Нæ республикæйы санитарон-эпидемиологон уавæр бонæй-бонмæ карзæй-карздæр кæй кæны, уымæн æвдисæн у, нæ горæты уынгты фæстаг рæстæджы арæх фенæн кæй ис тагъд æххуысы машинæты. Æппæт дунейы статистикæмæ гæсгæ, ног коронавирусæй рынчынты нымæц фылдæрæй-фылдæр кæны. Нæ республикæйы оперативон штабы рабадты фæстиуæгæн фæстаг мæйы ист æрцыдысты карз мадзæлттæ, фæлæ, уыцы мадзæлттæм нæ кæсгæйæ, уæддæр низ йæ кæнон кæны.
Карз вирус рабæрæг кæныны фæстиуæгæн нæ республикæйы бирæпрофилон медицинон центры нæ горæты æмбæстæгтæ æрвылбон дæр слæууынц рады райсомæй, цæмæй сæхицæн саразын кæной ПЦР-ы тесттæ. Тестты фæстиуæгæн куыд рабæрæг вæййы, афтæмæй рынчынты нымæц нæ республикæйы дæр къаддæр нæ кæны. Ацы карз вирусы фæзынд канд адæймаджы цардыл нæ бандæвта, фæлæ – æмткæй æхсæнады цардыл дæр. Мæнæ цыма нырыккон царды домæнтæ ацы вирус фæивынмæ хъавы, афтæ йæхи æвдисы. Ацы вирусы фæзынд цæхгæр бандæвта алы куыстуатыл дæр. Куыд уынæм, афтæ иууыл тынгдæр бандæвта медицинон уаг-дæтты куыстыл æмæ йæ фадыджы кусджыты цардыл.
Æппæт дунейы медицинон кусджыты æмрæнхъ слæууыдысты нæ республикæйы медицинон уагдæтты кусджытæ дæр. Уыдон æрвылбон дæр удуæлдай тох кæнынц алы рынчыны цардыл дæр. Æппæт уыцы медицинон уагдæтты кусджыты фарсмæ сты нæ республикæйы тагъд æххуысы станцы кусджытæ дæр, йæ сæйраг дохтыр Хъуылымбегты Емзары сæргълæудæй. Рагæй фæстæмæ адæймаджы цъус йе ‘нæниздзинад куы фæтыхсын кæны, уæд, фыццаджыдæр, фæдзуры тагъд æххуысы станцмæ. Горæты тагъд æххуысы станцы кусджытæ ныр дыууæ мæйы дæргъы æндыгъд уавæрты цæсгомджынæй æххæст кæнынц сæ куыст. Хъуылымбегты Емзары ныхæстæм гæсгæ, ацы фæстаг дыууæ мæйы дæргъы тагъд æххуысы станцмæ сидтытæ фæфылдæр сты.
«Нæ республикæйы эпидемиологон уавæр кæй февзæрдæр ис, уый бæрæг у, мах станцмæ сидтыты нымæц кæй фæфылдæр, уымæй. Зæгъæм, иу бон нæм вæййы 50-100 онг сидты. Уый, кæй зæгъын æй хъæуы, бирæ у. Фæлæ йæ махæй алчи дæр хъуамæ æмбара, ацы уавæр кæй у баст пандемиимæ.
Нæ кусджытæ тынг серьезон ахаст дарынц сæ куыстмæ. Нæ куысты сæвзæры иуæй-иу хатт æнæштатон уавæртæ, ахæм уавæрты рæстæджы сидтмæ цъус рæстæг фæфæстиат вæййынц нæ станцы кусджытæ, фæлæ уый фæстæ тагъд æххуысы кусджытæ уайтагъд дæр бацæуынц рынчынмæ æмæ сæ комкоммæ хæстæм æрæвналынц. Цæй тыххæй æмæ цас рæстæг фæфæстиат уыдзæн дохтыр, уый, кæй зæгъын æй хъæуы, нæ диспечер бамбарын кæны æмæ йæ фехъусын кæны телефоны æрбадзурæгæн. Иу рынчын дæр махæн нæ баззайы нæ басгарст, алкæмæ дæр нæ хъус дарæм. Бынаты рынчыны басгарынц æмæ уым бæрæг вæййы, рынчыны рынчындонмæ хъæуы аласын æви йын хæдзарон уавæрты хос æрцæудзæн йæ фадыгон дохтыры хъусдарды бын. Кусы нæм цыппар тагъд æххуысы бригадæйы, уыдонæй æртæ сты терапев-тон, иу та – педиатрийон», – банысан кодта, тагъд æх-хуысы станцы сæйраг дохтыр.
Уый нын куыд зæгъта, афтæмæй ныртæккæ сæ профессионалон хæс сæ æмбæстæгты раз цæсгомджынæй æххæст кæнынц 14 дохтыры, 24 медицинон хойы æмæ 4 санитаркæйы. Афтæ ма тагъд æххуысы машинæты шофыртæ, кæцытæ æхсæвæй бонæй цæттæ сты рæстæгыл дохтыры рынчынмæ фæхæццæ кæнынмæ. Рынчынæн фыццаг æххуыс бакæнынмæ тагъд æххуысы кусджытæ вæййынц алы хатт дæр цæттæ, медикаменттæй цухдзинад нæ æййафынц. Тагъд æххуысы кусджытæ рынчынмæ бацæуынц. вирусæй хи бахизыны фæдыл цы медицинон индивидуалон уæлæдарæс ис, уыдоны. Уыцы индивидуалон уæлæдарæс бæззы æрмæсдæр иу хатт скæнынæн, уый фæстæ уыцы уæлæдарæс æппæрст æрцæуы. Рынчынæй æрбаздæхыны фæстæ тагъд æххуысы машинæ дезинфекци æрцæуы.
– Мах канд горæты цæрджытæм нæ ацæуæм æххуысмæ, фæлæ ма – районты цæрджытæм дæр. Уым дæр рынчыны куы басгарынц нæ дохтыртæ, уæд бынаты дæр рабæрæг вæййы, рынчындонмæ йæ хъæуы аласын, æви – нæ. Фæнды мæ зæгъын нæ æмбæстæгтæн, зын рæстæг кæй у, низ тынг карз низ у, уымæн æвдисæн стæм мах иууылдæр æмæ æххæст кæнæм бахъахъхъæныны фæдыл оперативон штабы райсгæ мадзæлттæ. Уымæн æмæ æрмæсдтæр уыдон æххæст кæнгæйæ, фадат ис вирусæй хи бахизынæн, – банысан кодта Хъуылымбегты Емзар.
Танделаты Вилена
Comments are closed, but trackbacks and pingbacks are open.