Спорт

ФУТБОЛ

Фæбæрæг сты футболæй дунейы чемпионаты финалы 1/4  хаймæ чи ахызт, уыцы командæтæ. Бразилийы командæ 2:0 хыгъдæй рамбылдта Мексикæйы. 2:0 хыгъдæй Японæн æмбылды кæнгæйæ, Бельгийы командæйæн йæ бон ссис нырма хыгъд сæмхуызон кæнын æмæ стæй та 3-аг пурти бакъуырын æмæ фæуæлахиз 3:2 хыгъдæй. Швеция 1:0 хыгъдæй тыхджындæр разынд Швейцарийæ. Карз тох цыд Англи æмæ Колумбийы командæты ‘хсæн хъазты. Сæйраг рæстæг фæцис 1:1 хыгъдæй. Пенæлттæм гæсгæ та спортивон амонд бахудт англисаг футболисттæм æмæ ахызтысты дарддæр. Раздæр ма финалы 1/4  хаймæ ахызтысты Уæрæсе, Хорвати, Уругвай æмæ Франц.

6-æм июлы уагъд æрцæудзæн дыууæ хъазты: Уругвай фембæлдзæн Францимæ, Бразили та хъаздзæн Бельгиимæ.

7-æм июлы та æрдæгфиналмæ рахизыныл тох кæндзысты Уæрæсе æмæ Хорвати, афтæ ма Швеци æмæ Англис.

АРМСПОРТ

Дзæуджыхъæуы уагъд цыд Уæрæсейы сгуыхт тренер Еналдыты Асланбеджы номыл æппæтуæрæсейон турнир армспортæй. Ерысты хайад райстой 200 спортсменæй фылдæр. Уыдон ‘хсæн уыдысты Хуссар Ирыстоны минæвæрттæ дæр. 90 кг галиу къухæй ерысты аккаг ныхмæлæууæг нæ разынд Гасситы Сосланæн. Уый финалы тыхджындæр уыд 2016 азы дунейы чемпион Уыртаты Ацæмæзæй. 65 кг уæзы категорийы та Хæбæлаты Арсен галиу къухæй ссис дыккаг, рахиз къухæй та бацахста æртыккаг бынат. Ацы уæзы ма рахиз къухæй ерысты дыккаг бынат бацахста Кæсæбиты Владислав, галиу къухæй та ссис æртыккаг.

Спортсменты тренертæ сты Джиоты Валери æмæ Бететы Алан.

Хуриты Батрадз