Хуссар Ирыстоны Национ банг 2021 азы рауагъта цыппар зæрдылдарæн монетæтæ 25 зарин номиналимæ, хъусын кæны финансон уагдоны сæргълæууæг Джиоты Жаннæ.
«2021 азы уагъд æрцыд 4 æвзист зæрдылдарæн монетæйы, композитор Хаханты Дудары райгуырдыл сæдæ азы сæххæсты, нывгæнæг Ту-гъанты Махарбегы райгуырдыл 140 аз сæххæсты, Хуссар Ирыстоны паддзахадон университетыл 90 азы сæххæсты æмæ горæт Цхинвалыл 1760 азы сæххæсты боны цытæн. Фæстаг монетæйыл бакуыста уæрæсейаг нывгæнæг Дмитри Федоров, иннæ æртæ монетæйы эскизты автор та у Хуссар Ирыстоны адæмон нывгæнæг Цхуырбаты Тамерлан», – загъта Джиоты чызг.
Йæ ныхæстæм гæсгæ, иу монетæйы аргъ у 4700 сомы, æмæ йæ балхæнæн ис Национ бангы.
«Монетæты иууылдæр æлхæнджытæн сæ бон у бæлхынын, нæ университеты ныв кæцытыл ис, уыдонæй дарддæр. Уыдон уæй кæнынмæ лæвæрд æрцæудзысты презентацийы фæстæ, кæцы уагъд æрцæудзæн Хуссар Ирыстоны паддзахадон университеты», – банысан кодта уый.
Джиоты Жаннæ ма банысан кодта, зæгъгæ, Хуссар Ирыстоны зæрдылдарæн монетæтæ æлхæнынц зæрдиагæй.
«Республикæйы нæм ис бирæ коллекционертæ, æмæ мах ног заринтæ куы рауадзæм, уæд сæ уайтагъд балхæнынц. Ис монетæты ахæм хуызтæ, кæцытæ нæм баззадис цъус æмæ сæ мах нал уæй кæнæм», – загъта бангы правленийы сæргълæууæг.
2013 азæй Национ банг рауагъта 27 сыгъзæрин æмæ æвзист монетæйы, зынгæ адæм æмæ нысаниуæгджын бонты цытæн.
Comments are closed, but trackbacks and pingbacks are open.