Сывæллоны уарзондзинад чиныгмæ бирæбæрцæй баст у бинонтыл

Адӕймаджы интеллектӕн аргъ кодтой алы хатт дӕр, тӕрхӕгыл ӕм цал чиныг ис, уымӕ гӕсгӕ. Кӕй зӕгъын ӕй хъӕуы, интеллектуалон ӕгъдауӕй размӕцыд алы ныййарӕджы фӕндид, цӕмӕй йӕ сывӕллон уарза кӕсын.

Планшет, компьютер, телевизор, приставкӕ сты, ныры дуджы сывӕллӕттӕ чиныг кӕсыны бӕсты сӕхицӕн цы равзарынц, уыдоны цыбыр номхыгъд. Стӕм хатт фендзынӕ ахӕм сывӕллӕтты, кӕцытӕ компьютерон хъӕзтытӕ ӕмӕ Киборгты хӕстытыл мультфильмтӕм кӕсыны бӕсты сабырӕй кӕсынц чиныг.

Зӕгъут ма йӕ, ӕрмӕст ӕцӕгӕй, уӕ сывӕллӕттӕ уарзынц кӕсын? Ныййарджытӕ, нанатӕ ӕмӕ дадатӕ сын кӕсой ӕмӕ сӕм уыдон хъусой, афтӕ нӕ, фӕлӕ сӕхигъӕдӕй кӕсой? Сӕ бон у ӕмӕ бацӕуой чингуыты тӕрхӕгмӕ, бакӕсой чингуыты «цъӕрттӕм», райсой хъӕуӕг чиныг, сбадой кӕлӕтджыныл ӕмӕ аныгъуылой чиныджы дунейы?

Кӕй зӕгъын ӕй хъӕуы, гӕххӕттӕй чингуыты ныртӕккӕ иуырдӕм ссонынц электронон чингуытӕ ӕмӕ планшеттӕ. Фӕлӕ, уӕддӕр ис ахӕмтӕ, кӕцытӕ аргъ кӕнынц чиныгӕн. Сывӕллоны уарзондзинад чиныгмӕ бирӕбӕрцӕй баст у бинонтыл.

Сывӕллоны чиныгимӕ зонгӕ кӕ-нын райдайут чысылӕй. Фыццаг уал нывтимӕ чингуытимӕ, цадӕггай ахизут хъӕлдзӕг цыбыр ӕмдзӕвгӕтӕ ӕмӕ зарджытӕм. Чиныг кӕсынӕн равзарын хъӕуы ахӕм рӕстӕг, сы-вӕллонмӕ галиу кӕныны зӕрдӕ куы нӕ уа, уӕд.

Мад, кӕнӕ фыдимӕ чиныгы кӕсыны рӕстӕг сывӕллонӕн хъуамӕ хӕсса ӕхцондзинад ӕмӕ йӕм ӕвзӕрын кӕна ӕвӕрццаг эмоцитӕ ӕмӕ уӕд уымӕн уыдзӕн фӕндон, сфӕлхат кӕна ацы рӕстӕг.

Архайут ууыл, цӕмӕй чиныг кӕсын суа ӕрвылбонон, куыд традици, афтӕ. Уый уыдзӕн чиныг кӕсын, куыд фынӕйы размӕ, афтӕ бон сихорафон. Фыццаг кӕсут аргъӕуттӕ, цыбыр радзырдтӕ, фӕстӕдӕр ахизут историтӕм, кӕцытӕн дарддӕр дӕр уыдзӕн бакӕсӕн. Цымыдис кӕнут, сывӕллон хуыздӕр цы бахъуыды кодта, кӕцы персонаж фӕцыд, кӕнӕ нӕ фӕцыд йӕ зӕрдӕмӕ, хорзыл нымайы, ӕви нӕ историйы финал, уымӕ. Уымӕн ӕмӕ кӕсыны культурӕ ӕрмӕст текст кӕсын нӕу, фӕлӕ уымӕн анализ аразын дӕр. Хорз уаид, уӕ хъус куы ӕрдариккат, уӕ сывӕллон цахӕм чиныг кӕсы, уымӕ. Архайут ууыл, цӕмӕй сывӕллон къаддӕр рӕстӕг ӕрвита телевизор ӕмӕ компьютеры раз. Уӕ сывӕллонимӕ иумӕ ацӕут чингуыты дуканимӕ, бацымыдис кӕнут, цавӕр чиныг бакӕсын ӕй фӕнды. Уадз ӕмӕ йӕхи фӕндонмӕ гӕсгӕ равзара чингуытӕ. Уӕхи цы фӕнды, уый бакӕсын сын тыххӕй ма хъарут, кӕннод, гӕнӕн ис, кӕсын йӕ удхӕссӕг феста.

Чиныг чысылӕй куы бауарза сывӕллон, уӕд азтӕ куыд цӕуой, афтӕ йӕ азтӕм, кӕнӕ уавӕрмӕ гӕсгӕ «бахъуызын» кӕнут ахӕм чиныг, кӕцы иуӕй-иу хатт хуыздӕр у хорз ныййарӕгӕй, бафтаудзӕн ӕй хорз хъуыдыйыл, сахуыр ӕй кӕндзӕн ӕмӕ йын баххуыс кӕндзӕн (уӕлдайдӕр уый хауы хистӕркъласонтӕм). Ацы кары ӕнӕмӕнг у, цӕмӕй сывӕллон кӕса хӕлардзинады, скъолайон фыдуагдзинӕдты, йӕхӕдӕг цахӕм у, ахӕм сывӕллӕтты тыххӕй.

Ацы рӕстӕджы йӕм фӕзыны къласикӕ (уый скъолайон программӕ дӕр у), фантастикӕ ӕмӕ детективтӕ кӕсыны зӕрдӕ дӕр. Хорз у, хӕдзары уӕм куы уаид ахӕм жанры чингуытӕ. Уӕ зӕрдыл ӕй дарут, тыхӕй ма хъарут сывӕллонӕн, цы-мыдисон ын цы нӕ у, ахӕм чингуытӕ.

Уӕ хъус дарут сывӕллоны интерестӕм, арæхстгай йын амонут фӕндаг литературӕйы диссаджы дунемӕ.

Кӕй зӕгъын ӕй хъӕуы, нӕ фӕлтӕрддзинадӕй, нӕ архайдтытӕй сывӕллон хъуамӕ уына, кӕсын, ӕцӕгӕйдӕр, цымыдисон кӕй у, уый. сывӕллоны куы сбадын кӕнат, цӕмӕй кӕса ӕмӕ уыцы рӕстӕджы сымах та уӕ рӕстӕг куы ӕрвитат телевизоры раз, дис уӕм ма фӕкӕсӕт – сывӕллон чиныг куы аппара ӕмӕ сымах бафӕзмына, уӕд.

Уӕ зӕрдыл ма йӕ дарут, мах куыд ахуыр кодтой чиныг хъахъхъӕнын? Чиныг-иу искӕмӕй куы райстам, уӕд-иу ӕй стыхтам газеты, цӕмӕй ма счъизи уыдаид йе ‘ддаг цъар. Раздӕр чиныг уыд зынаргь лӕвар. Ныры сывæллæттæ афтæ нæ хъуыды кæнынц, фæлæ чиныгы кæсын æмæ уый бахъахъхъæнын цайдагъ кæнын, махæн у нæ бон.