Сывæллæтты дунеон бон хъæлдзæг зæрдæйы равгимæ банысан кодтой Цхинвалы районы Къостайыхъæуы дæр. Уырдæм фæуазæг сты районы Культурæйы управленийы кусджытæ, ныййарджытæ æмæ скъоладзаутæ. Мадзал бацæттæ кодта бынæттон библиотекæйы сæргълæууæг Бæззаты Маринæ æмæ æрдзырдта ацы бæрæгбоны фæзынд æмæ нысаниуæджы тыххæй.
Бæрæгбонон мадзалы хайадисджыты зæрдæтæ сæ ралæудæй барухс кодтой кæстæртæ. Нысаниуæгджын боны цытæн æмдзæвгæтæ радзырдтой Мæлдзыгаты Фатимæ, Лохты Вадим æмæ Витали. Зæрдæмæдзæугæ зард акодта къаннæг чызг Лохты Алинæ, уый та сæххæст кодта уырыссаг зарæг «Уадз алы хатт дæр уæд хур» æмæ йын сценæмæкæсджытæ кодтой зæрдиаг къухæмдзæгъд. Адæмы зæрдæмæ тынг фæцыд Хуыбиаты Миланæ, Мæлдзыгаты Аделинæ, Марат, Тъотъоты Амандæ, Хуыбиаты Камилæ æмæ æндæрты аив ралæуд, Хетæгкаты Къостайы æмдзæвгæ «Цъиу æмæ сывæллæттæм» гæсгæ инсценировкæ куы равдыстой, уæд. Кафджыты къорд та акафыдысты æмæ адæмы зæрдæты хорз æнкъарæнтæ ныууагътой «Хонгæ кафт», «Чызджыты кафт», «Ерысы кафт»-æй. Иудзырдæй, мадзал уыд зæрдæмæдзæугæ æмæ уый тыххæй бузныгæй баззадысты йæ хайадисджытæ æмæ йæ бацæттæгæнæг Бæззаты Маринæйæ.
ХУЫБИАТЫ Никъала
Comments are closed, but trackbacks and pingbacks are open.