Цхинвалы администраци æрвылаз дæр ауадзы горæты скъолаты ‘хсæн ерыстæ волейболæй. Ныр дæр та Республикон комплексон спортивон скъолайы æрæмбырд сты республикæйы столицæйы скъолаты командæтæ. Уыдонæй иууыл цæттæдæр разынд 2-æм астæуккаг скъолайы командæ æмæ бацахста фыццаг бынат. Дыккаг ссис гимназ «Альбион»-ы командæ æмæ æртыккаг бынатыл та ацыдысты 6-æм скъолайы ахуырдзаутæ.
«Тынг æхсызгон мын у ерыстæ афтæ стыр цымыдисдзинад кæй сывзæрын кодтой скъоладзауты ‘хсæн, уый. Трибунæты алы хъазты дæр уыд бирæ спортуарзджытæ. Ныр кæд ерыстæ ацыдысты лæппуты ‘хсæн, уæд æввахс рæстæджы та призтыл тох кæндзысты чызджытæ», — фехъусын кодта Цхинвалы администрацийы Культурæ, фæсивæд æмæ спорты управленийы сæргълæууæг Тасойты Игорь.
Ерысты уæлахиздзаутæ хорзæхджын æрцыдысты кубоктæ, майдантæ æмæ кады грамотæтæй.
СИСТЫ УÆЛАХИЗДЗАУТÆ
Армрестлингæй РЦИ-Аланийы æмбырдгонд иумæйаг командон хыгъды фыццаг бынат бацахста Уæрæсейы чемпионаты.
Ерыстæ уагъд цыдысты горæт Орелы. Фыццаг бынæттæ бацахстой Цереккаты Роман (60 кг), Кутателадзе Вячеслав (70 кг), Золойты Алан (75 кг), Дыгурты Сæрмæт (85 кг), Теблойты Данæ (90 кг) æмæ Хъайырты Мадинæ (+90 кг).
Æвзист призертæ систы Золойты Хадзымурат (85 кг), Цæрыкъаты Владислав (90 кг) æмæ Байты Миланæ (60 кг).
Æртыккаг бынæттыл та ацыдысты Хуыбиаты Ирбег (65 кг), Касаты Тамерлан (75 кг), Дыгурты Сослан (+110 кг), Хортиты Оксанæ (65 кг), Дзуццаты Елизаветæ (70 кг) æмæ Мария Матвеева (70 кг).
ХУРИТЫ Батрадз
