Адæймаджы æнæниздзинад бирæ цæмæйдæртæй кæнгæ у, цы хæры, уымæй. Хæлц та горæты цæрæг æлхæны магазины, базары. Цæмæй, кæй æлхæнæм, уыцы продукттæ хæрзгъæд уой æмæ адæймаджы æнæниздзинадæн ма зиан кæной, уый тыххæй фæлхасгæнæджы бартæ хъахъхъæныны комитеты кусджытæ рæстæгæй-рæстæгмæ ауадзынц рейдтæ, басгарынц хæлцадон магазинтæ æмæ базæртты санитарон уавæр.
Ацы комитеты куыд зæгъынц, афтæмæй æрæджы басгæрстой, Харебаты Исахъы уынджы чысыл базар кæй хонæм, уый. Уым, иумæйагæй сисгæйæ, санитарон нормæтæ хъахъхъæд цæуынц, фæлæ дзы уæддæр рабæрæг къорд цауы, кæцытæ хъуамæ иуварс æрцæуой. Стыр базар кæй хонæм, уый æрмæст кæд улæфты бонты кусы, уæддæр дзы бирæ ис санитарон нормæтæ халыны цаутæ. Фыдызгъæл кæм уæй кæнынц, уым æмбæлон сыгъдæгдзинад нæ вæййы. Дзидзауæйгæнæны къæсæрæй бахизгæйæ, пъолыл фенæн ис брæттæ. Нæ сын фæкусы арæх сæ доны къран æмæ тугæйдзаг мигæнæнтæ æвзæрын кæнынц антисанитари. Дзидзауæйгæнæн магазинтæй дæр бирæтæм бахизгæйæ, цæст йæхимæ аздахы чъизидзинад. Дзидза тагъдсæфæг продукт у æмæ домы уæлдай сыгъдæгдзинад, уæл-дайдæр та – сæрды тæвд бонты æмæ сæ ахæм сыгъдæгдзинад нæ вæййы.
Комитеты ма куыд загътой, афтæмæй санитарон нормæтæ хæлд цæуынц 8-æм июны уынджы кæрон, Мæскуыйаг микрорайонмæ фæзилæны, рахисфарс цы хæлцадон магазин ис, уым дæр. Басгæрсты рæстæджы, ам фыццаг цæст цæуыл схæцыд, уый у, бахизæны цы брæт-ты обау ис, уый. Ам цæттæ æмæ уæй кæнынц алыгъуызон цæттæ хæринæгтæ. Уыдон кæд æмæ сыгъдæг æмбæрзæнæй æмбæрзт хъуамæ уаиккой, цæмæй сыл бындз, рыг ма бада, уæддæр уæйгæнæн тæрхджытыл уыдысты æнæ æмбæрзтæй. Магазины ма уæййаг уыд алыгъуызон кæсæгтæ, кæцыты æнуд тæфтæй фындзы хуынчъытæ æхгæдтой. Комитеты кусджытæ рабæрæг кодтой, ацы магазины уæй кæй цæуы, се ‘мгъуыд кæмæн фæцис, ахæм продукттæ дæр. Ахæм продукттæй дзы разынд æхсыр, сывæллæтты хæринæгтæ, шоколадтæ, конфеттæ. Фæлхасгæнджыты бартæ хъахъхъæныны комитеты кусджытæм ацы магазинæй бацыд хъаст фæлхасгæнджытæй. Хъасты куыд фыстæуыд, афтæмæй ам сельды кæсаджы къопп чи балхæдта, уыдон дзы куы бахордтой, уæд фæхъæстæ сты æмæ бахаудтой рынчындонмæ. Магазины хицауыл ахæм куырдиæттæ арæх æрбацæуы фæлхасгæнджытæй. Фæлхасгæджыты бартæ хъахъхъæныны æмæ адæймаджы фæрныгады къабазы хъусдарды фæдыл комитеты кусджытæ саразынц акттæ, фæивар кæнынц амалиуæггæнæджы.
Комитеты зæгъынц, зæгъгæ, антисанитари æмæ æндæр цухдзинæдтæ кæм ис, ахæм продукттæ уæйгæнæн объекттæ дзæвгар ис нæ горæты. Уыдон кæд ивар æмæ æфхæрд æрцæуынц, уæддæр та сфæлхатт кæнынц сæ рæдыд. Ныртæккæ сæрды иууыл тæвддæр бонтæ сты, тынгдæр тæссаг у фæхъæстæ кæнынæй. Уымæ гæсгæ не ‘нæниздзинадмæ бæрнондæр ахаст дарын хъæуы. Фауддзаг продукттæн бынат ма хъуамæ уа базæртты æмæ магазинты тæрхджытыл.
УАЗÆГТЫ Марфа
Comments are closed, but trackbacks and pingbacks are open.