Спорт

ФÆБÆРЗОНДДÆР КОДТОЙ СÆ КВАЛИФИКАЦИ

Цхинвалмæ æрцыд «К-9»-ы федерацийы делегаци, ацы организацийы президент Заур Абдурагимовы сæргълæудæй. Федерацийы инструктортæ сæ цæттæдзинад фæбæрзонддæр кæныны курсытæ ауагътой Хуссар Ирыстоны тыхон структурæты минæвæрттæн. Ахуыртæ сын уагътой дунейы иууыл хуыздæр инструкторты номхыгъдмæ хауæг – пистолет æмæ автоматæй æхсынæй дунейы чемпионатты призер Марат Сутаев æмæ УФ-йы Сæйраг развæдсгарæн управленийы ветеран Алексей Кивилев, кæцымæ ис хæстон фæлтæрддзинад. Сæйраджыдæр, хъусдард здæхт æрцыд хæцæнгарзæй пайда кæнынмæ. Федераци «К-9»-ы президент Заур Абдурагимовы ныхæстæм гæсгæ ацы ахуыртæ фæахъаз уыдзысты тыхон структурæты службæгæнджыты цæттæдзинад фæбæрзонддæр кæнынæн.

«Мæ хъуыдымæ гæсгæ уыдон базондзысты бирæ ногдзинæдтæ æмæ афтæмæй фæбæрзонддæр кæндзысты сæ квалификаци. Рæстæг куыд цæуы, афтæ методикæтæ ивынц, фæзыны алыгъуызон ногдзинæдтæ, дунейы ивы хæстон архайдтытæ уадзыны тактикæ æмæ уымæ гæсгæ æнæмæнгæй хъæуы кадрты семæ зонгæ кæнын. Уæлдайдæр та – Хуссар Ирыстоны тыхон структурæты службæгæнджыты, кæцытæ сæ хъус дарынц бæстæйы æмæ йæ цæрджыты æдасдзинадмæ. Уымæ гæсгæ сæ æдзух хъæуы хорз цæттæ уæвын», – банысан кодта Заур Абдурагимов.

«К-9» дунейон федерацийы сконды ис 35 бæстæйы. Организацийы уæнгтæ сты Сæйраг развæдсгарæн управленийы æмæ Æдасдзинады федералон службæйы афицертæ æмæ ветерантæ. 2008 азæй фæстæмæ федераци æмгуыстад кæнын райдыдта Хуссар Ирыстонимæ. 2015 азы та нæ бæстæйы гом æрцыд ацы федерацийы филиал. Йæ сæргъ слæууыд хæстон архайдтыты хайадисæг, Фæсивæдон политикæ æмæ спорты фæдыл комитеты сæрдар Зассеты Сергей.

«Мах æнгом æмгуыстад кæнæм «К-9» федерациимæ. Нæ спортсментæ хайад фæисынц «К-9» эгидæйы бын уагъдцæуæг ерысты. Ныр дæр та нæ июлы мæйы фæхуыдтой Мæскуымæ, цыран хайад райсдзыстæм ацы организацийы мадзалы», – банысан кодта Зассеты Сергей.

Хуссар Ирыстоны тыхон структурæты службæгæнджыты цæттæдзинад фæбæрзонддæр кæныны тыххæй сын ахуыртæ уагъд æрцæудзысты æфсæддон полигоны дæр.

Хуриты Батрадз