РХИ-йы Президент Тыбылты Леонид фембæлд Галаты Барисы номыл Хуссар Ирыстоны зард æмæ кафты паддзахадон ансамбль «Симд»-ы коллективимæ.
Кусджытæн раарфæ кæнгæйæ, паддзахады сæргълæууæг банысан кодта, зæгъгæ, «Хуссар Ирыстоны зард æмæ кафты паддзахадон ансамбль «Симд» у нæ культурæйы бындур, æхсæнадон рæзты сæйрагдæр фактортæй иу. «Симд» ссис нæ республикæйы исад, ансамблы сфæлдыстады æвдыст æрцыд нæ адæмы дуг æмæ национ характерондзинад».
Президент радзырдта, зæгъгæ, РХИ-йы паддзахадон æдасдзинады комитеты кусæг уæвгæйæ, уый йæ хъус дардта культурæйы фадыгмæ, æмæ хорз зонгæ у коллективы архайдимæ.
«Хъыгагæн, бахъæуы банысан кæнын уый, æмæ Советон Цæдисы ныппырхы фæстиуджытæ æппæрццагæй кæй бандæвдтой культурæйы фадыгыл дæр. Фæлæ рæстæджытæ ивынц, иу дуг ивы иннæйы, æмæ, нæ рады, мах та хъуамæ размæ цæуæм, æмæ хъæуы равзæрст стратегийыл, рæзты стратегийыл хæцын. Бузныг уын дзурын Фыдыбæстæйы раз уæ лæггæдты тыххæй. Хуссар Ирыстоны цы прогресс фиппайдæуы, уый нын нæ зæрдæтæ рухс кæны», – банысан кодта уый.
Æнтыстытæ æмæ плæнтты тыххæй паддзахады сæргълæууæджы базонгæ кодта ансамблы аивадон къудариуæггæнæг Гаглойты Ростик. Уый раарфæ кодта бæстæйы къухдариуæгадæн, йæ сæргъ Президент Тыбылты Леонид, афтæмæй, афтæ ма Культурæйы министрадæн дæр се ‘ххуыс æмæ фарсхæцынады тыххæй.
«Организаци æрцыд гастролон тур Цæгат Кавказмæ, кæцы фæцис аншлагæй, æлхæд æрцыд национ уæлæдарæс, хицæн æрцыдысты æхцайы фæрæзтæ транспортон фæрæзтæ сцалцæг кæныны тыххæй, æмæ æппæт уыдон къухты бафтыдысты Президенты æххуысы руаджы. Æппæт коллективы номæй дын дзурæм бузныджы ныхæстæ», – загъта Гаглойты Ростик.
Уый фæстæ Тыбылты Леонид байхъуыста, ансамблы кусджытæ цы проблемæтыл æмбæлынц, уыдонмæ. Уыдоны ‘хсæн сты цæрæнуаты, гастролон туртæ сорганизаци кæныны æмæ æндæр проблемæтæ. Афтæ ма коллектив фæндон бахаста ансамблæн академион статус радтыны тыххæй.
«Æнæмæнгхъæуæг æххуыс æрцæудзæн уыцы бинонтæн, кæцытæн нæй цæрæнуатон фæзуат. Ацы азы кæрон эксплуатацимæ лæвæрд æрцæудзысты бирæфатерон хæдзæрттæ, кæцыты уыдзæн 300 фатеры, уыдонæй æртæ мах рахицæн кæндзыстæм паддзахадон ансамбль «Симд»-æн», – банысан кодта Президент.
Уый фидарæй загъта, зæгъгæ, ансамблы гастролон туртæ организаци æрцæудзысты Хъырыммæ æмæ Челябинскмæ. Транспортон ифтонгады тыххæй та загъта, зæгъгæ, «Симд»-æн автобус самал кæныны фарст та хаст æрцæудзæн 2018-2019 азтæн ног Инвестицион программæмæ.
Паддзахады сæргълæууæг ма фæндон бахаста скъола-студитæ бакæныны тыххæй, кæцытæ ахъаз кæндзысты æвзонг фæлтæры æппæтварсон рæзтæн æмæ ансамблы кадртæй баххæст кæнынæн. «Мах дарддæр дæр кусдзыстæм уæ уавæртæ фæхуыздæр кæныныл», – загъта уый.
Гаглойты Ростик Президентæн фехъусын кодта, ансамблы цы резервтæ ис, уый тыххæй. Йæ ныхæстæм гæсгæ, куыст цæуы репертуарыл дæр, афтæ ма фиппайдæуы фæ-сивæды æрбацыд, фæлæ уæддæр карзæй æнкъардæуы зарæггæнджытæй хъуагдзинад. Уый фæндон бахаста квалификаци фæбæрзонддæр кæныны тыххæй специалистты æрбахонын.
Йæ рады, Культурæйы министр Остьаты Мадинæ банысан кодта, зæгъгæ, уый тынг тыхсы бынæттон кадртæ бацæттæ кæныны проблемæйы тыххæй. «Фарстæн анализ саразгæйæ, мах æрцыдыстæм ахæм хатдзæгмæ, зæгъгæ, ацы куысты нæй системондзинад. Хореографион скъола-студийы сæхгæды фæдыл Культурæйы министрады раздæры къухдариуæгады уынаффæ растыл нæ нымайын. Мах тынг тыхсæм скъола-студийы архайд ногæй райдайыныл, æмæ театр ног бæстыхаймæ куы рахиза, уæд ацы фарст скъуыддзаг æрцæудзæн», – фехъусын кодта Остъаты Мадинæ.
Фембæлды кæрон Тыбылты Леонид бахатыд коллективмæ, цæмæй бахъахъхъæной иудзинад æмæ консолидаци ацы бæрнон рæстæджы, кæцыйы мах хъуамæ аккагæй равдисæм нæхи.
«Абон мах стæм вазыгджын уавæры, уымæн æмæ æрæввахс кæнынц Президентон æвзæрстытæ. Алы адæймагæн дæр бар ис иу кæнæ иннæ кандидаты æвварс рахæцынæн, фæлæ æз сидын нæ адæмы иудзинадмæ, æнгомдзинадмæ æмæ консолидаци-мæ уыцы лæппуты нæмтты тыххæй, кæцытæ сæ цард радтой нæ паддзахады хæдбардзинад, сæрибардзинад æмæ фæрныгады тыххæй. Мах ма хъуамæ æруадзæм фондз азы размæйы цаутæ сфæлхатт кæнын, кæцытæ нын не ‘хсæнады æркодтой дихдзинадмæ æмæ æмбæстагон ныхмæлæудмæ. Сидын алкæмæ дæр, цæмæй барадон фæлæгттæй мачи рахиза.
Стабилондзинад, æнгомдзинад æмæ патриотизм сты нæ бæстæйы рæзты нысан. Мах хъуамæ кæронмæ цæуæм ацы фæндагыл», – йæ ныхас балхынцъ кодта Президент.
РХИ-йы Президенты официалон сайт
Comments are closed, but trackbacks and pingbacks are open.