Тыбылты Алыксандры номыл Хуссар Ирыстоны Паддзахадон университеты музейон комплексы ректор Тедеты Вадимы хъæппæрисæй æмæ Хуссар Ирыстоны фыдыбæстон хæсты фæудыл 15 азы сæххæсты цытæн байгом æрцыд Цæгат Ирыстоны æрмдæсныты уникалон куклæты равдыст. Фыццаг хатт уыцы иурæстæджы ам равæрдтой æндæр æмæ æндæр дæсныты, куыд зæгъæм Дзиоты Земфирæ, Таутиаты Азæ, Хъаныхъуаты Иринæ, Хетæгкаты Беллæ, Мæхъиты Оксанæ æмæ æндæрты куыстытæ.
Экспозицимæ æдæппæтæй бацыдысты 110 куклæйы, сæ бæрзæнд дæр у алыгъуызон. Куклæты æхсæн уæлдай цымыдисондæр сты скифаг хæстоны хуызæг, кæцыйæн йæ бæрзæнд у 197 сантиметры æмæ Хуссар Ирыстоны Брытъаты хъæуккаг рухстауæг Сланты Гахайы хуызæг. Æрмдæсныты куклæтæ сты æцæг аивады уацмыстæ.
Арæзт цæуынц къухæй алыгъуызон æрмæджытæй. Куклæты равдысты хайад райстой РХИ-йы Президенты Паддзахадон уынаффæгæнæг Беджызаты Батрадз, ХИПУ-йы ректор Тедеты Вадим, Хуссар Ирыстоны фыццаг президент Цыбырты Людвиг, æхсæнадон змæлд «Иудзинад»-ы уæнг Мамытаты Тасолтан, журнал «Ногдзау»-ы сæйраг редактор Сæлбиты Дианæ æмæ æндæртæ. Национ культурæ пупуляризаци кæныны фæдыл бæрзонд аивадон æмæ стыр куыст бакæныны тыххæй Кады грамотæтæй хорзæхджын æрцыдысты ацы диссаджы куклæты æрмдæснытæ. Равдыст уагъд цæудзæн 14-æм августæй 1-æм октябры онг.
Кокайты Зæринæйы ист къамтæ
