Сæйраг фæсивæды фарсмæ æрбалæууын у

Ивгъуыд къуырийы кæрон информацион агентад «Спутник»-ы пресс-центры уагъд æрцыдис Республикæ Хуссар Ирыстоны Фæсивæды политикæ, спорт æмæ туризмы фæдыл комитеты сæрдары хæдивæг Гатыгкоты Валентинæйы пресс-конференци.

Райдианы уал цыбыртæй æрдзырдта, ивгъуыд аз сæ куыст куыд ацыдис æмæ сæм дарддæр цы фæндтæ æмæ пълæнттæ ис фæсивæдимæ бакусыны хъуыддаджы. Гатыгкоты Валентинæ куыд банысан кодта, афтæмæй Хуссар Ирыстоны ацы аз арæзт æрцæудзæн фæсивæдон медиацентр, уагъд æрцæудзæн конкурс æрыгон журналисттæн, организацигонд ма хъуамæ æрцæуой сæрдыгон улæфæн лагерь æмæ форумтæ дæр.

Комитеты минæвар банысан кодта, зæгъгæ, æрыгон фæлтæры амондджын æмæ худæндзаст цæсгæмттæ кæй нысан кæнынц, уый æмæ комитетæн йæ куыст эффективонæй кæй ацыд æмæ фæсивæдыл æвæрццагæй кæй бандæвта.

«Алкæмæндæр зындгонд у нæ республикæйы трагикон хъысмæт, цы фæндæгтыл рацыд æмæ цы уæззау цард бавзæрстам, уыдон, кæй зæгъын æй хъæуы, æвзæ-рæрдæм бандæвтой æппæтыл дæр. Адæй-магæн сæйраг куы вæййы йæ уд бахъахъхъæнын, уæд ничиуал ницæуыл фæхъуыды кæны, никæйуал фендавынц фæсивæды проблемæтæ дæр æмæ алæууынц фæстæмæ. Ныр 12 азы цæрæм сабыр арвы бын æмæ æрцыд уыцы рæстæг, цæмæй лæмбынæг хъусдард аздахæм нæ сомбоны цардмæ æмæ приоритетон скæ-нæм фæ-сивæдон политикæйы фæдыздæхт», – загъта Гатыгкоты чызг.

Уый ма куыд радзырдта, афтæмæй нысанмæздæхтæй хъæуы кусын фæсивæдимæ. «Æз афтæ хъуыды кæнын æмæ фæсивæдæн æнæмæнг кæй у сæ квалификаци фæбæрзонддæр кæныны хъуыддаг. Цæмæй уыдон республикæйæн æдтейæ ног зонындзинæдтæ райсой æмæ цардимæ æмдзу кæной. Алы аз дæр нæ фæсивæд хайад фæисынц социалон проекткæныны фæдыл семинарты куысты, кæцыты сорганизаци кæнынц Уæрæсейы Федерацийы фæсивæд. Нæ фæсивæдæй ацы семинарты хайад райсын сæ бон вæййы æрмæстдæр 15 адæймагæн. Æз ахъуыды кодтон, зæгъгæ, хорз уаид æмæ ахæм æнгæс семинартæ уагъд куы рцæуиккой Хуссар Ирыстоны территорийыл дæр, цæмæй дзы фылдæр фæсивæд райсой хайад. Уый тыххæй мах æрхондзыстæм æмбæлон специалистты. Ныртæккæ кусæм уыцы хъуыддагыл, фæнды нæ сбæрæг кæнын, цавæр специалисттæ хъæуы зæрдиагдæрæй нæ фæсивæды æмæ сæ æрхонæм», – банысан кодта комитеты сæрдары хæдивæг.

Гатыгкоты чызг ма куыд радзырдта, афтæмæй та ацы аз дæр фæнд кæнынц этнографион лагерь бакæнын, цæмæй фæсивæдæн фадат уа сæ рæстæг хъæлдзæгæй арвитынæн. «Ивгъуыд аз лагерь куы сорганизаци кодтам, уæд дзы райгондæй баззадыстæм, уыдис ын æвæрццаг фæстиуджытæ. Кæд нæ уыцы куысты кæмдæрты цæмæйдæрты райгонд нæ уыдтæн, уæддæр сæ мах ацы аз баххæст кæндзыстæм æмæ нæ мадзал организацигонд æрцæудзæн æмбæлон æмвæзадыл. Этнографион лагертæ уымæй хорз сты æмæ сæ фæсивæд ахуыр кæнынц нæ рагфыдæлты истори, культурæ, традицитæ, æгъдæуттæ æмæ мадæлон æвзаг. Ивгъуыд аз этнолагерь баконд æрцыдис Дзауы районы æмæ дзы баулæфыдысты 50 адæймаджы бæрц. Этнолагеры хайадисджытæн организацигонд æрцыдис цымыдисон æмæ бæркадджын программæ. Фæсивæдæн уыдис уыцы уавæртæ æмæ фадат, цæмæйдæриддæр хайад райстаиккой æндæр æмæ æндæр мастер-кълæсты, экскурситы. Фæсивæдæн цымыдисон лекцитæ бакастысты бынæттон специалисттæ, æххæст кодтой хъæзтытæ æмæ дзы сæ арæхстдзинад æвдыстой ка-фын æмæ зарынæй дæр», – банысан кодта Гатыгкоты Валентинæ.

2020-æм азы æппæт дунейыл тæссаг коронавирус кæй апарахат, уымæ гæсгæ Хуссар Ирыстон дæр бахауд карантины уацары. Фæззæджы нæ республикæйы рынчындæтты рынчынты нымæц райдыдта фылдæрæй фылдæр кæнын. Низ æгъатыр кæй разынд æмæ дзы дохтыртæ дæр кæй рынчын кодтой, уымæ гæсгæ бахъуыд волонтерон баиугæнд «Вместе» саразыны сæр, цæмæй се ххуысы къух фæдаргъ кодтаиккой нæ республикæйы медперсоналмæ. Волонтерты хорз архайды кой айхъуыст æмæ ныр Фæсивæдон политикæ, спорт æмæ туризмы фæдыл комитет сфæнд кодта æрвылазон церемони «Человек года»-йы номинациты коронавирусы ныхмæ тохы фæсивæдæй удуæлдай куыст чи бакодтой, уыцы хъайтарты схорзæхджын кæнын. Гатыгкоты Валентинæйы ныфс ис æмæ ацы аз мадзал уагъд кæй æрцæудзæн æмæ хорзæхтæ кæй ссардзысты сæ хъайтарты. «Мах æнæхъæн азы дæргъы нæ хъус фæдарæм  фæсивæдмæ æмæ сæ йæ куыст æмæ архайды йæхи чи хуыздæр равдисы, ома, чи дзы фесгуыхы, ахæмты рахицæн кæнæм æмæ сæ схорзæхджын кæнæм. Уый у стимул æрыгон специалистæн йæ куысты хъуыддаджы. Ивгъуыд аз нæм ацы церемонийы уыдис 18 номинацийы æмæ нæ хорз, куыстмæ зæрдæргъæвд фæсивæды базонгæ кодтам адæмæн», – загъта Гатыгкоты чызг.

Пресс-конференцийы ма комитеты минæвар фехъусын кодта, зæгъгæ, 2019-æм азæй дарддæр реализаци кæнынц фильмты проект «Южная Осетия – край солнечной мечты», кæцыйы руаджы нæ республикæйы фенддагдæр æмæ рæсугъддæр бынæттæ æвдыст цæуынц интернеты, цæмæй нæ республикæмæ се ргом аздахой туристтæ. Уый та у ахсджиаг фарст æмæ йыл кусынц Хуссар Ирыстоны Фæсивæды политикæ, спорт æмæ туризмы комитет. Пресс-конференцийы рæстæджы ма мониторыл æвдыст цыдысты видеороликтæ, комитет цы мадзæлттæ ауагъта, уыдон тыххæй. Пандемимæ æнæкæсгæйæ ивгъуыд аз Фæсивæды политикæ, спорт æмæ туризмы фæдыл комитет бацæттæ кодта æмæ ауагъта æндæр æмæ æндæр мадзæлттæ, уыдон нымæцы акци «Страницы геноцида», «Че-ловек года», «Этнолагерь», форумтæ «Ала-ния-2020» æмæ «Барс», конкурс «Особый стиль» æмæ æндæртæ.

Нæ уацх.