Хъӕздыг у Ирыстоны зӕхх хорз ӕмӕ суинаг кӕстӕртӕй. Хуыцау ӕвӕджиауы курдиат рӕдауӕй кӕмӕн бахай кодта, уыдонӕй иу у Дзӕуджыхъӕуы 5-ӕм гимназы фæндзӕм къласы ахуырдзау Басаты Оскар.

Уый бирӕ уарзы классикон музыкӕ. Фондз азы дӕр ыл нӕма цыд, афтӕ ахуыр кӕнынмӕ бацыд Дзӕуджыхъӕуы сывӕллӕтты аивӕдты скъоламӕ фортепьянойы къласмӕ. Музыкалон сусӕгдзинӕдтӕ йын амоны РЦИ-Аланийы культурӕйы сгуыхт кусӕг Ирина Никитина.

Оскар архайы нӕ бӕстӕйы бирӕ алыхуызон музыкалон конкурсты. Ныртӕккӕ йыл 11 азы йеддӕмӕ нӕма цӕуы, фӕлӕ йӕ музыкалон ӕвӕрӕны цы бирӕ дипломтӕ ӕмӕ Кады гӕххӕттытӕ ис, уыдонмӕ зындгонд артисттӕ дӕр бахӕлӕг кӕндзысты. У уӕрӕсейаг музыкалон фестивалты премиты лауреат ӕмӕ алыхуызон кадджын музыкалон конкурсты уӕлахиздзау.

Ацы бонты та ссис Ӕхсӕнадӕмон фестиваль “Le Ciel de Paris”-ы   конкурс “Казань Stars”-ы  фыццаг премийы лауреат.

“Ацы культурон-ахуырадон проекты хайадист у стыр къахдзӕф ӕвзонг музыканты фидӕны профессионалон райрӕзтмӕ”, – банысан кодтой уагдоны.

Ӕвзонг музыканты ахуыргӕнӕг Елена Ламбрианидийы дӕр схорзӕхджын кодтой жюрийы грамотӕйӕ.

Басаты Оскар фӕстаг мӕйты дӕргъы активон хайад иста концерттӕ ӕмӕ конкурсты.

Оскар бирӕ уарзы дунеон композиторты музыкалон уацмыстӕ, фӕлӕ йӕ зӕр-дӕйы уӕлдай арфдӕр бынат бацахста Макъоты Ацӕмӕзы музыкӕ, исы дзы стыр ӕхцондзинад. Уый у йӕ уарзондӕр композитортӕй иу.

Оскарыл йӕ цӕст ӕрӕвӕрдта УФ-йы адӕмон артисткӕ Гергиты Ларисӕ, æмæ алывӕрсыг ӕххуыс кӕны суинаг курдиатджын музыкантӕн.

Æрмæгыл бакуыста ДРИАТЫ Лейла

Ацы æрмæджытæ дæр бакæс:

Стыр Фæз – йæ сабион авдæн Фатимæ – ног театры фидауц Берозты Таймураз – ансамбль «Къона»-йы саразæг Ам райгуыры ирон фæндыр Ирон культурӕйы бонтӕ – Парижы

Comments are closed, but trackbacks and pingbacks are open.