Æнæхъæн сæрддæргъы Цхинвалы пионерты парчы къуыри дыууæ хатты – дыццæджы æмæ майрæмбоны уагъд цæуынц хиирхæфсæн мадзæлттæ. Концертон программæ райдайы изæры аст сахатыл æмæ дзы хайад райсынц нæ республикæйы культурæйы кусджытæ.
Ардæм æрбамбырд вæййынц, изæры тезгъо кæнынмæ чи рацæуы паркмæ, уыцы æмбæстæгтæ æмæ æхцондзинад райсынц музыкæйы зæлтæй, стæй ма аив кафтæй дæр. Иууыл тынгдæр фæцин кæнынц сывæллæттæ, кæцыты нымæц вæййы бæрæг фылдæр иннæтæй. Уыдонæн иу уысм æрлæуд нæ вæййы, – чи дзы кафгæ фæкæны, чи ралидз-балидз. Ахæм нывтæм кæсгæйæ сæ ныййарджыты цæсгæмттыл дæр вæййы циндзинады æн-къарæнтæ.
Пионерты парчы территори развæлгъау басгарынц милицийы сæрмагонд нысаниуæджы къорды инженерон-техникон хайады кусджытæ. Сапертæ спайда кæнынц специалон службæйон куыйтæй æмæ техникон дзаумæттæй.
Бирæ адæм кæм уа, уæлдайдæр та æрыгон æмбæстæгтæ, уым тæссаг вæййы æхсæнадон фæтк фехалынæй. Уымæ гæсгæ милицийы кусджытæ сæ хъус фæдарынц æхсæнадон æдасдзинадмæ. Парчы территорийы службæ фæхæссынц патрулон-постон службæйы кусджытæ æмæ кæд исчи йæхи æнæгъдау дард фæкæны, уæд йемæ бакæнынц профилактикон куыст. Фыдуаг митæ чи фæкæны æмæ æхсæнадон фæтк чи фехалы, уыдоны та æркæнынц административон бæрндзинадмæ. Фæндагон змæлды æдасдзинады инспектортæ та паркмæ ‘ввахс фæндæгтыл фæлæууынц, цæмæй ав-томашинæты тагъдад контроль кæной æмæ фыдбылызæй бахизой мадзалмæ æрæмбырдуæвджыты.
Ацы культурон программæ бацæттæ кодтой горæты администрацийы культурæйы, фæсивæды æмæ спорты управлени æмæ уагъд цæудзысты суанг сæрды фæудмæ. Банысан кæнын ма хъæуы уый дæр æмæ ахæм мадзæлттæ уагъд кæй цыдысты фарон сæрдыгон мæйты дæр.
ДЖИОТЫ Александр
Comments are closed, but trackbacks and pingbacks are open.