Æрæджы Цхинвалы районы Дменисы хъæуы астæуккаг скъолайы химийы ахуыргæнæг Лолоты Ренатæ ацы скъолайы хистæркъласонтимæ бацæттæ кодта мадзал химийæ Д. И. Менделеевы химикон элементты таблицæйы байгомыл 150 азы сæххæсты цытæн.
Хистæркъласонтæ бацæттæ кодтой æмæ аив сфæлыстой, Д. И. Менделеевæй сæ къухы цы зонадон æрмæджытæ бафтыд, уы-донæй. Мадзалмæ хуынд æрцыдысты иннæ кæстæр ахуыргæнинæгтæ дæр.
Ивгъуыд æнусы зындгонд ахуыргонды цард æмæ зонадон архайдыл цыбыртæй радзырдта 11 къласы ахуыргæнинаг: «Димитр Иваны фырт Менделеев райгуырд 1834 азы 27 январы г. Табольскы.1869 азы Менделеев бакодта элементты периодикон закъон æмæ айхъуыст йæ ном. Растдæр Менделеевы фæрцы базыдта, дуне æрдзы бирæ элементтæ нырмæ иртæстгонд кæй нæ уыдысты. Менделеевы цытæн Уæрæсейы хицауад рауагъта майдан, уый лæвæрд æрцæуы, химийы фадыджы æнтыстытæ кæмæн вæййы, ахæм ахуыргæндтæн.
Ахуыргæнинæгтæ цæстуынгæ æрмæджыты руаджы амыдтой, иу химикон элементмæ иннæ бафтаугæйæ, цавæр ног элемент райсæн ис, уыдæттæ. Уый фæстæ ахуыргæнинæгтæ адих сты дыууæ командæйыл: «Протон» æмæ «Электрон»-ыл. Уыдон химийæ кæрæдзимæ лæвæрдтой фарстатæ æмæ афтæмæй æвдыстой сæ зонындзинæдтæ.
Иууыл цымыдисон та уый уыд, æмæ скъолайы ахуыргæнинæгтæ се ‘ппæт дæр хайад кæй райстой мадзалы. Кæстæр къласы ахуыргæнинæгтыл конд æрцыд табличкæтæ химикон таблицæйы нæмттимæ. Уыдонæй алчи дæр зыдта, цы элемент у, уымæй æрвылбонон царды кæм пайда чындæуы.
Ахуыргæнинæгтæй иууыл активондæр уыдысты Гаглойты Муртаз, Дудайты Эрик, Гаглойты Моникæ, Лолоты Роланд, Цхуырбаты Майя, Джиголаты Марат æмæ æнд.
Мадзалы кæрон скъолайы директор Дудайты Земæ ахуыргæнинæгты схорзæх-джын кодта Кады грамотæтæй.
Зæгъын хъæуы уый, æмæ ахæм мадзæлттæ нæ республикæйы скъолаты арæх арæзт кæй нæ цæуы. Хорз уаид, ацы фæлтæрддзинадæй куы спайда кæниккой æндæр скъолаты дæр.
УАЗÆГТЫ Марфа
Comments are closed, but trackbacks and pingbacks are open.