Цхинвалы районы администрацийы ахуырады хайад (йæ сæргълæууæг Козаты Олег) 2022-2023 ахуыры азы бакодта бæрæг куыст ахуыры гъæд фæхуыздæр кæныны фæдыл. Хайад йæ куыст æххæст кодта куысты плæнттæ бацæттæ кæныны бындурыл, афтæ ма предметон ахуыргæнджыты демографион зонæнтæ сног кæнынæй. Бацæттæ кодтой гом уроктæ æмæ тематикон мадзæлтты графиктæ, уæлдай хъусдард здæхт цыд æвзонг специалисттæм. Ахуыры азы дæргъы скъолаты уагъд æрцыдысты контролон куыстытæ æмæ уыдон фæстиуджытимæ базонгæ сты иумиагахуырадон уагдæттæ. Ахуырады хайады методисттæ бацæттæ кодтой скъолаты куыст бæрæг кæныны график, уымæн та йæ нысан уыд ахуыры уавæр бæрæг кæнын, базонын ахуыргæнинæгты зонындзинæдтæ, афтæ ма æнæмæнгхъæуæг æххуыс бакæнын ахуыргæнджытæн. Организаци æрцыдысты ахуыргæнджыты квалификаци фæбæрзонддæр кæныны курсытæ. Ахуыры азы ахуыргæнджыты фылдæр хай рацыдысты радон аттестацийы. Банысан кæнын хъæуы хайады аттестацион къамисы уæнгты хорз куыст, уыдон рæстæгыл бацæттæ кодтой ахуыргæнджыты номхыгъдтæ æмæ æппæт æнæмæнгхъæуæг документтæ.
Методисттæ бацæттæ кодтой тесттæ районон предметон олимпиадæйы турмæ, цæмæй рабæрæг уыдаиккой уæлахиздзаутæ дарддæр республикон турмæ. Къласæн æмæ скъолайæн æддейæ куыст у ахсджиаг хай ахуыр-хъомыладон процессæн æмæ уымæ хайады æрдыгæй здæхт цæуы æнæмæнгхъæуæг хъусдард. Хыгъдон рæстæджы æппæт ахуыргæнæн уагдæттæ банысан кодтой ахæм бæрæгбонтæ, куыд «Республикæйы бон», «Национ тырысайы бон», «Ахуыргæнæджы бон», «Ирон æвзаджы бон».
Стыр Фыдыбæстæйон хæстыл 78 азы уæлахизы цытæн фæсивæд сæ ном ссардтой ветерантæн. Скъолаты ауадзгæ мадзæлттæм фæхуыдтой 1989-2008-æм азты сæрибаргæнæг хæсты хайадисджыты. Алы скъолайы дæр ауагъдæуыд «æхсардзинады уроктæ», ахуырдзаутæ хайад райстой «Георгиевскæйы лентæ»-йы акцийы, республикæйы «æнæмæлгæ полчы» сконды цыдысты парады. Дменисы иумиагахуырадон æвзонг æфсæддонты командæйæн сæ къухты бафтыд стыр æнтыст, уыдон республикон æфсæддон-спортивон хъазт «Зарница»-йы бацахстой дыккаг бынат. Ноябрь-декабры мæйты Сывæллæтты сфæлдыстадон галуаны уагъд æрцыд конкурс горæт æмæ районты ахуырдзауты ‘хсæн. Мадзалмæ æрбацæуджытæ банысан кодтой ахуыргæнинæгтæ æмæ сæ ахуыргæнджыты бæрзонд дæсныйад æмæ йæ хайадисджытæн конкурсы организатортæй лæвæрд æрцыдысты грамотæтæ. Уагъд ма æрцыд республикон фыццаг иртасæн куыстыты конкурс хъæууон скъолаты программæйы фæлгæтты ахæм номимæ «Дунейыл афæлгæст», зæгъгæ. Громы скъолайы 10-æм къласы ахуыргæнинаг Куыдзеты Иринæйы куыст хуынд «Хъæуы бынат Хуссар Ирыстоны истори æмæ культурæйы», куыст рауад зæрдæмæдзæугæ æмæ йын лæвæрд æрцыд дыккаг къæпхæны диплом.
Ахуырады хайад æмгуыст кодта æнахъомты фæдыл инспекциимæ. Уыдон систематикон æгъдауæй цыдысты скъолатæм æмæ уагътой хъомыладон-профилактикон ма-дзæлттæ, бæрæг кодтой скъолайон дисциплинæ чи хæлдта, ахæмты æмæ сын сæ ныййарджытимæ уагътой беседæтæ. Дарддæр куыст цыд районы ахуырады системæйы оптимизацийы фæдыл. Ауагъдæуыд оптимизаци æмæ модернизацийы ахуырадон план æмæ чысылкомплектон скъолаты штатон расписани ахæм хыгъдæй, цæмæй ма бахъыгдардæуа ахуыры процессы мидис æмæ гъæд. Тарификацион номхыгъдтæ бацæттæ кодтой æппæт скъолаты дæр.
Бакуыстæуыд зынгсирвæзты нормæтæ бахъахъхъæныныл, уый тыххæй ахуыргæнæн организациты къухдариуæггæнджытæн ауагътой индивидуалон консультацитæ. Организаци æмæ уагъд æрцыдысты комплексон басгæрстытæ Тъбет, Дменис, Сатихъар æмæ Хелцуайы скъолаты æмæ сæ фæстиуджытыл бауынаффæ кодтой скъолаты къухдариуæггæнджытæ æмбырдтæ æмæ педагогон советы рабадтыты. Райстæуыд мадзæлттæ рабæрæггонд хъæндзинæдтæ аиуварс кæныны тыххæй. Ацы бонты та хъусдард здæхтæуы скъолаты сцалцæг кæнынмæ.
Бæрæг куыст бакæнынæй дарддæр нырма скъолаты архайды ис хъæндзинæдтæ æмæ уыдон ног ахуыры азы аиуварс кæныныл хъæудзæн æмбæлон куыст куыд скъолаты разамонджыты, афтæ ахуырады хайады кусджыты дæр. 174 ахуырдзауæй фæндзтыл ахуыр кæнынц æрмæстдæр 5 æмæ цыппæртыл та – 59 ахуырдзауы. Уыдон хорз бæрæггæнæнтæ не сты, уымæн æмæ ахуыргæнинæгты фылдæр хай ахуыр кæнынц æртæтыл. Предметон республикон олимпиадæйы æрмæстдæр Сатихъары скъолайы 11-æм къласы ахуыргæнинаг Кокойты Дзамболат ирон æвзагæй райста дыккаг къæпхæны диплом. Районы ахуырады хайады кусджытæ зонынц, дарддæры куысты сæ разы кæй лæууы дзæвгар скъуыддзаггæнинаг фарстатæ æмæ æппæт дæр бакæндзысты уыдон æвæрццагæй сæххæст кæныныл.
ХУЫБИАТЫ Никъала
