«Мах, ныййарджытӕ, стӕм уыйасц амондджын, цас амондджын сты нӕ хъӕбултӕ» — зӕгъы иу ӕмбисонд. Алы ныййарӕг дӕр уӕд вӕййы зӕрдӕрухс ӕмӕ сӕрбӕрзонд йӕ цотӕй, уыдон раст фӕндагыл лӕуд йын куы вӕййынц, куы сын вӕййы ӕнтыстытӕ сӕ ахуыр ӕмӕ сӕ куысты, сӕ бинонты царды. Кӕстӕр фӕлтӕр, фӕсивӕд куы басгуыхынц, уӕд ном ӕмӕ кад скӕнынц канд сӕ ныййарджытӕн нӕ, фӕлӕ сӕ райгуырӕн бӕстӕйӕн дӕр. Мах та не’ппӕт дӕр хъуамӕ архайӕм, аразӕм алыхуызон уавӕртӕ, цӕмӕй нӕ кӕстӕртӕ алы фадыджы дӕр сӕхи фӕлварой ӕмӕ размӕ цӕуой. Бакӕнӕм сын уӕрӕх фӕндӕгтӕ, цӕмӕй схизой стыр ӕнтыстыты бӕрзӕндтӕм, уымӕн ӕмӕ уыдонӕй кӕнгӕ у нӕ сомбон.
Паддзахадон телерадиокомпани «Ир» цы проект бацӕттӕ кодта «Дзырд», уый ӕнӕмӕнг ахъаз фӕуыдзӕн цы сывӕллӕттӕ дзы исынц хайад, уыдон размӕцыдӕн. Йӕ нысан у ирон ӕвзагыл фыст ӕмдзӕвгӕтӕ аив бакӕсын. Проекты хайад исынц ахуырдзаутӕ нӕ республикӕйы алы скъолатӕй. Иу турӕй иннӕмӕ хизгӕйӕ, хайадисджыты нымӕц кӕны къаддӕр, жюрийы сывӕргӕ нысӕнттӕм гӕсгӕ, чи цас баллы райсы, уый хынцгӕйӕ. Жюри у ӕртӕ адӕймаджы скондӕй, уыдон дӕр ивынц иу этапӕй иннӕмӕ, сӕ нымӕцы паддзахадон драмон театры актертӕ, ирон ӕвзаджы дӕснытӕ, афтӕ ӕхсӕнады алы фадгуыты минӕвӕрттӕ.
Ам мӕ фӕнысан фӕнды, жюрийы уӕнгтӕй сæ иу кӕй у ирон ӕвзаджы дӕсны Плиты Серго. Уый канд йӕ фиппаинӕгтӕ нӕ фӕзӕгъы, фӕлӕ ма хайадис-джытӕн лӕмбынӕг ӕрдзуры иу кӕнӕ иннӕ авторы, стӕй йӕ уацмысы фӕ-дыл. Афтӕмæй та уыдон исынц фылдӕр зонындзинӕдтӕ. Сывӕллӕттӕм байхъусгӕйӕ, жюри, фӕзӕгъы йӕ хъуыды, кӕм уайдзӕф бакӕны, кӕм та ӕппӕлгӕ, цӕмӕй цы рӕдыдтӕ ӕруадзынц, уыдон бахынцой ӕмӕ сӕ мауал сфӕлхатт кӕной. Хайадисджытӕ дих сты дыууӕ къордыл ӕмӕ сӕ бацӕттӕ кӕнынц телеуынынады журналисттӕ Мамиты Григорий ӕмӕ Джиоты Оксанӕ. Проекты хорз миниуджытӕй иу у уый, ӕмӕ ирон ӕвзагыл уагъд кӕй цӕуы.
«Дзырд»-ы хайадисджыты нымӕц у дзӕвгар, уый та ууыл дзурӕг у, сабитӕ кӕй уарзынц сӕ мадӕлон ӕвзаг ӕмӕ цӕттӕ кӕй сты ахӕм конкурсты хайад исынмӕ. Аив кӕсын ӕнцон хъуыддаг нӕу, уыцы курдиат алкӕмӕн лӕвӕрд нӕ вæййы, фӕлӕ проекты хайадисджытӕй иуӕй дӕр афтӕ зӕгъӕн нӕй. Се’ппӕт дӕр бавӕрынц сӕ уд æмдзӕвгӕты, бӕрӕг вӕййы, хорз кӕй бамбарынц тексты мидис, райхалы æмæ сын уымæн бантысы ын йӕ хъуыды уацмысы. Афтӕ зӕрдӕмӕдзæугӕ фӕкӕсынц се’мдзӕвгӕтӕ ӕмӕ бирӕхатт жюрийы уӕнгты уадултыл цӕссыгтӕ дӕр ӕруайы. Зӕгъын хъӕуы уый, ӕмӕ чызджытӕй дарддӕр ацы конкурсы активон хайад кӕй исынц лӕппутӕ дӕр. Уыдон ӕцӕг ирон лӕгтау ралӕууынц ӕмӕ ӕмдзӕвгӕты уылты радӕттынц ирон нӕлгоймаджы ӕхсар ӕмӕ хъару. Конкурсы цы ӕмдзӕвгӕтӕ кӕсынц, уыдон сты алыхуызон тематикӕйыл: райгуырӕн бӕстӕйыл, уарзондзинадыл, хӕсты темӕйыл. Сӕ фылдӕр сты райгуырӕн бӕстӕйы тыххӕй нӕ зындгонд поэтты ӕмдзӕвгӕтӕ. Ам хайадисджытӕ афтӕ тынг раргом кӕнынц сӕ уарзондзинад Фыдыбӕстӕмӕ ӕмӕ дзургӕ-дзурын сӕ цӕстытӕй цӕхӕртӕ фӕкӕлы. Уый та ууыл дзурӕг у, ӕмӕ сӕ зӕрдӕты кӕй ис стыр уарзт сӕ райгуырӕн зӕхмӕ. Хӕсты темӕ та, стыр хъыгагӕн, ирон адӕмимӕ ӕмдзу кӕны бирӕ дугты, стӕй та ныр дӕр актуалон у Украинӕйы архӕйдтытæм гæсгæ.
«Дзырд»-ы хайадисджыты, кӕцытӕ жюрийы рӕгъмӕ сӕхи фыст ӕмдзӕвгӕтӕ чи рахæссы, ахæмтæ. Уый та уӕлдай раппӕлинаг хъуыддаг у, уымӕн жюри дӕр уӕлдай аргъ кӕны. Чизоны, уыцы сабитӕй исчи сомбоны стыр поэт у.
Бӕрӕг у проекты хайадисджытӕй алкӕмӕн дӕр конкурсмӕ кӕй ис бӕрнон ахаст. Ӕрвылхатт дӕр вӕййынц иттӕг хорз цӕттӕ, кӕд дзы исчи ахауы, уӕддӕр уый конкурс у, уым ерыс цӕуы ӕмӕ афтӕ домы. Проектӕй чи рахауы, уыдоны цӕсгӕмттӕй бирӕтыл кӕд цӕстысыгтӕ ӕруайы, кӕд сӕ зӕрдӕ фенкъард вӕййы, уӕддӕр уый дӕр иу хорз миниуӕгыл дзурӕг у — куыдфӕндыйы цӕстӕй кӕй нӕ кӕсынц конкурсмӕ, стӕй, ноджыдæр зæгъдзынæнкӕй уарзынц сӕ мадӕлон ӕвзаг.
Иу дзырдӕй, ӕппӕтзӕрдӕйӕ радӕттынц, цӕуыл бакусынц, уыцы ӕрмӕг. Уый та, кӕй зӕгъын ӕй хъӕуы сӕ къухдариуӕггӕнджытимӕ иумийаг фыдӕбоны фӕрцы.
Бафиппайын мӕ фӕнды ӕрмӕст, сывӕллӕттӕ чысыл уӕндондӕр сӕхи куы ӕвдисиккой, уӕд ныфсджындӕр уаиккой, ӕддагӕтты цӕсты та ахадгӕ дӕр.
Проект «Дзырд» у кӕстӕр фӕлтӕр аив дзырдыл кӕм фӕцайдагъ уой, сӕ курдиаттӕ кӕм рабӕрӕг уой, ахӕм хорз фӕрӕз.
Хорз уаид, ацы проект йӕ фӕдыл куы расаид ӕндӕр ног проекттӕ, цӕмӕй сывӕллӕттӕ ӕдзухдӕр хайад исой, цӕмӕй бӕрӕг кӕна сӕ арӕхстдзинад ӕмӕ сын уа ӕнтыстытӕ сфӕлдыстад ӕмӕ аивады. Ахсджиаг у, ахӕм проектты ма хайад куы исиккой районты сывӕллӕттӕ, уымӕн ӕмӕ уыдонӕн сӕ фадӕттӕ къуындӕгдӕр вӕййынц ӕмӕ цӕмӕй уыдон дӕр размӕ цӕуой, сгуыхтдзинӕдтӕ сын уа алы фадгуыты.
«Дзырд» сындӕггай йӕ финалмӕ фӕхӕццӕ кӕны, уӕлахиздзау (-тӕ) бӕрӕг ӕрцӕудзысты ӕмӕ зӕрдӕйы та баззайдзӕн цӕй диссаг у ирон аив дзырд ӕмӕ аив дзурын та кӕддӕриддӕр куыд рӕсугъд кӕны адӕймаджы.
Ирон дзырд макуы банымӕг уӕд ӕмӕ ӕнустӕм хъуысӕд Ирыстоны алы къуымтӕй.
КЪÆБЫСТЫ Зӕринӕ
