Сывæллæтты бахизæм фыдбылызæй

Нӕ фыдӕлтӕй нын баззадис ахӕм ныхас, зӕгъгӕ, къӕсӕрӕй дуармӕ дӕр фӕндаг у. Фæндагыл цæугæйæ та хатт адæймагмæ фæкæсы фыдбылыз ӕмӕ дӕхи хъуамӕ хъахъхъӕнай фистӕгӕй цӕугӕйӕ дӕр ӕмӕ машинӕ скъӕргӕйӕ дӕр.

Ног ахуыры азы ӕрлӕудимӕ скъоладзаутӕ дӕр бар-ӕнӕбары свӕййынц фӕндагон змӕлды хайадисджытӕ. Скъоламæ цӕугӕйӕ уыдон хъуамӕ лӕмбынӕг кӕсой сӕ алфӕмблай, цӕмӕй ӕдасӕй бахӕццӕ уой бынатмӕ. Ӕмӕ сын уый тыххӕй та хъӕуы амонын фӕндагон змӕлды фӕткойтӕ. Фӕндагон-транспортон цаутӕн ӕнӕххӕст кары сывӕллӕтты хайад-истӕй анализ скӕныны фӕстиуӕгӕн рабӕрӕг ис, сывӕллӕттӕ кӕй нӕ зонынц фӕндагон змӕлды элементарон нормӕтӕ. Авариты фыл-дӕр хайы аххосаг вӕййы, кӕм нӕ ӕмбӕлы, уыцы бынаты куы ахизынц фӕндаджы иннӕ фарсмӕ ӕмӕ ма ӕнӕнхъӕлӕджы куы рагӕпп кӕнынц машинӕйы размӕ. Сывӕллонӕн йӕ чысылӕй фӕстӕмӕ хъӕуы амонын, уымӕн ӕмӕ, фӕндагыл цӕугӕйӕ, йе ‘дасдзинады сæйра-джыдæр, йӕхицӕй аразгӕ у. Йӕ ныййарджытӕ йын хъуамӕ ӕдзух йӕ зӕрдыл дарой фӕндагон змӕлды фӕткойтӕ ӕмӕ йын сӕхицӕй цӕвиттон ӕвдисой. Бирӕ ныййарджытӕ сӕхӕдӕг дӕр не ‘ххӕст кӕнынц уыцы фӕткойтӕ ӕмӕ сывӕллон уый куы уына, уӕд, кӕй зӕгъын ӕй хъӕуы, йӕ хистӕрты фӕзмдзӕнис.

Ис ма ахæм шофыртæ дæр, æмæ машинæ скъæрын рæстмæ нæ зонынц. Уыдон кæддæриддæр хæссынц фыдбылыз, фехалынц фæндагон фæткойтæ. Фæндагон змæлды æдасдзинады инспектортæ æрвылбон дæр уадзынц рейдон мадзæлттæ, цæмæй рабæрæг кæной фæткхалджыты.

Ӕгæр бирæ хисæрмагонд машинæтæ кæй ис не ‘мбæстæгтæм, уый фæдыл азмæлæн нал вæййы райсомæй горæты нарæг уынгты. Уыцы æндыгъд уавæрыл ма бирæбæрцæй æндавы светофорты æвзæр куыст дæр. Тынг арæх нæм æрцæуы фæндагон-транспортон цаутæ, кæцыйы аххосаг вæййы хæлд светофор. Уый та ууыл дзурæг у, æмæ æмбæлон службæтæ сæ хъус кæй нæ дарынц фæндæгтæм. Уый фæстиуæгæн фистæг бæлцæттæн уæлдай зын вæййы уыцы машинæты ‘хсæнты цæуын. Нал æй фæзонынц, кæд у сæ ахизыны рад æмæ ма шофырты дæр стыхсын кæнынц.

Ӕрвыл райсом дæр ахуыргæнæн уагдæтты раз фенæн ис милицийы кусджыты, кæцытæ контроль кæнынц автомашинæты змæлдыл, нæ уадзынц фæткхалæн цаутæ аразын, æххуыс кæнынц фистæг бæлццæттæн фæндагæн иннæ фарсмæ ахизынæн. Ацы райсгæ мадзæлттæ стыр ахъаз сты ахуырдзауты фыдбылызæй бахизынæн.

ДЖИОТЫ Александр