Сухумы кæронмæ бахæццæ Омар Кварчийы 15 дунеон номарæн турнир стъолы теннисæй. Ерысты Хуссар Ирыстоны минæвæрттæ рамбылдтой 5 майданы. Уый тыххæй хъусын кæны стъолы теннисы федерацийы президент Джиоты Мириан. Æмхæццæ къæйтты ‘хсæн æвзист майдан рамбылдта Елбачиты Иринæ. Бронзæйон призертæ та систы Кокойты Амандæ æмæ Джиголаты Аланæ.
12 азы онг кæуыл цæуы, уыцы сывæллæтты ‘хсæн та дыккаг ссис Майя Касрадзе. Бронзæ майдан та бафтыд Тедеты Алинæйы къухты.
Спосртменкæты тренертæ сты Джиоты Мириан æмæ Уалыты Иринæ.
УÆЗЗАУ АТЛЕТИКÆ
Хæдбар паддзахадты æмхæларады бæстæты II хъæзтыты тынг хорз сæхи равдыстой Ирыстоны уæззау атлетикæйы скъолайы хъомылгæнинæгтæ. Цыппарæй систы ерысты уæлахиздзаутæ, иу та дзы бацахста дыккаг бынат. Хъæзтытæ уагъд цыдысты Белорусийы. 71 кг уæзы категорийы фыццаг бынат бацахста Гуссалты Зæринæ 237 кг бæрæггæнæнимæ (108+129), 76 кг уæзы сыгъзæрин майданы хицау ссис Чилæхсаты Мæдинæ. Уый та дыууæ истæн скодта 220 кг (94+126). 81 кг уæзы категорийы 248 кг (113+135) бæрæггæнæн равдисгæйæ пьедесталы фыццаг къæпхæнмæ схызт Соттиты Янæ.
Нæлгоймæгты ‘хсæн +109 кг уæзы категорийы 380 кг бæрæггæнæнимæ (160+220) сыгъзæрин майданы хицау ссис Наниты Тимур.
Ирон спортсментæй æвзист призер та ссис Хъесаты Георги. Уый та дыууæ истæн скодта 371 кг (166+205).
ФУТБОЛ
Футболæй Уæрæсейы фыццаг дивизионы 5-æм туры Дзæуджыхъæуы «Алани» хъазыд Мæскуыйы «Торпедо»-имæ. Дзæуджыхъæуккæгтæ æнæхъæн хъазты дæргъы архайдтой хуыздæр æмæ сын бантыст 2:0 хыгъдæй рамбулын. Расгуыхтысты Николай Гиоргобиани æмæ Ислам Машуков.
Ацы уæлахизы фæрцы «Алани» æрæмбырд кодта 10 очкойы æмæ турнирон таблицæйы цæуы æртыккаг бынатыл.
Дзæуджыхъæуккæгтæ радон хъазт акæндзысты 20-æм августы Мæскуыйы «Родина»-имæ.
ХУРИТЫ Батрадз
