Спорт

ХОРЗÆХДЖЫН ÆРЦЫДЫСТЫ ОЛИМПИАДÆЙЫ УÆЛАХИЗДЗАУТÆ

Уæрæсейы Президент Владимир Путин Хæлардзинады орденæй схорзæхджын кодта Токиойы Олимпион хъæзтыты уæлахиздзауты. Цытджын церемонии уагъд æрцыд Кремлы Екатеринæйы залы. Бæстæйы сæргълæууæг ахæм кадджын хорзæх радта уæгъдибар хъæбысхæстæй Олимпион хъæзтыты чемпион Сидахъты Заурыбегæн дæр.

Олимпион хъæзтыты æвзист æмæ бронзæйон призертæн та паддзахадон хорзæхтæ радта Уæрæсейы президенты æххуысгæнæг Игорь Левитин. Спортсментæн лæвæрд æрцыд «Райгуырæн бæстæйы раз лæггæдты тыххæй» II æмæ I къæпхæны ордены майдантæй .

Хорзæхджынты ‘хсæн уыдысты Олимпион хъæзтыты бронзæйон призертæ Найфонты Артур æмæ Таймæзты Мадинæ.

Олимпион хъæзтыты уæлахиздзаутæ æмæ призертæн ма балæвар кодтой  автомобилтæ. Хъæзтыты уæлахиздзаутæ баисты BMW X5 хицæуттæ, призертæ та – BMW X3.

 

УÆГЪДИБАР ХЪÆБЫСХÆСТ

Минскы уагъд æрцыд уæгъдибар хъæбысхæстæй  Гран-при «Александр Медведь-2021». Ерысты 86 кг уæзы категорийы сыгъзæрин майдан рамбылдта ирон богал Зассеты Алан. Турниры бронзæйон призертæ та систы Салхъазанты Таймураз (74 кг), Джиоты Дмитри (74 кг) æмæ Цæрæхаты Сæрмæт (97 кг).

 

ФУТБОЛ

 

Национ футболон къорды 10-æм туры Дзæуджыхъæуы «Алани» фæуæлахиз «СКА-Хабаровск»-ыл. Ирыстоны сæйраг футболон командæйы хъазджытæн 11-æм минутыл бантыст хыгъд байгом кæнын. Расгуыхт Николай Гиоргобиани. Фæлæ æнæнхъæлæджы уазджытæн бантыст дзуаппон пурти бакъуырын. Уый фæстæ алайнæгтæ ноджы стырдæр тыхтæй абырстой размæ æмæ хъазты фыццаг æмбисы кæрон «Алани»-йы размæбырсæг Ислам Машуков пурти бакъуырдта ныхмæлæууæг командæйы кулдуары. 59-æм минутыл тæрхонгæнæг сырх карточкæ равдыста «СКА-Хабаровск»-ы хъазæгæн. Уыцы хабары фæстæ дзæуджыхъæуккаг футболисттæн ноджы æнцондæр уыд атакæтæ кæнын. Иу ахæм атакæйы фæстæ хыгъд ссис 3:1. «Алани»-йы æртыккаг пуртийы автор уыд Абу-Саид Эльдарушев.

Ацы уæлахизы фæстæ «Алани» турнирон таблицæйы схызт цыппæрæм бынатмæ.

ХУРИТЫ Батрадз