Ацы къуыри нæ горæты 9-æм астæуккаг скъолайы нымад æрцыд математикæ, информатикæ æмæ физикæйы къуырийыл. Уый фæлгæтты ам æрвылбон дæр уагъд цæуынц алыгъуызон цымыдисон мадзæлттæ. Скъолайы ахуыры хайады гæс Дзигойты Ритæ куыд загъта, афтæмæй ахæм мадзæлттæ уыдон фæуадзынц æрвыл ахуыры аз дæр. Мадзалы нысан сæйраджыдæр у ахуыргæнинæгты зонындзинæдтæ рауæрæхдæр кæнын, бафидар кæнын æмæ сын æнæтрадицион ахуырты руаджы сæ зонындзинæдтæ фылдæр кæнын.
«Ахуыры азы райдайæны азы нывæзтмæ мах бахæссæм предметон къуыритæ уадзын дæр. Саразæм график æмæ уымæ гæсгæ азы дæргъы уагъд фæцæуынц мадзæлттæ», – загъта Дзигойты Ритæ.
Проекты фæлгæтты ахуыргæнджытæ ахуыргæнинæгтимæ ацæуынц экскурситы музеймæ, равдыстытæм, библиотекæтæм, рауадзынц къулын газет, ауадзынц уæлæмхас уроктæ, равдисынц мастер-къластæ.
«Æрвылаз дæр предметон къуыритæ райдайæм ирон æвзаджы къуырийæ октябры мæйы Хетæгкаты Къостайы гуырæнбонмæ æввахс. Уый фæстæ æрвылмæй дæр уагъд фæцæуынц ахæм предметон къуыритæ,- зæгъы Дзигойты Ритæ. Æрæджы мах ауагътам истори, æхсæнадзонынад æмæ географийы къуыри. Æз, куыд историйы ахуыргæнæг, афтæ 11-æм къласонтимæ бацæттæ кодтон адæймаджы бартæ æмæ закъонтæ бæлвырддæр базоныны темæйыл викторинæ. Ацы темæтыл ма Пæррæстаты Эльвирæ æмæ Тедеты Заремæ дæр ауагътой ахуыры программæйæн æдде уроктæ. Ацы мадзæлттæм ахуыргæнинæгтæ фæцымыдис кæнын, райсынц активон хайад. Ныр ма нын баззад уырыссаг æмæ англисаг æвзæгты, биологи æмæ химийы предметы къуыритæ ауадзын», – загъта Дзигойты Ритæ.
Ритæ ма куыд загъта, афтæмæй предметон къуырийы фæуды йæ хатдзæгтæм гæсгæ æвзæрст æрцæуынц хуыздæр ахуыргæнинæгтæ æмæ сæ æрвылмæйон традицион линейкæйы схорзæхджын кæнынц разæнгардгæнæн лæвæрдтæ æмæ грамотæтæй.
«Ахæм предметон къуыритæ уагъд цæуынц нæ горæты æндæр скъолаты дæр. Уыдон, та сæйраджыдæр, ахъаз сты ахуыры процессы уæз фæлæмæгъдæр кæнынæн, афтæмæй сын хуымæтæгдæр хуызы ног зонæнтæ радтын сæ миддунейы курдиат райхалынæн, радтынц сын фадат сæхи алыварсонæй бафæлварынæн.
Предметон къуыритæ ма ахуыргæнджытæн дæр фадат дæттынц ахуыргæнинæгты зонындзинæдтæ бæлвырддæрæй базонынæн, æмæ кæд ахуыры процессы æмбæлынц зындзинæдтыл, уæд раргом кæнын æмæ сæ аиуварс кæнынæн дæр. Афтæмæй ахуыры процессыл предметон къуыритæ æндавынц бирæ-бæрцæй хорзæрдæм æмæ сты æнæмæнгхъæуæг», – банысан кодта Дзигойты Ритæ.
ХУЫГАТЫ Миленæ
Comments are closed, but trackbacks and pingbacks are open.