ЦХИНВАЛЫ ГОРÆТЫ АДМИНИСТРАЦИЙЫ СÆРГЪЛÆУУÆГИМÆ
Президент фембæлд горæт Цхинвалы администрацийы сæргълæууæг Хуыгаты Ромеоимæ. Фембæлды рæстæджы дзырд цыд Хуыбылты Валерийы номыл улæфæн парк æмæ Ногдзауты парчы хæрзарæзтады фарстатыл.
Хуыгаты Ромео Президентæн радзырдта дыууæ парчы хæрзарæзтады фæдыл проектты тыххæй. Базонгæ йæ кодта, цытæ саразынмæ хъавынц, уыдæтты тыххæй.
Горæты мэр банысан кодта, куыст кæй цыдис бæстыхæйтты агъуыстытæ раивыныл, афтæ ма тагъд рæстæджы цалдæр уынгыл дзыхъхъытæ кæй сраст кæндзысты, уыимæ иумæ ма къорд бæстыхайы алыварс территори кæй схæрзарæзт кæндзысты, уыдæттæ.
«Инвестицион программæйы фæлгæтты цалцæггæнæн куыстыты рæстæджы аразджытæн проблемæ æвзæрын кæнынц æнæзакъонон арæзтæдтæ. Арæх уыцы арæзтæдты хицæуттæ æрбавдисынц арæзтад саразыны бары тыххæй документтæ, фæлæ куыд рабæрæг вæййы, афтæмæй уыцы гæххæттытæ рай-сынц æнæзакъонæй», – загъта Хуыгаты Ромео.
Фембæлды рæстæджы уынаффæ цыд цæрæнуатон къамисы куысты фæдыл, сæрмагондæй та дзырд цыд, документтæ раттынæй цæрæнуат дих кæныны онг куысты процессы тыххæй.
АХУЫРАД ÆМÆ ЗОНАДЫ МИНИСТРИМÆ
Президент Гаглойты Алан фембæлд ахуырад æмæ зонады министр Лолаты Асланимæ. Министр Президентæн радзырдта, ахуырадон уагдæттæ ног ахуыры азмæ куыд цæттæ цæуынц, уый тыххæй. Загъта, зæгъгæ, куыд горæты, афтæ республикæйы районты хъæууон скъолаты дæр цæуынц цалцæггæнæн куыстытæ. Банысан кодта, æппæт ахуырадон уагдæттæ дæр ног ахуыры азы райдианмæ цæттæ кæй уыдзысты.
Министр радзырдта, ахуырадон уагдæтты ахуыргæнджытæ æмæ къухдариуæггæнджыты квалификаци фæбæрзонддæр кæныны тыххæй мадзæлттæ куыд æххæст цæуынц, уый тыххæй дæр.
«Аттестацион мадзæлттæ кæронмæ бахæццæ сты, фæстиуæгон документтæ куы райсæм, уæд ратдзыстæм æххæст информаци», – загъта Лолаты Аслан æмæ дарддæр бамбарын кодта, зæгъгæ, ног ахуыры азы райдианæй аттестацийы хъуыддагмæ ногæй æркæсын бахъæудзæн.
Йæ рады Президент банысан кодта, зæгъгæ, йæм бирæ фарстатæ æмæ хъæстытæ кæй æрбацыд аттестацийы фæдыл, уымæ гæсгæ ахуыргæнджытæ æмæ ахуырадон уагдæтты къухдариуæггæнджытимæ иумæ бакусын хъæуы ацы мадзалы æнтыстджын реализацийы фарстатыл.
Паддзахады сæргълæууæг хъусдард аздæхта республикæйы ахуырадон уагдæттæн Ирыстоны историйы ахуыргæнæн чиныг бацæттæ кæныны фарстмæ.
Лолаты Аслан куыд банысан кодта, афтæмæй республикæйы адæммæ æмæ Парламентмæ Президенты Ныстуаны фæлгæтты цы хæслæвæрдтæ раттæ-уыд, уыдоныл иумæ кусынц Ахуырады министрад æмæ зонадон-иртасæн институт.
«Ахуыргæнæн чиныджы макет арвыстам Цæгат Ирыстонмæ зонадон æвзагæй йæ педагогон æвзагмæ ратæлмац кæныны нысанæн, цæмæй ахуыргæнинæгтæ æнцондæрæй æмбарой æрмæг. Декабры чиныг æрвыст æрцæудзæн Ахуырады министрадмæ, цæмæй йемæ базонгæ уа педагогон æмæхсæнад», – загъта министр.
Президент министрæн бахæс кодта, цæмæй чиныджы мидисимæ базонгæ уой Парламенты профилон комитеты уæнгтæ дæр, æмæ фидæны ма æвзæрой проблемон моменттæ.
Лолаты Аслан ма Президентæн радзырдта «Ахуырады закъонмæ» ивындзинæдтæ бахæссыны тыххæй. Дзырд цæуы, ныййарджытæ цы æхцайы фæрæзтæ фембырд кæнынц, уый цæмæй закъонон уа, уый тыххæй.
