Ныртæккæ нæ республикæйы ис цалдæр куыстуаты, кæцытæ кæнынц суаруадзæн куыст – «Бæгъиат», «Аландон», «Санай», «Дзимыр», «Едыс». Уыдис ма нæм «Осетинская», кæцыйы уагъта ООО «Владимирский стандарт». Дон уæй цыд куыд бынаты, афтæ Владимиры областы дæр, фæлæ инвесторы хъуыддæгтæ рæстмæ нал цыдысты æмæ куыстуат дæр æрлæууыд.
Ам ныр йæ куыст райтынг кодта «Аландон». Куыстуат ис БАМ-ы районы. Амалиуæггæнæг Босыкты Владимир куыд зæгъы, афтæмæй заводмæ дон ласынц Згъуыбирæй. Бынаты йæм бафтауынц газ æмæ йæ стæй кæнынц 1,5 литруат пластикон мигæнæнты. «Ардæм цы дон ласæм, уый ист цæуы дыууæ ранæй. Йæ хосгæнæн æууæлтæ зындгонд сты канд нæхимæ нæ, фæлæ ма УФ-йы бирæ горæтты дæр.
Пятигорскы курортологийы зонад-иртасæн институты лæмбынæг сахуыр кодтой доны пайдайы æууæлтæ æмæ æрцыдысты ахæм хатдзæгмæ, «Аландон», «Кисловодск» æмæ æндæр æнгæс дæттæй хуыздæр кæй у.
«Ацы дон цæуы Кавказы хохрагъæй Згъуыбирмæ. Никæцы дон æм схæццæ вæййы. Пятигорскы курортологийы зонад-иртасæн институты специалисттæ мын бацамыдтой, ацы дон ахъаз кæй у артроз, диабет æмæ цармы низтæн. Завод æмæ хосгæнæндон саразын дæр уымæн сфæнд кодтон ацы минералон доны бындурыл. Згъуыбиры ма цы иугай ацæргæ цæрджытæ ис, уыдон мын куыд радзырдтой, афтæмæй советон дуджы дæр ардæм хæстæг Гуырдзыстоны къухдариуæгад хъавыд егъау завод саразын, фæлæ, дам, сæ раца-рæзт бакъуылымпы кодта», – зæгъы амалиуæггæнæг. Ныртæккæ завод «Аландон» цы минералон дон уадзы, уый уæй цæуы бынаты. Цы пандеми апарахат, уый аххосæй фæкъуылымпы сты, Уæрæсейы цы цалдæр горæтимæ сарæзтой бадзырдтæ, уыдон, фæлæ куыддæр фæндаг æрбайгом уа, афтæ дон ласдзысты канд Цæгат Ирыстон-Аланимæ нæ, фæлæ ма æндæр рæттæм дæр.
Амалиуæггæнæг ма радзырдта, ивгъуыд аз Згъуыбиры доны бындурыл цы хосгæнæндон сырæзт, уый тыххæй дæр. «Бæстыхай фарон сцæттæ ис. Кæд стыр нæу, уыцы иурæстæг сæ бон у хос кæнынмæ æрбацæуой æрмæст 8 пациенты, уæддæр у алцæмæй дæр æххæст. Кусдзæн сæрдæй-зымæгæй. Пациенттæн ам арæзт æрцыд цыппарстъалыйон уазæгдоны уавæртæ. Интернет тыгъдады нын цы рекламæ æвæрд æрцыд, уый бирæты зæрдæмæ фæцыд. Дзырдтой нæм бирæтæ, ныффыссын кодтой сæхи Донецкы Адæмон Республикæйæ дæр, фæлæ сын COVID-19 аххосæй нал бантыст æрцæуын. Бынæттон адæмæй дæр нæм бирæ баулæфыд. Фæстæмæ-иу райгондæй аздæхтысты. Кæд рагæй хъуыстой Згъуыбиры доны хосгæнæн æууæлтæ, уæддæр сæ ныр тынгдæр бауырныдта, сæхæдæг ам куы баулæфыдысты æмæ ваннæтæ куы райстой, уæд», – зæгъы Босыкты Владимир.
Амалиуæггæнæг ма куыд радзырдта, афтæмæй æнхъæл куыд нæ уыд, афтæ сæм бирæты фæнды баулæфын. Уымæ гæсгæ, дам, фæнд кæнæм улæфджыты хæрзиуæгæн хосгæнæн доны территори фæуæрæхдæр кæнын, тезгъогæнæн бынæттæ дзы фылдæр саразын. Бацархайдзысты зымæджы сезонмæ та бæхтыл экскурситæ саразын Урс Туалгоммæ. Стæй ма цæмæй хосгæнæндонмæ чи цæуа, уыдон сæ сывæллæттимæ дæр æрбацæуой, уый тыххæй та арæзт æрцæудзæн лыжæтæй бырæнтæ Згъуыбиры хъæуы. Фидæн азы та санаторимæ хæстæг арæзт æрцæудзæн къахдзоныгътæй бырæн бынат дæр. Босыкты лæппу куыд зæгъы, афтæмæй улæфджыты хæрзиуæгæн фидæны нывæстмæ хаст æрцыд, ам фермерон хæдзарад æрбакæнын дæр цæмæй санаторийы цы пациенттæ улæфой, уыдон хæрой экологон æгъдауæй сыгъдæг продукттæ.
Хосгæнæндон, амалиуæггæнæджы ныхæстæм гæсгæ, ис денджызы æмвæзадæй 1 551 м бæрзæндæн. Хосгæнæндоны æмæ суаруадзæн заводы проект дæр реализаци æрцыдысты, амалиуæггæнæг йæхи сæрмагонд фæрæзтæй æмæ паддзахадæй хатырон уавæрты цы фæрæзтæ райста, уыдонæй.
УАЗÆГТЫ Марфа
Comments are closed, but trackbacks and pingbacks are open.