Евразийаг экономикон цæдисы паддзахадты сæргълæуджытæн æнæрадон фембæлд уыд видеоконференцийы режимы. Хайад дзы райстой УФ-йы Президент Владимир Путин, Сомихстоны премьер Никол Пашинян, Белорусы лидер Александр Лукашенко, Казахстаны президент Касым-Жомарт Токаев æмæ Хъыргъызтаны сæргълæууæг Сооронбай Жээнбеков. Евразийаг экономикон цæдисы Уæлдæр советы æрвылазон рабадт хъуамæ уагъд æрцыдаид 19-æм майы Минскы, фæлæ плæнттæ фæивтой коронавирусы эпидемийы тыххæй. Уымæн æмæ коронавирус ныридæгæн негативонæй бандæвта æппæт дунеон экономикæйыл. Евразийаг экономикон цæдисы лидертæ сæ иумиаг хъусынгæнинаджы банысан кодтой коронавирусы пандемийы уавæрты ацы бæстæты æмбæстæгтæн баххуыс кæныны ахсджиагдзинады тыххæй. Афтæ ма Цæдисы паддзахадты сæргълæуджытæ равдыстой фæндвидардзинад иумиаг тыхтæй ацы тæссагдзинады ныхмæ фæлæууыны тыххæй.
Владимир Путин куыд банысан кодта, уымæ гæсгæ пандемийы ныхмæ тохы методтæ ма хъуамæ æркæной бæстæты ‘хсæн инвестицитæ æруромынмæ. Абон ахсджиаг у, дæргъвæтин азты дæргъы цы партнерон æмæ базарадон ахастытæ сырæзт, уыцы бастдзинæдтæ бахъахъхъæныныл ахъуыды кæнын. Товарты, лæггæдты, капиталты æмæ кусæгон тых сæрибарæй цæуыны тыххæй фондз паддзахады лидертæ бадзырдтой æхсæз азы размæ, Евразийаг экономикон цæдис аразгæйæ. Уæд ничи ахъуыды кодтаид, ацы плæнтты фæлгæтты сæ ног тæссаг низы ныхмæ тох кæнын бахъæудзæн, ууыл. Цæмæй эпидемийы рæстæджы бæстæты ‘хсæн экономикон барьертæ ма сырæзой, ууыл уынаффæ кодтой, сæйраджыдæр, Цæдисы бæстæтæ.
«Пандемийы ныхмæ тохы методтæ хъуамæ уой пропорционалон. Ныридæгæн бакуыст хъуамæ æрцæуой системон характеры мадзæлттæ, кæцытæ фæахъаз уыдзысты дарддæры экономикон рæзтæн уавæртæ саразынæн. Дзырд цæуы, сæрмагондæй, таможнæйон æмæ хъалонты процедурæты фадыджы процесс фæактивондæр кæныны тыххæй», – загъта Владимир Путин.
Логистикæ у фыццаг рады паддзахадты ‘хсæн товарты æрзылд. Æрлæудзæн базарад – райдайдзæн экономикæ хæлын. Александр Лукашенко фæндон бахаста сæрмагонд транспортон къæлидортæ саразыны тыххæй, кæцытæ иуæрдыгæй сифтонг кæндзысты вирус ма апарахат кæнынæн æмбæлон хъахъхъæныны уавæртæ, иннæмæй та фадат ратдзысты уæзтæ ласынæн. Ахæм системæ ныридæгæн бафæлвæрдæуыд Белорусы. «Мæнмæ афтæ кæсы æмæ бæстæты ‘хсæн цахæмдæр транспортон къæлидор хъуамæ хъахъ-хъæд æрцæуа æрмæст Белорусы нæ, фæлæ дæр Сомихстонмæ, Хъыргъызтанмæ Уæрæсе æмæ Казахстаныл сбæрæг кæнын. Зæгъæм, хъæуы сфидар кæнын маршруттæ, кæцыты банысан кæнын хъæуы æрлæууæн пункттæ автотранспорты æртаг ныккæнын æмæ шофырты баулæфын кæныны тыххæй. Ахæм пунктты хъæуы санитарон-эпидемиологон мадзæлтты хицæн режим бакæнын Белорусы куыд у, афтæ», – загъта Александр Лукашенко.
Фондз бæстæйы лидертæ ма уынаффæ кодтой, зæгъгæ, экономикон бастдзинæдтæ хъахъхъæныны тыххæй иумиаг тыхтæй архайгæйæ ма паддзахадтæн æнæмæнгхъæуæг у æппæт Евразийаг цæдисы æмбæстæгты æнæниздзинад бахъахъхъæнын сифтонг кæнын æмæ уыдон та сты 190 милуан адæймаджы бæрц. Фыццаджыдæр дзырд цæуы медицинон то-варты тыххæй. «Евразийаг экономикон цæдисы территоримæ социалон нысаниуæджы товарты – хæлцадон продукттæ, хостæ, медицинон ифтонггæрзты импорты тыххæй баконд æрцыд «цъæх» къæлидор. Фæлæ ацы практикæ фæуæрæхдæр кæныныл хъæуы ахъуыды кæнын. Ахæм товартæ сæрибар сты таможнæйон фиддонтæй, фæхуымæтæгдæр æмæ фæтагъддæр сты æмбæлон таможнæйон процедурæтæ», – загъта Уæрæсейы Президент.
«Социалон нысаниуæджы товартæ самал кæныны тыххæй æнæхъæн дунейы цымыдисдзинад хынцгæйæ, æртыккаг бæстæтæн товартæ ауæй кæнын гæнæн ис суа хорз бизнес, фæлæ Цæдисы нысæнттæй сæ иу у нæ бæстæты æмбæстæгты царды гъæдыл аудын. Уымæ гæсгæ æртыккаг бæстæтæн гуманитарон æххуыс бакæныны фарстытæм æркæсыны рæстæджы, хъæуы, фыццаджыдæр, Цæдисы мидæггагон базар ацы товартæй сифтонг кæныны приоритет хынцын», – загъта Белорусы президент.
«Цæдисы паддзахадты хицауад бадзырдтой æртыккаг бæстæтæм ахсджиаг медицинон препараттæ æмæ техникæ, социалон нысаниуæджы товартæ ласыны тыххæй иумиаг мадзæлттæ исыны тыххæй. Ома, цæдисон базары ахæм товарты хъуагдзинад ма бауадзын, кæд æмæ кæрæдзимæ гуманитарон æххуыс баласыны æнæмæнгхъæуындзинад сæвзæра, уæд», – фехъусын кодта Владимир Путин.
Ныртæккæ фыццаг рады хъæуы коронавирусы ныхмæ вакцинæ саразын. Йæ бакусыныл архайынц раззагон паддзахадтæ, кæцытæм ис æппæт æнæмæнгхъæуæг технологон æмæ зонадон бындур. Уæрæсе дæр ис уыдоны нымæцы. «Уæрæсе тынг активонæй кусы хостыл, сæрмагонд фæрæзтыл пандемийы ныхмæ тох кæныны тыххæй. Æцæгæйдæр куыст цæуы хорз. Ныфс мæ ис æмæ æввахс рæстæджы нæ бон кæй суыдзæн сымах райсгæ фæстиуджытимæ базонгæ кæнын», – загъта Путин.
Гæнæн ис æмæ уый фæдыл ног хабæрттæ фæзына 19 маймæ. Ацы бон, план куыд уыд, афтæ хъæуы Евразийаг цæдисы бæстæты лидерты фембæлд ауадзын. Уыимæ Белорусы президент фæндон бахаста, цæмæй фембæлд видеоконференцийы форматы нæ, фæлæ уагъд æрцæуа Минскы иу стъолы фарсмæ бадгæйæ.
Евразийаг экономикон цæдисы бæстæтæ кусæгон фембæлды хатдзæгтæм гæсгæ райстой иумиаг хъусынгæнинаг, цыран сæйраджыдæр дзырд цæуы пандемийы ныхмæ тох кæнын æмæ экономикон рæзт бахъахъхъæныны тыххæй.
Æрмæгыл бакуыста
ДЖИОТЫ Екатеринæ
Comments are closed, but trackbacks and pingbacks are open.