Уӕлахизы 73 азы сӕххӕсты бӕрӕгбон цытимӕ банысан кодтой Цхинвалы районы Къостайыхъӕуы астӕуккаг скъолайы ахуыргӕнджытӕ ӕмӕ ахуыргӕнинӕгтӕ дӕр. Хъӕу сӕрыстыр у, Стыр Фыдыбӕстӕйон хӕсты йæ сагсур фӕсивӕд знаджы ныхмӕ хъазуат ирон лӕджы кад дӕлӕмӕ кӕй не ‘руагътой, уымӕй. Тохы быдыры хъӕбатырдзинады цӕвиттон ӕвдыстой æмæ не стыр Райгуырӕн бӕстӕйы тыххӕй се ‘взонг цард нӕ бавгъау кодтой Тедеты Гиойы ӕртӕ фырты, Бигъуылаты, Гоцъиты, Гӕбӕраты, Джиоты, Мӕлдзыгаты, Хуыбиаты, Хетӕгкаты ӕмӕ ӕндӕр мыггӕгты сахъ хӕстонтӕ. Хӕсты хъайтардзинад чи равдыста, фӕлӕ йӕ фыдыуӕзӕгыл сӕрӕгасӕй чи нал сӕмбӕлд, уыдон номыл хъӕуы ис цыртдзӕвӕн ӕмӕ дзы фыст ӕрцыдысты сӕ нӕмттӕ. Уыдон рох никуы уыдзысты хъæуы цæрджытæй».
Скъолайы коллектив Уӕлахизы боны цытӕн ӕрбацыдысты цыртдзӕвӕны цурмӕ, сӕвӕрдтой йыл венок ӕмӕ иу уысм алӕууыдысты ӕдзӕмӕй. Уый фӕстӕ советон бирӕнацион адӕмты, уыцы нымӕцы ирон сахъгуырдты хъайтардзинады тыххӕй кӕстӕр фӕлтӕрӕн радзырдтой скъолайы директор Тыбылты Алекси, ахуыргӕнджытӕ Хуыбиаты Зоя ӕмӕ Гӕбӕраты Барис. Мадзаламонджытӕ Тараты Иренӕ ӕмӕ Джиоты Миланӕ байгом кодтой мадзалы дыккаг хай ӕмӕ ахуыргӕнинӕгтӕ кӕрӕдзи фӕдыл кастысты ӕмдзӕвгӕтӕ ирон ӕмӕ уырыссаг ӕвзӕгтыл, сӕххӕст кодтой хӕстон ӕмӕ сабырадмӕ сидӕг зарджытӕ. Кафджыты къорд та адӕмы зӕрдӕтӕ барухс кодтой «Чызджыты кафт», «Хӕххон кафт», «Ӕфсӕддон вальс» ӕмӕ ӕндӕртӕй. Ирон фӕндырыл сын аив цагъта Къӕбысты Сӕрмӕт. Сценӕмӕкӕсджыты зӕрдӕтӕ сӕ ралӕудтытӕй барухс кодтой Джергаты Альбинӕ, Хуыбиаты Аннӕ, Джусойты Георги, Мӕлдзыгаты Аслан, Хуыбиаты Дауыт, Тыджыты Аланӕ ӕмӕ ӕндӕртӕ. Бӕрӕгбонон мадзал бацӕттӕ кӕныныл зӕрдиагӕй бацархайдтой къласгӕстӕ ӕмӕ ахуыргӕнджытӕ Бӕззаты Оксанӕ, Галуанты Ларисӕ ӕмӕ Хъабанты Дианӕ.
Хуыбиаты Никъала
Comments are closed, but trackbacks and pingbacks are open.