Уалдзæджы æрбалæудимæ брондоны проблемæ скарздæр вæййы, адæм сæ алфæмблай сыгъдæгдзинадыл кæй нæ аудынц, уый аххосæй.
Горæты сæйраг уынгтæ кæд æфснайд цæуынц, уæддæр горæтгæрон æмæ хъæуты алывæрсты брæттæ катайдзинад æвзæрын кæнынц.
Горæтмæ хæстæг цы хъæутæ ис, уым фенæн ис, хъæугæрæтты цæрджытæ брондæттæ куыд сарæзтой. Уыдонмæ ивæрзынц фос æмæ хæрынц, хæрынæн чи нæ бæззы, ахæм брæттæ дæр.
Уавæр афтæ у Гафезы уынджы районы дæр. Ам цы арх ис, уым æмбырд кæны алыгъуызон брæттæ. Фæстаг азты уый æрвылаз дæр ныссыгъдæг кæнынц мелиора-цийы кусджытæ, фæлæ та дзы ногæй брондон сæвзæры.
Гудзабары хъæуы администрацийы сæргълæууæг Дыгъуызты Леван куыд зæгъы, афтæмæй «Цæрджытæ сахуыр сты ацы архы донæй æнæзакъонон брондæттæ аразын. Броны асыччытæ сæм хæстæг сты, уæддæр нæ ауæрдынц къанауы сæ брон калыныл. Цæйнæфæлтау уæлдай къахдзæф саразой, фæлтау сæ броны хызын фехсынц архмæ. Зымæджы бонты уыдон митæй тынг нæ фæзынынц, фæлæ куыддæр уалдзæг æрбалæууы, афтæ уырдыгæй цы æнуд тæф фæцæуы, уый æнхъæвзы дардмæ. Ардæм брон чи калы, уыдон хъуамæ цæуой иваргонд», – зæгъы Дыгъуызы фырт.
Архы цардуагон брæттæй дарддæр фенæн ис арæзтадон брæттæ дæр. Хъæдырмæгæй райдайгæйæ суанг æфсæйнаджы цъæлты онг. Донбылгæрон цæрджытæ хъæдæрмæджы га-базтæй цы гаражтæ сарæзтой, уыдон дæр тынг фыдуынд кæнынц алфæмблай.
Мелиорацийы комитеты сæрдар Хуыгаты Вадимы ныхæстæм гæсгæ проблемæйæ фервæзæн ис æрмæстдæр афтæ: «Архы ныппарын хъæуы доныхæтæл æмæ йæ уæлейæ сыджытæй хъæуыц байдзаг кæнын. Уыцы хъуыды æз иу æмæ дыууæ хатт нæ загътон уæлдæрлæууæг органтæн, фæлæ дзуапп нæма райстон», – зæгъы Хуыгайы фырт.
Гудзабары хъæуы цæрджытæ сæхæдæг куыд зæгъынц, афтæмæй ам фæзынынц стыр мыстытæ æмæ цæуынц хæдзæрттæм дæр.
УАЗÆГТЫ Марфа
Comments are closed, but trackbacks and pingbacks are open.