Уæгъдибар хъæбысхæстæй архайæг ирон спортсменкæ Кæсæбиты Алинæ æртыккаг бынат бацахста Будапешты уагъдцæуæг рейтингон турниры. Алинæ хæцыд 62 кг уæзы категорийы.
Банысан кæнын хъæуы уый дæр, æмæ Уæрæсейы минæвæрттæ ерысты кæй архайдтой аббревиатурæ AIN-имæ, ома, куыд индивидуалон нейтралон спортсментæ, афтæ.
«ШЕЛКОВЫЙ ПУТЬ»
Уæрæсейы уагъд æрцыд ралли-рейд «Шелковый путь». Уым уæзласæн машинæты къласы æртыккаг бынат бацахста Къарджиаты Андрейы экипаж, кæцы ис «КАМАЗ-Мастер»-ы машинæйыл. Банысан кæнын хъæуы уый, æмæ æнæнхъæлæджы фыццаг бынат кæй бацахста белорусаг командæ «МАЗ»-ы экипаж. 2012 азæй фæстæмæ-иу ерысты æрвылхатт дæр фыццаг бынат бацахста «КАМАЗ-Мастер». Ныр йæ иннæ экипаж Эдуард Николаевы къухдариуæгадæй та ссис дыккаг.
Ралли-рейд «Шелковый путь» 7-æм июлæй фæстæмæ цыд ахæм маршруттыл, кæцытæ цыдысты Татарстан, Башкортостан, Челябинск, Оренбург, Самара, Саратов, Волгоград, Липецк æмæ Тулайы областтыл. 10 бонмæ экипажтæ рацыдысты 5 мин километрæй фылдæр.
ХУРИТЫ Батрадз
