Гиппократ дзырдта: «Æнæдызæрдыгæй, æппæт зонæдтæй медицинæ у иууыл арфæйагдæр». Абон уын радзурдзыстæм Цæгат Ирыстонæй рацæугæ, зынгæ ахуыргонд, профессор, ахуыргæнæг, медицинон-профилактикон æмæ фармацевтон зонæдты фæдыл Уæлдæр аттестацион къамисы (ВАК) экспертон советы уæнг Бадтиаты Виктория Аслæнбеджы чызджы цардвæндаджы тыххæй. Уый рацыд хуымæтæджы провинциалон чызг уæвгæйæ Уæрæсейы раззагон ахуыргонды фæндагыл. Йæ хъуыдыимæ разы вæййынц Уæрæсейы хуыздæр ахуыргæндтæ.
Райгуырд 1966 азы 15-æм ноябры. 1990 азы тынг хорз нысæнттыл каст фæцис Цæгат Ирыстоны паддзахадон медицинон академи. Бацыд ординатурæмæ, уый фæстæ та – медицинон реабилитаци æмæ курортологийы Уæрæсейаг зонадон центры аспирантурæмæ, бахъахъхъæдта кандидатон диссертаци æмæ дыууæ азы терапи амыдта Цæгат Ирыстоны паддзахадон медицинон академийы студенттæн.
Уый фæстæ цæрынмæ рацыд Мæскуымæ, цыран бахъахъхъæдта докторон диссертаци кардиореабилитацийы фарстыты фæдыл æмæ кусгæйæ баззад центры, цыран схызт сæйраг зонадон кусæгæй къухдариуæггæнæджы онг æмæ фæстæдæр та ссис медицинон реабилитацийы æппæт здæхтыты къухдариуæггæнæг.
Бадтиаты Викторияйы зонадон архайды сæйраг здæхтытæ сты: зæрдæдадзинты низтæй рынчынты реабилитацийы ног методтæ æмæ комплексон программæты клиникон практикæйы бакусын æмæ ныббиноныг кæнын, спортæй профессионалон ахуырты рæстæ-джы патологон уавæрты клиникон-функционалон маркерты æмæ предикторты сбæрæг кæнын, спорты реабилитацийы ног технологитæ бакусын. 2014 азы куыста горæт Сочийы Олимпион хъæзтыты сæй-раг поликлиникæ «Альфа»-йы сæйраг дохтырæй.
И.М.Сеченовы номыл Мæскуыйы Фыццаг паддзахадон медицинон университеты æндидзынгæнæн медицинæ, реабилитаци æмæ курортологийы кафедрæйы профессор Бадтиаты чызджы къухдариуæгады бын бахъахъхъæд æрцыдысты авд кандидатон æмæ иу докторон диссертаци. Фæстæдæр куыста спортивон медицинæйы клиникæйы сæйраг дохтырæй, кæцы архайы спортсменты, æмбырдгонд командæты уæнгты, спорты ветеранты æмæ чемпионты медицинон ифтонгадыл. 2016 азы серьезон равзæрсты фæстиуæгæн ирон сылгоймаг ссис Зонæдты уæрæсейаг академийы уæнгуацхæссæг, кæцы нысан кæны йæ зонадон куыстæн ын æрмæст стыр аргъ кæй не скодтой, фæлæ ма йыл стыр бæрндзинад кæй сæвæрдтой, уый дæр.
Бадтиаты Викторияйæн райзæрдæйæ йæ зæрдыл æрлæууы: «Мæскуымæ куы æрцыдтæн, уæд мæм афтæ каст, зæгъгæ, столицæйы уæлдæр ахуырадон уагдæттæ каст чи фесты, уыцы бынæттон мæскуыйæгтæй, периферион уæлдæр ахуырадон уагдоны рауагъдонæн къаддæр фадæттæ уыдзæн йæ профессийы йæхи среализаци кæнынæн. Фæлæ цард куыд фенын кодта, уымæ гæсгæ раст нæ уыдтæн. Къухдариуæггæнджытæ – мæскуыйæгты тыххæй-иу афтæ кæй дзырдтой, зæгъгæ, уыдон хуыздæрыл нымайынц сæхимæ горæт Мæскуыйы цæрджыты исын, уый бынтондæр раст нæу. Æз æй мæхиуыл никуы банкъардтон. Кæд хорз ахуыр кодтай æмæ дæм мæскуыйаг уæлдæр ахуырадон уагдæттæ каст чи фесты, уыдонæй къаддæр зонындзинæдтæ нæй, кæд дæм тырнындзинад ис размæ цæуынæн алыгъуызон зындзинæдтæм нæ кæсгæйæ, уæд дын ис æппæт шанстæ дæр дæ профессийы дæхи среализци кæныны тыххæй. Ирæттæ хистæр кары адæмæн кæй кад кæнынц æмæ сæхи цыфæнды уавæрты дæр хорз кæй дарынц, уымæй сæхицæн ном кæнынц. Æз ны-майын афтæ, æмæ ацы æвæрццаг миниуджытæ хорз кæй æххуыс кæнынц стыр горæты дæр. Кæцæй æрцыдтæ æмæ цы нацийы хатт дæ, уымæн ницы нысаниуæг ис. Сæйраг у, цæмæй дæм уа фаг зонындзинæдтæ, цæсгомджынæй фæллой кæнай, хæлар ахаст дарай дæ алыварс адæммæ æмæ уæд дæ фæндаг гом уыдзæн дæ профессийы бæрзæндтæм. Тынг ахсджиаг у, æппæт уыдæттæ æвзонг адæймæгтæ куы æмбариккой, уый!».
Википедияйы бæрæггæнæнтæм гæсгæ, ныртæккæ профессор Бадтиаты Виктория у Земляной валы Клиникон спортивон медицинæйы сæргълæууæг.
Comments are closed, but trackbacks and pingbacks are open.