзæджы низтæ кæмæн ис, уыдонæн дæр пайда у. Суары дон фидар кæны адæймаджы иммунитет, хуылфы цы токсинтæ æрæмбырд вæййы, уыдон иуварс кæнынæн дæр ахъаз-гæнæг у. Гастроэнтерологтæ куыд амонынц, афтæмæй суарæй бон нуазын хъæуы иу литры бæрц. Советон дуджы Дзауы суары дон барстой Ессентуки 4 æмæ 17-имæ. Ахуыргæндтæ минералон дæттæ дих кæнынц дыууæ къордыл: хуымæтæг сыгъдæг дон æмæ хосгæнæн дон. Минералон дон «Дзау» дык-каг къордмæ хауы. Нуазын æй хъæуы профилактикæйы тыххæй. Ахуыргæндтæ зæгъынц, зæгъгæ, йæ сконды цы минерал-тæ ис, уыдон хорз тайын кæнынц биологон элементтæ. Уый та æнæнизы хос у адæймаджы организмæн. Ацы минералон дон 2018 азæй фæстæмæ цæуын райдыдта базарадон маркæ «Санай»-ы бын. Йæ саразæг у ама-лиуæггæнæг Тедеты Дзамбулат. Паддзахадон регистраци райсы-ны фæстæ уый сæвæрдта донуадзæн хахх æмæ суар цалынмæ заводмæ бахауы, уæдмæ фильтраци æрцæуы сæрмагонд фильтрты, кæцы йæ асыгъдæг кæны бактеритæй. Фæлæ уый не ‘ндавы пайдайаг микроэлементтыл, нæ фесафы донæн йæ ад дæр. Минералон дон «Санай»-ы продукцийы гуырахст стыр нæу ифтонг дзы цæуынц Хуссар æмæ Цæгат Ирыстоны цæрджытæ. Фæлæ заводы къухдариуæгад куыд зæгъы, афтæмæй сæм ис Уæрæсейы Федерацийы æвдисæндар паддзахадон регистрацийы тыххæй дæр. Уымæ гæсгæ сæ бон у таможнæйон цæдисы цы бæстæтæ сты, уырдæм дæр ласой сæ товар. Фæлæ республикæйæн æддæмæ аласыны хæрдзтæ бирæ лæууынц заводæн æмæ ныртæккæ экспорт нæ цæуы минералон дон «Санай».

УАЗÆГТЫ Марфа