Спорт

УÆГЪДИБАР ХЪÆБЫСХÆСТ

Хуссарирыстойнаг богал Зассеты Арсæмæг ссис, 21 азы онг кæуыл цæуы, уыцы спортсменты ‘хсæн Европæйы чемпионаты бронзæйон призер. Ерыстæ уагъд цыдысты Германы. Арсæмæг архайдта 125 кг уæзы категорийы. Тренер Коцты Тамерланы хъомылгæнинаг фыц-цаг тохы йе уæхсчытыл авæрдта Беларусы минæвар Данил Даниловы. Фæстæдæр 13:0 рамбылдта туркаг Адил Ми-сирчийы. Æрдæгфиналы йæ ныхмæлæууæг уыд Сомихстоны спортивон кад хъахъхъæнæг Лева Геворгян. Ацы фембæлды арæхстджындæрæй архайдта сомихаг богал æмæ фæуæлахиз. Уымæ гæс-гæ ма Арсæмæг тох кодта æрмæстдæр бронзæ майданыл. Æмæ æртыккаг бынат бацахсыны тохы фæуæлахиз молдоваг Данил Пиртачийыл – 10:0.

БОКС

Боксы скъолайы хъомылгæнинаг Гæджиты Гурам хайад райсдзæн, 16 азы онг кæуыл цæуы, уыцы спортсменты ‘хсæн Европæйы чемпионаты. Уый архайдзæн 66 кг уæзы категорийы. Гурам бæстæйы æмбырдгонд командæмæ бахаудта, йæ кары спортсменты ‘хсæн Уæрæсейы чемпионаты кæй рамбылдта, уый фæрцы. Афтæ ма йæхи хорз равдыста цæттæгæнæн сборты дæр.

УÆЗЗАУ АТЛЕТИКÆ

Башкортостаны республикæйы уагъд æрцыд, 23 азы онг кæуыл цæуы, уыцы спортсменты ‘хсæн Уæрæсейы чемпио-нат уæззау атлетикæйæ. Ерысты уæ-лахиздзау ссис Наниты Арсен. +109 кг уæзы категорийы архайгæйæ, Арсен рав-дыста 373 кг бæрæггæнæн (172+201).

Чемпионаты æвзист призертæ систы Абайты Марат (102 кг), Хъесаты Георги (96 кг) æмæ Рæмонты Сæрмæт (+109 кг).

СУМО

4 майданы рамбылдтой ирон спортсментæ Казаны уагъдцæуæг Европæйы чемпионаты. Ерысты +115 кг уæзы категорийы финалы фембæлдысты Куыдзойты Эдуард æмæ Хъараты Зауыр. Ам цæттæдæр разынд Эдуард æмæ ссис ерысты уæлахиздзау. Бронзæйон призер-тæ та систы Бызыккаты Аслан (100 кг) æмæ Хъараты Зауыр (абсолютон уæзы категори).

Чемпионаты иууыл цымыдисондæр рауадысты командон ерыстæ. Нæлгоймæгты ‘хсæн финалы фембæлдысты Уæрæсе æмæ Украинæ. Фыццаг фембæлды уæрæсейаг Константин Абдула-Заде фæхæрд йæ ныхмæлæууæгæн. Фæлæ фæстæдæр хыгъд сæмхуызон кодта Багаты Руслан. Стæй та бæстæйы æмбырдгонд командæйæн уæлахиз æрхаста Хъазиты Ацæмæз, кæцы фæуæлахиз зындгонд украинаг сумоист Александр Гордиенкойыл.

Хуриты Батрадз