РХИ-йы Президент Бибылты Анатоли Зард æмæ кафты паддзахадон ансамбль «Симд»-ы коллективы базонгæ кодта ног директоримæ. Уый у культурæйы архайæг, нывгæнæг Харебаты Ацæмæз.
Фембæлды рæстæджы паддзахады сæргълæууæг коллективмæ æрсидт æмуд, æнгом куыстмæ.
«Ансамблы коллектив сты нæ нацийы, нæ культурæйы минæвæрттæ. Сымах хъуамæ цæвиттон уат рæзгæ фæлтæрæн. Æмæ уæм сидын æнгом куыстмæ. «Симд» хъуамæ уа ахæм æмвæзадыл, кæцыйы аккаг сты нæ адæм», – загъта уый.
Бибылты Анатоли бузныг загъта Æлборты Фатимæйæн, кæцы æрæджыйы онг рæстæгмæ æххæст кодта «Симд»-ы директоры хæстæ.
«Тынг бирæ сарæзта Фатимæ Зауыры чызг. Уый хауы цалцæг кæнынмæ, хъæрмадмæ æмæ бирæ æндæртæм, кæцытæ нæ фаг кодтой бæстыхайæн æмæ коллективæн иумæйагæй сисгæйæ», банысан кодта Президент.
Уыимæ иумæ, ног директоры сын зонгæ кæнгæйæ, Бибылты Анатоли фехъусын кодта, зæгъгæ, ансамблы административон хайы сæргъ хъуамæ лæууа къультурæйы къабазы кусæг адæймаг, кæцы у авторитетон æхсæнады, у пат-риот æмæ æвдисы бæрнон ахаст.
«Харебаты Ацæмæзы фæлтæрддзинад, йæ патриотизм æмæ хъуыддагмæ йæ ахаст ныфс дæттынц, æнтысгæйæ кæй кусдзæн йæ ног бынаты æмæ скъуыддзаг кæй цæудзысты ансамблы разылæууæг хæстæ», – банысан кодта уый.
Харебаты Ацæмæз йæ рады бузныг загъта, ахæм æууæнк ыл кæй бафтыдтой, уый тыххæй.
«Æз ацы бынаты ног адæймаг дæн æмæ мæ ныфс ис коллективы фарсхæцынадæй. Сымах æххуыс кæндзыстут мæнæн, æз та гæнæн уæвгæйæ, аразынæн æппæт дæр. Ныфс мæ ис, кæрæдзийы кæй бамбардзыстæм», – загъта уый.
Кæронбæттæны ансамблæн лæвæрд æрцыдысты ног комфортабелон дыууæуæладзыгон автобусы дæгъæлтæ гастролты цæуынæн.
Паддзахады сæргълæууæг банысан кодта, зæгъгæ, автобус самал кæнынæн баххуыс кодтой æхсæнадон организаци «Самарæйы областы адæмты цæдисы» сæрдар Хуыгаты Ростислав, УФ-йы Паддзахадон Думæйы депутат Таймæзты Артур, компани «Южный сад»-ы дирекци, РХИ-йы Национ банг æмæ æндæртæ.
Comments are closed, but trackbacks and pingbacks are open.