Спорт

ГОМ ТУРНИР УЫРЫССАГ ШАШКÆТÆЙ

Космонавтикæйы боны цытæн уагъд æрцыд Цхинвалы районы гом турнир уырыссаг шашкæтæй. Ауагъта йæ ацы районы администрацийы спорты хайад. Турниры хайад райстой республикæйы районтæй 14 минæвары. Уагæвæрдмæ гæсгæ уыдон кæрæдзиимæ фембæлдысты фæйнæ иу хатты, ома сæ алчи дæр ахъазыд 13 партийы. Сæ фæстиуджытæм гæсгæ иууыл фылдæр очкотæ æрæмбырд кодта Цхинвалы районы минæвар Тедеты Николай æмæ ссис ерысты уæлахиздзау. Дыккаг бынат бацахста Лалыты Павел. Уый та хъахъхъæдта республикæйы столицæйы спортивон кад. 3-аг бынат бацахсыныл цыд карз спортивон тохтæ. Æмхуызон очкотæ æрæмбырд кодтой Знауыры районæй Гæджиты Тамаз æмæ Цхинвалы районы минæвар Джиоты Павел. Уымæ гæсгæ дыууæ дæр нымад æрцыдысты турниры бронзæйон призертыл.

Ерысты уæлахиздзау æмæ призерты РХИ-йы шашкæты федерацийы президент Лолоты Барис æмæ Цхинвалы районы спорты хайады сæргълæууæг Тъуриты Тенгиз схорзæхджын кодтой кады грамотæтæ, майдантæ æмæ кубоктæй. «Иууыл æвзонгдæр хайадисæджы приз лæвæрд æрцыд Хуыбылты Оксанæйæн. Уæлахизмæ тырнындзинады приз та райста Къæбулты Григори.

                  ГРЕКЪАГ-РОМАГ ХЪÆБЫСХÆСТ

 Ирон спортсмен Хъæбæлоты Витали Бухаресты ссис грекъаг-ромаг хъæбысхæстæй Европæйы чемпион.  Витали архайдта 55 кг уæзы категорийы. Уый финалы 11:0 хыгъдæй рамбылдта бынæттон спортсмен Флорин Татайы.

                                          ФУТБОЛ

  Дзæуджыхъæуы футболон командæ «Спартак-Дзæуджыхъæу» Уæрæсейы чемпионаты дыккаг дивизионы «Хуссар» зонæйы радон туры фысымиуæг кодта Пятигорскы командæ «Машук-КМВ»-йæн. Фембæлды фыццаг æмбисы спартаконтæн бантыст дыууæ пуртийы бакъуырын. Уыдонæн уазджытæ хъазты дыккаг æмбисы сдзуапп кодтой æрмæстдæр иу пуртийæ æмæ афтæмæй дзæуджыхъæуккæгтæ фæуæлахиз сты 2:1 хыгъдæй.

Радон туры Гогниты Спартакы командæ 17-æм апрелы уазæгуаты хъаздзæн «СКА Ростов-Доныл»-имæ.

ХУРИТЫ Батрадз