Æнæниздзинад хъахъхъæныны æмæ социалон рæзты министр Наниты Сослан æмæ йæ ног сынсангонд хæдивæг Александр Приходько 17-æм июны хуынд æрцыдысты «Спутник»-ы пресс-центрмæ.
Наниты Сослан журналисттæн радзырдта йæ куыст, йæ архайды сæйрагдæр нысан кæй уыдзæн рынчынтæн гъæдджын медицинон æххуыс. Ахсджиагыл нымайы квалификациджын кадртæй нæ республикæйы медицинон уагдæтты ифтонг кæнын. Йæ ныхæстæм гæсгæ сæйраг дохтыртæ нысан цæудзысты конкурсы фæстиуæгмæ гæсгæ. «Конкурсмæ йæ гæххæттытæ бавдисын æмæ йæ квалификаци бахъахъхъæныны бар уыдзæнис алкæмæн дæр. Сæрмагонд критеритæм гæсгæ æвзæрст цæудзæн медицинон уагдонæн сæйраг дохтыр. Конкурс та уыдзæн æргом, цæмæй конкурсантты æрдыгæй мацы претензитæ уа. Конкурс йæхæдæг дих æрцæудзæнис æртæ этапыл. Фыццаг этапы министрады хæс уыдзæн иууыл хуыздæр медицинон кусæджы сбæрæг кæнын. Уый фæсттæ йын фадат ратдзыстæм экономикæ æмæ менеджменты уæлдæр скъолаты медицинæйы сферæ-йы сахуыр кæнынæн. Уыдон уыдзысты цыбыр курсытæ. Сæрмагонд тестытæ чи рацæуа, уый та æрвыст æрцæудзæн ногæй ахуыркæнынмæ. Ахуыры рæстæджы медицинон уагдоны сæйраг дохтыры бынатмæ претендентæн хъуамæ йæ бон уа проект саразын, кæцы уагдонмæ цæуы уым абоны уавæрты. Кæд æмæ ацы къæпхæнтæ рацæуы, уæд цалдæр мæйы æмгъуыдмæ нысан æрцæудзæнис сæйраг дохтырæй. Кæд æмæ рæстæгмæ снысангонд сæйраг дохтыр эффективонæй реализаци кæна йæ проект, уæд нысан æрцæудзæн сæйраг дохтырæй», – дзырдта Æнæниздзинады хъахъхъæныны министр.
Министр ма куыд загъта, афтæмæй уый кæд æрæджы нысангонд æрцыд министрæй, уæд-дæр цыбыр рæстæгмæ æрзылд æмæ сахуыр кодта республикæйы уæвæг медицинон уагдæт-ты куыст. Цхинвалы горæтон æмæ районон поликлиникæты хайадты архайд, медицинон кусджытæ стационарон уавæрты рынчынтæн куыд хос кæнынц, дохтыртæ æмæ иннæ медперсонал штаттæм гæсгæ цас сты æмæ сæ куыстмызд цас у. Министры хъуыдымæ гæсгæ медицинон кусæджы профессионалон зонындзинæдтæ æмæ арæхстдзинад хъуамæ лæууой иууыл уæлдæр æмвæзадыл.
Пресс-конференцийы ма дзырд цыд республикæйы инвалид сывæллæтты ‘хсæн цы диспансеризаци уагъд æрцыд, уый тыххæй дæр. Ацы фæдыздæхты дарддæр дæр цæудзæнис куыст. Медицинон уагдæттæй иуæй иуты дохтыртæ кæй нæ фаг кæны, уый æмбаргæйæ, хуынд цæудзысты æндæр рæттæй хъæуæг специалисттæ. Рафæлгъауын хъæуы онкологи æмæ сæкæрнизæй рынчынты фæфылдæры аххосæгтæ. Цæмæн фылдæр кæнынц уыцы низтæй рынчынтæ уый бындуронæй сахуыр кæнгæйæ, æнцондæр уыдзæн профилактикон куыст кæнын. Дохтыр лæмбынæгдæр йæ хъус куы дара пациенты проблемæтæм, цæмæй низтæ сæ райдианы иуварс цæуой, уæд æнæмæнг фæхуыздæр уыдзæн медицинон лæггæдты гъæд. Нормативон-барадон базæйыл дзургæйæ та загъта, инвалидты социалон æгъдауæй бахъахъхъæныны проектыл бакусын кæй хъæуы.
Хостæй ифтонг кæныны фарст абон ахсджиаг кæй у æмæ уыцы фæдыздæхты бæстон кусын кæй хъæуы, уый æмбæрстгонд у, ивгъуыд азы льготон хостæ чи исы æмæ рынчындæттæ æнæ хостæй кæй аззадысты, уы-мæй. Медицинон уагдæттæ æмæ рынчынтæй æнæмæнгхъæуæг хостæй ифтонг чи цæуы – иммунологон препараттæ, реактивон æмæ гемодиалезы ифтонггæрзтæ хъуамæ алыхатт дæр уа фæсауæрцтæ. Онкологон æмæ сæкæрнизæй рынчынтæ фылдæр кæй кæнынц, уый ма хъуамæ бандава рынчындоны лæггæдтыл. Хатырон категорийы æмбæстæгтæ социалон æххуыс кæмæ æмбæлы, æндæр рынчындæттæм кæй æрвитынц, уыдон æп-пындæр ма хъуамæ фæтыхсой, сæ гæххæттытæ арæзт хъуамæ цæуой афоныл æмæ профессионалонæй. Иуæй-иу медицинон уагдæтты фаг нæй информацион тыгъдадимæ бастдзинад. Ацы цухдзинад аиуварс кæнынæн хъæуы фаг æмбæлон техникæ балхæнын. Æппæт ацы фарстатæн дзуапп дæтдзæнис Министры ног снысангонд хæдивæг Александр Приходько.
Ног хæдивæг куыд загъта, афтæмæй ныридæгæн уый уадзы бадзырдтæ Уæрæсейы Федерацийы Æнæниздзинад хъахъхъæныны министрадимæ, цæмæй дохтырты квалификаци фæбæрзонддæр кæныны фарстатæ скъуыддзаг æрцæуой. Дзырд ма цæудзæн дохтыры профессионалон медицинон стаж банымайыны фарстатыл дæр.
УАЗÆГТЫ Марфа
Comments are closed, but trackbacks and pingbacks are open.