Проблемæ аскъуыддзаг уыдзæн рæстæгмæ нæ, фæлæ кæронмæ

Президент Бибылты Анатоли фембæлд республикæйы амалиуæггæнджытимæ, кæцытæн проблемон у «Дæллаг Зæрæмæгы» таможнæйыл Хуссар Ирыстонмæ хæлцадон æмæ сæудæджерадон товартæ æрбаласын.

Фембæлды хайад райстой Хицауады Сæрдары хæдивæг, Экономикон рæзты министр Бекъойты Геннади, Президенты Администрацийы къухдариуæггæнæджы фыццаг хæдивæг Джуссойты Алан, Паддзахадон таможнæйон комитеты сæрдар Цхуырбаты Мурат, Паддзахадон ветеринарон æмæ фитосанитарон хъусдард «Югоссельхознадзор»-ы службæйы къухдариуæггæнæг Мæргъиты Алан.

Фембæлды уынаффæ цыд, ацы проблемæмæ цы фарстатæ æмæ домæнтæ æркодтой, уыдоныл, æмæ сæ куыд аскъуыддзаг кæнын хъæуы, уыдæттыл.

Бæрæг куыд у, афтæмæй республикæмæ уæзтæ æрбаласыны проблемæ 10 азы дæргъы кæд аскъуыддзаг кæнынц рæстæгмæ, уæддæр сæвзæры æрвылбон дæр.

Амалиуæггæнджыты ныхæстæм гæсгæ, сæ таможнæйы, Таможнæйон цæдисы нормæтæм гæсгæ сæ товарты срегистраци кæнын кæй æрдомынц, уый сын æвзæрын кæны проблемæтæ, уыимæ иумæ рæзынц базары æргътæ дæр.

«Уæзтæ нæ уадзынц æнæ регистрацийæ. Раздæр-иу нæ фæхатыр кодтой æмæ-иу срегистраци кодтой уæзты иу хай, иннæ хай та-иу рауагътой æнæ регистрацийæ. Ныр та товары алы хуызæн дæр домынц хицæн деклараци. Уæз фылдæр куы уа, уæд домынц, цæмæй сæ бынаты равдæлон кæнæм. Ис ма ахæм товартæ, кæцытæн нæй документтæ, бирæ товартæн та сертификат ссарæн нæй», – радзырдтой амалиуæггæнджытæ.

Амалиуæггæнджытæм байхъусгæйæ, Президент банысан кодта, зæгъгæ, зонгæ у æппæт проблемæтимæ дæр, æмæ сын ныфс бавæрдта, тагъд рæстæджы фарст скъуыддзаг кæй æрцæудзæн.

«Æмбæлон сертификат кæй нæ дæттынц, товартæ базары кæй æлхæнут, уый тыххæй, афтæ ма стыр партитæ кæй не ‘лхæнут кæнæ санкцитæй кæй тæрсынц, уый сæраппонд стыр куыстуæттæ уемæ кæй нæ кусынц, уый мæнæн зындгонд у. Æз фыстæг арвыстон  Уæрæсейы Федерацийы Экономикон рæзты министрадмæ конкретон домæнимæ, афтæ хъуыды кæнын, æмæ кæрæдзи бамбардзыстæм.

Нæ уæрæсейаг коллегæтимæ иумæ махæн нæ къухы бафтдзæн проблемæ рæстæгмæ нæ, иу афæдзмæ нæ, фæлæ кæронмæ аскъуыддзаг кæнын», – загъта Президент.

Бибылты Анатоли ма загъта, зæгъгæ, «амалиуæггæнджытæ æхсæнады размæ кæнынц», æмæ Хицауады Сæрдары хæдивæг, Экономикон рæзты министрæн бахæс кодта, цæмæй алыварсон æххуыс кæна амалиуæггæнджытæн, æрвылбонон проблемæтæ скъуыддзаг кæныны хъуыддаджы.