Сабийы худгæ æмæ хъæлдзæг цæстæнгас… Хатт та йæ хъуынтъыз ахаст æмæ тæргæйттæ. Ахæмæй февдисынц сæхи нæ чысыл хуртæ се сконд æмæ миниуджытæм гæсгæ. Хистæр кары адæм сын уыцы миниуджытæ уайтагъддæр фæхатынц, алкæуыл дæр сæ баузæлынц, бацин кæнынц, стæй сын хъавгæ æмæ рæвдаугæ бакæнынц, мæгуыраудзинæдтæй цæмæй дарддæр хызт уой, ахæм цæстуарзон амындтытæ. Æмæ уадид кæстæрæн йæ зæрдæйы уаг фендæр ис æмæ йæ иннæ карæн æмбæлттау уымæн дæр айхъуыст йæ зæлланггæнæг хъæлæс. Йæ уæлвæд æхцонæн сулæфыд, сабийы зæрдæмæ фæндаг чи ссардта, раст зондыл æй чи бафтыдта, уыцы хъомылгæнæг дæр. Æниу, хъомылады уыцы фæрæзæй фыццаг хатт нæ пайда кæны, фæлæ æнтыст йæ къухы кæй бафтыд, йæ архайд та ацы хатт дæр кæй фæрæстмæ, уымæн аленчытæ кодта цины малы. Ахæм у æрвылбон дæр, сабиты рæвдауæндоны чи фæллой кæны, уыцы хъомылгæнæджы куыст æмæ хæс. Уыдон та сты дзæвгар æмæ се ‘ххæст кæныныл кусы зæрдиагæй.
Горæты сабиты рæвдауæндæтты тыххæй арæхдæр дзырдæуы æмæ мæ уымæ гæсгæ ацы хатт бафæндыд иу хъæууон рæвдауæндоны куыст æмæ архайды тыххæй радзурын. Цхинвалы районы ахæм уагдон ис æрмæстдæр иу – Дменисы хъæуы. Уый сырæзт æмæ баконд æрцыд ивгъуыд аз марты мæйы æмæ ныр афæдзæй фылдæр лæггад кæны йæ хъомылгæнинæгтæн. Зæгъын хъæуы, ахæм уагдонæн хъуамæ уа, разамонæджы куыст бæстон чи зона, бахæсгонд хъуыддаджы тыххæй бæрндзинад чи æнкъара, ахæм адæймаг. Районы адæмон ахуырады хайады сæргълæууæг Лолоты Барисы фæндонмæ гæсгæ дзы кусын райдыдта Джиоты Мананæ. Уый йæ куыстмæ райдианæй фæстæмæ æрæвнæлдта бæстон æмæ коллективимæ иумæ сабиты цайдагъ кæнынц зонындзинæдтæ базоныныл, цæмæй рæзой æнæниз æмæ райзæрдæйæ. Алы хатт дæр сæхи зæрдиагæй бацæттæ кæ-нынц иу кæнæ иннæ бæрæгбонмæ æмæ рауайы цымыдисон æмæ зæрдæмæдзæугæ. Ахæм мадзæлттæ ивгъуыд аз дзæвгар ауагътой, ныр та сабиты цæттæ кæнынц мадзал ауадзынмæ ирон адæмы уарзон хъæбул Хетæгкаты Къостайы райгуырды боны цытæн.
Рæвдауæндоны фарон уыд 65 сабийы, уыдонæй цалдæрæн уыцы аз уыд ра-уагъдон изæр æмæ уый дæр уагъд æрцыд бæрзонд æмвæзадыл, алчи дæр дзы баззад райгондæй. Абоны бонмæ уал дзы ис 53 сабийы, фæлæ Джиоты чызджы ныхæстæм гæсгæ, сæ нымæц фæфылдæр уыдзæн фæстæдæр. Сабитæ сæм ис канд Дменисы хъæуæй нæ, фæлæ ма Сатихъарæй – 13, Ортъеу æмæ Хелцуайæ – фæйнæ дыууæ, Уæрæсейы æфсæдты заставæйæ – 6 æмæ афтæ дарддæр. Ныртæккæ дзы ис æртæ къорды – кæстæр, астæуккаг æмæ хистæр къордтæ. Ахуырады министрад сын 10 бонæн бацæттæ кæны меню æмæ уымæ гæсгæ цæттæ кæнынц хæринаг, хæрын та сын кæнынц бон æртæ хатты.
Рæвдауæндоны хъомылгæнджытæ нæ рæзинаг хуртимæ цæстуарзон куыст кæй кæнынц, сæ зонындзинæдтæ сын æнæв-гъауæй кæй амонынц, уый тыххæй сты раззагдæрты рæнхъыты. Уымæн æвдисæн у, амæйразмæ республикæйы рæвдауæн-дæтты ‘хсæн цы конкурс ауагъдæуыд, уым сæхи кæй равдыстой аккагæй æмæ бацахстой дыккаг бынат, хорзæхджын æрцыдысты дыккаг къæпхæны дипломæй. Хъомылгæнæджы арфæйаг куыст æххæст кæнынц Æрсойты Маринæ, Лолоты Вандæ, Кокойты Заринæ, Куымæридтаты Виолет-тæ, Габойты Фатимæ æмæ Цæлыккаты Лаурæ. Уыдонæй алчи дæр йæ куыст уарзы, кæсы йæм бæрндзинады цæстæй æмæ сæ буц æмæ сæрыстыр сты нæ рæзгæ хуртæ.
Хуыбиаты Н.
Comments are closed, but trackbacks and pingbacks are open.