Кæддæр нын цы æппæтадæмон бæрæгбонтæ уыд, уыдонæй-иу нæхи алкæмæй тынгдæр цæттæ кодтам фыццæгæм майы бæрæгбонмæ. Уый-иу уыд æппæт зæххон цинтæй йемыдзаг цинæвдылд бон. Уымæн æмæ уæд æндæр рæстæг, æндæр дуг уыд, адæмæн æндæргъуызон ахаст уыд бæрæгбонтæм дæр, цардмæ дæр æмæ сæ кæрæдзимæ дæр.
Уæд æндæр ном æмæ нысаниуæг уыдис фыццæгæм майы бæрæгбонæн. Ныр æй схуыдтой уалдзæг æмæ куысты бæрæгбон, фæлæ дзы нал тæлфы кæддæры æппæтадæмон зæрдæйыуаг, нал дзы æндавы уыцы хъармдзинад. Фæлæ алцы аразæг дæр адæм сæхæдæг сты… Уыцы бæрæгбонтæн сæ нысан кæнын, сæ нысаниуæг, æппæт нæ цардуаг фæивын дæр адæмæн сæхицæй рацыд. Нырма дæр æй кæйдæр æмæ кæйдæрты аххос кæнæм, фæлæ уыцы бæрндзинад ничи сисдзæн адмæн сæхицæй дæр… Цуанон, дам, цы ком нæ басгары, уый сырдджын фенхъæлы… Гъемæ, ныххæррæтт кодтой советон адæм дæр ног царды «рацарæзтмæ», капитализмы «фæрныгадмæ». Ныр та æндæр зарæг кæнынц, фæстæмæ уыцы дуг, уыцы системæмæ тырнынц, кæддæр фæсфæд кæй аппæрстой, уыцы лозунгæ тилынц…
Куыдфæнды ма уа, уæддæр уалдзæг царды райдиан у, æрдзы уд бацæуыны рæстæг. Гъемæ, нæ уалдзæджы хорзæх уæд, уалдзыгон хур нæ тавæд алкæй уды, алкæй хæдзары дæр. Куысты бæрæгбон дæр у æмæ куыстхъом куыд уæм, нæ алы куыст дæр бæркадджын, фæстиуæгджын æмæ фарсылхæцинаг куыд уа, ахæм арфæ нæ уæд.
Уалдзæг æмæ дæ куысты бæрæгбоны хорзæх уæд, Ирыстон!
Comments are closed, but trackbacks and pingbacks are open.