Плиты Николь ныффыста сценари æмæ ссис йæ фыццаг фильмы режиссер. Фильмы хъазы зынгæ актрисæ Ирина Безрукова. Лентæ хуыйны «Ботан». Николæн уый уыд йæ фыццаг фæлтæрддзинад куыд сценари ныффысыны, афтæ ма режиссерон дебюты дæр. Сценарийы равзæрстой æвзонг кинематографистты фестиваль «Хрустальный Источник»-æн. Фильмы ма хайад райстой актертæ Джордж Похомов, Дарья Плунеева æмæ Полина Харькова.
«Цæуыл у фильм? Фильм у ууыл, цæмæй дæ цуры чи ис, уыдоны уарзай æмæ сæ хъахъхъæнай. Уый тыххæй, æмæ хаттæй-хатт кæрæдзи æнæмбарындзинад æркæны уымæ, æмæ мах фæхъыг кæнæм не ‘ввахс æмæ зынаргъ адæймæгты. Афтæ ма хæлæрттæ ссарын афтæ æнцон кæй нæу, иннæтæй куы хицæн кæнай æмæ дæуæн æндæр интерестæ куы уа, ууыл. Тынг ахсджиаг у, цæмæй дæ хъусой. Ууыл, зæгъгæ, алыхатт дæр гæнæн ис тыхтæ æмæ ныхæстæ ссарын фыццаг хатыр ракурыны тыххæй. Уый у хорз кино. Æцæг æргъадтыл. Тынг мæ фæнды, цæмæй мæ кино рауайа æмæ адæмы зæрдæмæ фæцæуа», – ныффыста Николь социалон хызæгты йæ фарсы.
Дыууадæсаздзыд актрисæ зындгонд у публикæйæн фильмты йæ бирæнымæц ролты æмæ сывæллæтты шоуты хайадисты тыххæй. «Фыццаг хатт хайад исын режиссер-сывæллоны кинонывы. Уый у тынг цымыдисон», – загъта Ирина Безрукова
Фестиваль уагъд цыд Ессентукты 8-15 июлы. Хайад дзы райстой сывæллæтты дæс командæйы бæстæйы алы регионты минæвæрттæй. Жюрийы сæргъ лæууыд æвзонг актрисæ æмæ модель Виталия Корниенко. Жюрийы сконды ма уыдысты режиссер Вера Сторожева æмæ Алексей Федорченко. Уыдон иууылдæр скъуыддзаг кодтой конкурсон цыбырметражон фильмты хайадисæг сывæллæтты хъысмæт.
Плиты Николы лентæ райста æртæ сæйраг призы – фæуæлахиз «Главная женская роль», «Лучший режиссер»-ы номинациты, афтæ ма райста фестивалы Гран-при дæр.
Фестиваль уагъд æрцыд культурон инициативæты президентон фонды æххуысы фæрцы.
