Милицийы Сӕрмагонд нысаниуæджы къорды кусджытæ ауагътой тактикон-æхсæн фæлварæнтæ Мидхъуыддæгты министрады полигоны. Ахæм мадзæлттæ арæх фæуадзынц къорды кусджытæ, фæлæ сæ фæстаг рæстæджыты карантинон режим ныкъуылымпы кодта. Мидхъуыддæгты министр мæйы размæ бардзырд ратта, цæмæй ведомствойы дæлхæйттæ рæстæгмæ се спортивон æмæ æфсæддон цæттæдзинады фæдыл мадзæлттæ æруромой. Ӕмæ ныр мæйы дæргъы нæ республикæйы спортивон объекттæ сты æхгæд, стæй ма коронавирусæй хи бахизыны тыххæй райсгæ мадзæлтты фæстиуæгæн спецкъорды кусджытæ дæр æдзух вæй-йынц æнæвдæлон.
Милицийы сæрмагонд-къордæн физикон, тактикон, æфсæддон цæттæдзинады мадзæлттæ уадзыны фæрæз куы нæ уа, уæд сæ иумæйаг цæттæдзинад лæмæгъ кæны æмæ бахъуыды рæстæджы æмбæлонæй нæ сæххæст кæндзысты сæ разылæууæг службæйон хæстæ. Уый фæдыл ОМОН-ы къухдариуæгад фæндон рахастой, цæмæй къорды кусджытæ радтой фæлварæнтæ. Полигонмæ цæуынц къаннæг къордтæй райсом æмæ изæрыгон, уымæн æмæ сæ фылдæр хай вæййынц æнæвдæлон. Бынаты сын сæ инструктор Коцты Алыксандр ауадзы инструктаж æдасдзинады фæдыл, зæгъы сын йæ до-мæнтæ æмæ сын бацамоны фæлварæны нормативтæ.
«Бæрæг аххосæгтæм гæсгæ рагæй нал ауагътам фæлварæнтæ. Фæстаг хатт ма полигоны уыдыстæм апрелы мæйы райдианы. Кæд æмæ нырма карантинон режим ис æгас республикæйы, уæддæр махæн ацы мадзæлттæн æнæауадзгæ нæй. Иумæйагæй сисгæйæ службæйон, физикон æмæ æфсæддон цæттæдзинад хъуамæ уа æмбæлон æмвæзадыл. Фæлварæнты нысан у, цæмæй спецкъорды кусджытæ экстремалон уавæрты сæ кæрæдзи æм-барой, уой рæстдзæвин æмæ сын цыфæнды уавæры дæр уа тагъд фердæхт. Къорды кусджытæ сты фæдзæхст æмæ алчидæр йæхи хизы, æххæст кæнæм санитарон домæнтæ, дистанци. Абоны онг спецкъорды кусджыты æмбис радтой фæлварæнтæ. 3 боны æмгъуыдмæ хъуамæ фæуæм нæ мадзæлттæ», – зæгъы Коцты Алыксандр.
ОМОН-ы кусджытæ полигоны пайда кæнынц ахæм табелон æхсæнгæрзтæй, куыд автомат Калашниковæй, пулеметæй æмæ танкты ныхмæ къухыхæсгæ гранатæхсæнæй. Мысанмæ фехстой цалдæр позицийæ æмæ алыгъуызон дæрддзæфæй. Фæлварæнтæ дæттынц дыгæйттæй æмæ сын инструктор кæсы сæ арæхстдзинадмæ. Фæстагмæ алкæцы хæстон дæр хыгъды райсы индивидуалон нысæнттæ æмæ уымæ гæсгæ рабæрæг вæййы йæ цæттæдзинад.
ДЖИОТЫ Александр
Comments are closed, but trackbacks and pingbacks are open.