Фыдыбæстæ хъахъхъæнæджы боны цытæн спортивон бæрæгбон арæзт æрцыд Дзауы поселочы. Ам сæ цæттæдзинад фæлвæрдтой районы тыхон структурæты æмæ уæрæсейаг 4-æм æфсæддон базæйы минæвæрттæ. Ерыстæ уагъд цыдысты армспортæй, хæдæхс райхалын æмæ сæмбырд кæнын, турникыл хи исын, гиритæ исын æмæ бæндæн ивазынæй.
«Ацы ерыстæ фæуадзæм æрвылаз дæр. Æцæг, ивгъуыд аз ерыстæ ауагътам Цъоны лыжæтыл бырынæй, фæлæ та ацы аз сфæнд кодтам ногæй сæ ауадзын. Сæ хайадисджытæ æвдисынц хорз цæттæдзинад. Сæрмагондæй мæ бузныг фæнды зæгъын 4-æм æфсæддон базæйы службæгæнджытæн, кæцытæ та ныр дæр активон хайад райстой нæ ерысты», – банысан кодта Дзауы районы администрацийы спорты хайады сæргълæууæг Джиоты Алик.
Фыццаг уал ерысты хайадисджытæ сæ-хи фæлвæрдтой автомат райхалын æмæ сæмбырд кæнынæй. Ам иууыл хуыздæр бæрæггæнæн равдыста Милицийы сæр-магонд нысаниуæджы къорды служ-бæгæнæг Бежанты Константин. Дыккаг ссис районы Мидхъуыддæгты управленийы минæвар Тедеты Батрадз æмæ æртыккаг бынатыл та ацыд 4-æм æфсæддон базæйы командæйы уæнг Илья Кустюшин.
Армспортæй уæлахиздзау æмæ призертæ систы Милицийы сæрмагонд нысаниуæджы минæвæрттæ. Фæуæлахиз Къæбысты Альберт, дыккаг æмæ æртыккаг бынæттæ та адих кодтой Бежанты Константин æмæ Тедеты Азæмæт.
Турникыл хиисынæй иууыл цæттæдæр разынд Милицийы сæрмагонд нысаниуæджы къорды службæгæнæг Хъоцыты Батрадз. Дыккаг бынатыл ацыд Хъотайты Алан. Уый дæр у ацы структурæйы минæвæр. Æмæ пьедесталы æртыккаг къæпхæнмæ та схызт районы мидхъуыддæгты управленийы командæйы уæнг Хъазиты Сослан.
Гири исынæй дæр фыццаг æртæ бынаты фесты Милицийы сæрмагонд нысаниуæджы къорды службæгæнджыты. Иууыл фылдæр хатт гири систа Гатыгкоты Александр, дыккаг бынат бацахста Къæбысты Альберт æмæ æртыккаг бынатыл та ацыд Тедеты Азæмæт.
Иууыл цымыдисондæр рауадысты бæндæн ивазынæй ерыстæ. Ам дæр та аккаг ныхмæлæууæг нæ разынд Милицийы сæрмагонд нысаниуæджы къорды командæйæн, кæцы финалы рамбылдта районы мидхъуыддæгты управленийы командæйы. Уый та ссис дыккаг. Æмæ æртыккаг бынатыл та ацыд Уæлвæткон уавæрты министрады командæ.
Ерысты уæлахиздзаутæ æмæ призертæ хорзæхджын æрцыдысты Кубоктæ æмæ кады грамотæтæй.
Хуриты Батрадз
Comments are closed, but trackbacks and pingbacks are open.