Спорт

БОКС

Мæскуыйы уагъд æрцыд профессионалон боксæй турнир «Дерись и побеждай 58». Ерысты фæлгæтты уагъд æрцыд 17 тохы. Уыдонæй сæ иуы хайад райста 21-аздзыд ирон боксер Хуыгаты Алан. Уымæн йæ ныхмæлæууæг уыд уæрæсейаг Толибджон Сарабеков. Алан уыд хуыздæр цæттæ æмæ æртыккаг раунды рамбылдта техникон нокаутæй. Хуыгаты Аланы тренертæ сты Сланты Витали æмæ Тедеты Алик.

ФУТБОЛ

Ирыстоны футболон скъолайы хъомылгæнинаг Дзанайты Сослан гæнæн ис æмæ рахиза Санкт-Петербурджы футболон командæ «Зенит»-ы скондмæ. Питераг клубы къухдариуæгад дызæрдыг кæны сæ кулдуаргæс Андрей Луневимæ контракт адарддæр кæныныл, уымæ гæсгæ уынаффæ кæнынц «Сочи»-йы кулдуаргæс Дзанайты Сосланы æрбахоныны фарстыл. Ацы сезоны ирон 33-аздзыд футболист премьер-къорды акодта 19 хъазты. Уыдонæй 7 фембæлды йæ кулдуары иу пурти дæр нæ бауагъта. 2016 азæй та йæ фæхонынц национ æмбырдгонд командæмæ.

ГРЕКЪАГ-РОМАГ ХЪÆБЫСХÆСТ

Омскы кæронмæ бахæццæ, 18 азы онг кæуыл цæуы, уыцы спортсменты ‘хсæн грекъаг-ромаг хъæбысхæстæй Уæрæсейы чемпионат. Уым ирон богалтæй сыгъзæрин майдан рамбылдта Теблойты Давид. Уый хæцыд 65 кг уæзы категорийы. Ерысты бронзæйон призертæ та систы Теблойты Даниэль (55 кг), Гæбиты Сæрмæт (71 кг), Цоциты Азæмæт (71 кг) æмæ Хуыбиаты Азæмæт (92 кг). 

ХУРИТЫ Батрадз