Хосгæнæн минералон дæттæ — Ирыстоны
Магазинты тæрхджытыл фенæн ис цалдæр хуызы минералон дæттæн — «Бæгъиат», «Едыс», «Аландон», «Санай». Фæлæ се ’хсæн нал зыны «Дзимыр» дон. Ацы суары дæттæй алкæмæн дæр йæхи хиæдтæ ис. Минералон дон «Дзимыр» ахъаз у диабетæй рынчынтæн. Ист цæуы Дзимыры комæй. Йæ уадзыны функцитæ йын æххæст кæны «Бæгъиат»-ы суаруадзæн завод.
«2021 азæй фæстæмæ компани „АПИУОТЕРС“ базарадон маркæ „Дзимыр“-ы бын уадзын райдыдта ацы суар. Паддзахадон регистраци райсыны фæстæ завод „Бæгъиат“-ы сæвæрдæуыд нырыккон донуадзæн хахх æмæ уæдæй нырмæ „Дзимыр“ ссис нæ адæмæй бирæтæн сæ уарзондæр суары дон», — зæгъы ацы компанийы сæргълæууæг Годжыцаты Таймураз.
«Дзимыр» магазинты тæрхджытыл цæмæннæ уал ис, уыцы фарстæн нын Годжыцаты лæппу цыбыртæй сдзуапп кодта: «„АПИУОТЕРС“-ы куыд куыста, афтæ кусы. Нæ доны маркæ аккаг бынат бацахста адæмы ’хсæн. Нæ продукци уагътам авг æмæ пластмас мигæнæнты, æрвыстам æй Уæрæсейы Федерацимæ дæр. Регистрацигонд æрцыд сæрмагонд код „Честный знак“-ы уæрæсейаг националон системæйы Ростесты. Бардæттæг гæххæтты фæрцы махæн нæ бон уыд æндæр паддзахадтимæ дæр кусын. Фæлæ сæрды мæйты Ленингоры районы цы стыр къæвдатæ уарыд, уыдон фæластой суардонмæ фæндаг. Нæ автоцистернæтæ суары цурмæ нал цæуынц æмæ уымæн къуылымпы кæнæм. Архайдтам УАЗ машинæйыл донгуырæнмæ бацæуын, фæлæ нæ машинæ дæр нæ бахызт».
Гастроэнтерологтæ куыд амонынц, афтæмæй суар иттæг ахъаз у, ахсæнæй чи хъæрзы, гастрит æмæ мисындзæджы низтæ кæмæн ис, уыдонæн. Фидар ма кæны адæймаджы иммунитет, хуылфы цы токсинтæ æрæмбырд вæййы, уыдон иуварс кæнынæн дæр у ахъазгæнæг. Заводы цы бæрзондтехнологион кондадон ифтонггæрзтæ ис, уыдон руаджы суар цалынмæ мигæнæнтæм уагъд не ’рцæуы, уæдмæ йæ фильтраци кæнынц сæрмагонд фильтрты сыгъдæг вæййы бактеритæй. «Дзимыр» не ’ндавы пайдайаг микроэлементтыл, нæ фесæфы йæ ад дæр.
Годжыцаты Таймурз ма загъта, зæгъгæ, ацы аз Мæскуыйы экономикон армукъа «Продэкспо»-йы компани «АПИУОТЕРС»-ы продукци «Дзимыр» райста сыгъзæрин майдан æмæ нымад æрцыд «Лучший продукт 2022 года»-ыл. Уый та нысан кæны, таможнæйон цæдисы цы бæстæтæ сты, уырдæм ласæн кæй ис ацы товарæн. Советон дуджы дæр Дзимыры суары дон барстой Ессентукийы суæрттимæ.
Специалисттæ куыд амонынц, афтæмæй суæрттæ дих кæнынц æртæ къордыл: 1. Хуымæтæг — уымæй нуазын хъæуы организм цас куры, уыйбæрц. 2. Хосгæнæн дон, кæцыйы цæххы концентраци хъуамæ уа 1-10 граммæ. Нуазын æй хъæуы профилактикæйы тыххæй. 3. Дæс граммæй фылдæр цæхх кæм ис æмæ микроэлементтæй хъæздыг чи у, уый та нуазынц хосæн. «Дзимыр» дон иннæ дæттæй хицæн кæны йæ минерализацийæ. Уымæ гæсгæ йæ хъæуы нуазын хосæн. Йæ мидæг цы минералтæ ис, уыдон хорз тайын кæнынц биологон элементтæ. Уый та — адæймаджы организмæн æнæниздзинад хæссæг.
Суары донмæ фæндаг кæд сырæздзæн, уый тыххæй нын Ленингоры районы сæргълæууæг Гæджиты Иларион загъта: «Тæрккъæвдатæ тынг фехæлдтой фæндаг канд Дзимыргоммæ нæ, фæлæ æгас районы дæр. Иуæй-иу хъæутæм фæндаг айгæрстам æндæр рæтты, цæмæй сын райцентрмæ æрцæуыны фадат уа. Дзимыры коммæ цы фæндаг цæуы, уый у 8 км бæрц. Уыдонæй нын саразын бантыст 4 км, фæлæ уым бульдозер ацъæл. Куыстыты гуырахст егъау у, суар йæхæдæг дæр цъыфы зæйы бын фæцис. Ныртæккæ зæхх салд кæй у, уымæ гæсгæ дзы арæзтадон куыстытæн кæнæн нæй. Уалдзæгмæ нæ техникæ дæр сцалцæг кæндзыстæм æмæ суармæ цы фæндаг цæуы, уый дæр сараздзыстæм».
Дзимыргомы Советон рæстæджы уыдис стыр колхозтæ, цалдæргай мин фосимæ. Фос сæрдыгон хызтысты кæмтты. Зымæджы та-иу фос хызтысты Хъызлары быдырты. Ам мит кæнæ бынтондæр нæ уары, куы æруары, уæддæр хурварс бынаты зæххыл не ’рхæцы. Ныртæккæ рæстæг аивта, фос Хъызлармæ скъæрæн нал ис, фæлæ Дзимыргомы фæндæгтæ арæзт куы æрцæуиккой, уæд уым гæнæн ис зымæгон фосдарæн скъæттæ саразын, Балаты хъæуæй Науисы хъæуы æхсæн фæзбынаты. Зæй рацæуынæй дзы тæссаг нæу, фæндæгтæм та, хъыгагæн, æнцон зилæн нæу. Хорз фæндæгтæ дзы арæзт куы æрцæуид, уæд уым бирæ кæрдæг зайы æмæ дзы зымæгон холлаг цæттæ кæниккой, фермæтæ. Ам хорз цæрыны уавæртæ арæзт куы æрцæуид, уæд та Дзимыргом, раздæрау, байдзаг уаид адæмæй. Дзимыргомæй рацæугæ нæлгоймаг, Хетъеты хъæуы цæрæг зæронд лæг Тогойты Ило мын радзырдта, Дзимыргомы фондз суар æмæ бынæтты тыххæй.
«Хъæздыг у Ленингор суадæттæй. Фыццаг суар ис Науисхъæуæй Лалисмæ куы бахизай, уым — хонынц æй газджын суар. Дыккаг Хъелыдоны фарсмæ Цгъойтæ æмæ Бетъреты астæу цы ком ис, уый ныхмæ. Æртыккаг Хетъеты хъæуы ныхмæ — урс-урсид дарынц дуртæ. Хæстæг бацæугæйæ уайтагъд фындзы хуынчъытæ бамбарынц сондоны тæф. Суар зын нуазæн у, фæлæ адæм куыд дзурынц, афтæмæй тынг æххуыс кæны, ахсæнæй чи хъæрзы, ахæм рынчынтæн. Комы ноджыдæр мидæмæ куы бацæуай Берцихы хохрæбынмæ, уæд та дардмæ фендзынæ сырх-сырхид дуртæ — уый та цыппæрæм суар. Хонынц æй Тогойты суар. Ацы суары ад тынг зæрдæмæдзæугæ у, стæй суармæ æнцон цæуæн дæр у. Йæ цурты цæуы Хъелыдон — рæсугъд, сыгъдæг. Сæвæрæн дзы ис халагъудтæ — улæфæн хæдзæрттæ. Сугмæ дард цæуын нæ хъæуы, къогъотæ дзы никуы вæййы. Хъæды зайы мæнæргъы, хъæлæрдзы, хъæддаг кæрдо, гæнгæлы. Суармæ автомобилон фæндаг бæргæ уыд, фæлæ ныр хуыздæрхъуаг у. Фæндзæм суар та ис Берцихы хъæуæй Баджины хъæумæ куы бахизай, уым. Раст ацы фæндзæм суар нымад цæуы Дзимыргомы хуыздæр суарыл».
Уазæгты Марфа
