Фæстаг азты нæ сæйраг горæт Цхинвалы æмæ нæ республикæйы районты дæр арæзт цæуынц цæрæн хæдзæрттæ, æндæр æмæ æндæр нысаниуæгджын объекттæ.
Куыд бæрæг у, афтæмæй 2015-2017 азты Хуссар Ирыстоны социалон-экономикон рæзтæн ахъазгæнæг Инвестицион программæмæ хаст объекттæ аразынмæ цæуы стыр хъусдард здæхт æмæ æдзухдæр сты куыд нæ республикæйы, афтæ Уæрæсейы разамынады æдзухон хъусдарды бын дæр. Афтæ кæй у, уымæ гæсгæ, рæстæгыл снысангонд æмгъуыдмæ эксплуатацимæ лæвæрд цыдысты бирæ нысаниуæгджын объекттæ. Фæлæ хицæн æмæ хицæн объектты арæзтадтæ хаст æрцыдысты ацæугæ азæй ацы азмæ. Ахæм объекттæй сæ иу у, республикон соматикон рынчындоны территорийыл арæзтцæуæг операцион-хирургион корпус.
Зындгонд куыд у, афтæмæй ацæугæ азы ам сырæзт сывæллæтты реабилитацион центр æмæ лæвæрд æрцыд эксплуатацимæ. Операцион-хирургион корпус дæр арæзт цæуы 2015-2017 азтæн Инвестицион программæ реализаци кæныны фæлгæтты. Йæ закъазгæнæг у Арæзтад, архитектурæ æмæ цæрæнуатон-коммуналон хæдзарады министрад. Йæ аразæг та у генералон подрядон организаци «СТМ-Юг». Иууыл æхсызгондæр уый у, æмæ ацы объект арæзт куы фæуа, уæд ам кæй кусдзæнис гемодиализы хайад дæр, цыран туг сыгъдæг цæудзæн аразгæ мембранæйы руаджы, «аразгæ уырг» аппаратæй спайда кæнгæйæ, уый стыр æххуыс фæуыдзæн, нæ республикæйы цæрджытæй ахæм æххуыс кæй хъæуы, уыдонæн. Уымæн æмæ ахæм рынчынтæ медицинон æххуыс райсыны тыххæй цæуынц Дзæуджыхъæумæ, æмæ уыцы даргъ фæндагыл цæуын та зын у уыдонæн. Ныридæгæн куыд бæрæг у, афтæмæй уый уыдзæн æртæуæладзыгон æмæ баиу уыдзæн соматикон рынчындоны бæстыхаимæ. Йæ иумиаг фæзуат уыдзæн 4594 квадратон метры. Уым ма уыдзæн рынчындоны централон стерилизацион хайад дæр.
Объекты æппæт арæзтадон куыстытæ дæр сты 618 милуан сомы аргъ, уыдонæй 209 милуан сомы рахицæн æрцæудзæн арæзтадон-монтажгæнæн куыстытæн æмæ 365 милуан сомы та – ифтонггæрзтæн. Уыдон та уыдзысты нырыккон ифтонггæрзтæ, кæцыты руаджы фадат уыдзæнис дистанцион æгъдауæй уыргты фæзынгæ дурты пырх кæнынæн, уыдзысты дзы ног лапороскопион комплекстæ, æвæрд дзы æрцæудзæн магнитон-резонансон то-мограф. Централон стерилизацион хайады стерилизаци цæудзысты операцион дарæс, бæттæн æрмæджытæ, хирургион инструменттæ, шприцтæ, æндæр медицинон æрмæджытæ.
Корпусы уыдзæн 6 операцион блокы. Уыцы нымæцы урологион æмæ офтольмологион. Æвæрд дзы æрцæудзæн дыууæ рентгены аппараты. Уым ма уыдзысты реанимацион зал, интенсивон терапийы палатæтæ, фотолаборатори, дохтырты кабинеттæ, персоналон хатæнтæ.
Арæзтад, архитектурæ æмæ цæрæнуатон-коммуналон хæдзарады министры хæдивæг Гаглойты Сергей куыд загъта, афтæмæй ныртæккæ ам арæзт цæуы дыккаг уæладзыджы амайæн куыстытæ. Дыккаг уæладзыгыл ма цæуынц электромонтажгæнæн куыстытæ дæр. Тагъд темптæй арæзт æмæ лæгъз цæуынц хатæнты астæрдтæ, æвæрынц пластикон рудз-гуытæ. Объектты æдæппæт кусы 65 адæймаджы, æххæст сты техникæйæ дæр. Сергей куыд зæ-гъы, афтæмæй корпус арæзт фæуыдзæн ацы азы кæронмæ. Куы сырæза, уæд та нæ адæмæн бирæ фенцондæр уыдзæн се ‘нæниздзинад фæрогдæр кæнынæн.
Бестауты Валя
Comments are closed, but trackbacks and pingbacks are open.