Ручъы тъунелæн йæ хуссарварс цы галерея ис, уый 26-æм августмæ, Хуссар Ирыстоны Паддзахадон Хæдбардзинад банымайыны бæрæгбонмæ хъуамæ реставраци æрцæуа. Ныртæккæ уым цæуы хæрзарæзтадон куыстытæ, æххæст сæ кæны Паддзахадон унитарон куыстуат «ЮгОсетИнвестСтрой». Нырма уал галереяйы мидæгæй æххæст æрцыд фидаргæнæн куыстытæ. Галереямæ бацæуæны арæзт æрцæудзæн дыууæ мæсыджы рагон националон стилыл. Мæсгуытæ цæмæй бæстон арæзт æрцæуой, уый тыххæй Цæгат Ирыстон-Аланийæ хуынд æрцыд зынгæ реставратор Уазæгты Мурат.
«Нæ фыдæлтæ фидæрттæ æмæ гæнæхтæ амадтой иууыл бæрзонддæр бынæтты. Уымæн та хъуыд хъару æмæ хъуыды. Абонау сæ ног технологитæм гæсгæ нæ арæзтой. Арæзтады сусæгдзинæдтæ баст уыдысты дуртæ раст амайыныл. Арæх фидæрттæ æмæ мæсгуытæ амадтой ахæм æнахуыр бынæтты, кæцыранмæ адæймаджы къах не ‘фтыд. Абон дæр фембæлæн ис стыр дуртæй амад мæсгуытыл, уыдон амайынæн дæр сæхи сусæгдзинæдтæ ис. Æз мæсгуыты арæзтадмæ мæ чысылæй фæстæмæ цымыдис кодтон, тынг бирæ литературæ бакастæн. Ныртæккæ цы арæзтадыл кусæм, уый нывæзтмæ гæсгæ хъуамæ фæуæм августы 26-æм бонмæ, хæдбардзинады бæрæгбон куы нысан кæнæм, уæдмæ. Фæлæ æз афтæ хъуыды кæнын æмæ бирæ раздæр фæуыдзыстæм куыстытæ», – зæгъы Мурат.
УАЗÆГТЫ Марфа
