Сентябры мæйы йæ куыст сног кодта минералон дон «Аландон»-ы рауагъдады цех. Компани «Алтей» нæ республикæйы байгом аст азы размæ. Компанийы сæргълæууæг у Босыкты Владимир. Дон цыбыр рæстæгмæ ссис нæ адæмæн уарзон продукт, уагъд цыд 1,5 литруат пластикон мигæнæнты. Йæ хосгæнæн миниуджыты тыххæй хъуыстгонд у Уæрæсейы Федерацийы дæр. Дон ист цæуы Згъуыбиры хъæуы суадонæй. Амалиуæггæнæг куыд зæгъы, афтæмæй йын стыр аргъ кæнынц Пятигорскы курортологийы зонад-иртасæн институты специалисттæ. Босыкты Владимир зæгъы, зæгъгæ, компани «Алтей» рацыд стыр фæндаг цæмæй рахызтаид уæрæсейаг базарадмæ. Уый тыххæй «Роспотребнадзор»-æй райста паддзахадон регистраци, уыцы сертификатмæ гæсгæ минералон донæн ныр йæ бон у Таможнæйон цæдисы бæстæты реализаци кæнын йæ продукци. «Аландон»-ы продукци æрвыст цыд Цæгат Ирыстон-Аланимæ, Мæскуы æмæ Санкт-Петербургмæ.
2018 аз уæрæсейаг равдыст «Продэкспострой»-ы «Аландон» нымад æрцыд хуыздæр продуктыл æмæ райста сызгъæрин майдан. Уый фæстæ йæм цымыдис райдыдтой фæсарæйнаг бæстæтæ дæр. Амалиуæггæнæг куыд зæгъы, афтæмæй ивгъуыд аз Колумбиаг амалиуæггæнджытæ дæр цымыдис кодтой «Аландон»-ы продукцимæ.
Фæлæ бæрæг аххосæгтæм гæсгæ, заводы продукцийы рауагъд фæкъуылымпы. Ныр æлхæд æрцыд уæлæмхас ног агрегат æмæ завод скуыста æппæт хъомысадæй. «Цы ног агрегат æлхæд æрцыд, уый фæрцы завод уадзын райдыдта сахаты мидæг 3000 пластикон 1,5 литруат авджы. Тагъд уадзын райдайдзыстæм лимонад дæр дыууæ хуызы – «Аландон-Тархун» æмæ «Аландон-Груша». Уыдон дæр уагъд цæудзысты 1,5 литруат пластикон мигæнæнты. Ног азмæ фæнд кæнæм 0,5 литруат пластикон мигæнæнты дæр рауадзын лимонад. Уæй цæудзæн заводæн йæхи ми-дæг æмæ нын цы магазинтимæ ис бадзырдтæ арæзт, уыдоны дæр.
Бадзырдтæ арæзт нын ис УФ-йы бирæ горæттимæ – Мæскуыйы, Санкт-Петербурджы, Белорус æмæ Сомихстонимæ дæр. Лимонадуадзæн хахх та сахаты мидæг уадздзæн 1500 иуæджы», – загъта нын амалиуæггæнæг.
Уый ма зæгъы, зæгъгæ, лимонад уадзыны хъуыды йæм рагæй кæй уыд, бадзырдтæ дæр сарæзта Сомихстоны амалиуæггæнæгимæ, фæлæ иуæй завод йæ куыст æрурæдта, аннæмæй та коронавирус куы апарахат, уæд дыууæ фарс дæр фæкъуылымпы сты. Уæрæсе æмæ Сомихстонимæ цы бадзырдтæ сарæзтой, уыдон сæ тыхы баззадысты. Куыддæр завод лимонад уадзын райдайа, афтæ продукци экспорт кæнын райдайдзысты. Ныртæккæ завод цы минералон дон уадзы, уый уæй цæуы, нæ горæты БАМ-ы районы раздæры «Суар»-ы бренды бын цы завод куыста, уый бынаты. Ацы заводы æртæ азы дæргъы компани «Алтей» ифтонг кодта суары донæй. Фæлæ дыууæ азы размæ заводы къухдариуæгад æрурæдта йæ куыст æмæ ныр ацы агъуыст лæвæрд æрцыд «Аландон»-æн.
Ныртæккæ, Босыкты Владимиры ныхæстæм гæсгæ, кондады кусы 10 адæймаджы, кæцытæн сæ куыстмызд у 20-25 мин сомы. Лимонад уадзын куы райдайой, уæд кусджыты нымæц баххæст уыдзæн ноджы аст адæймагæй.
Уый ма радзырдта, цалдæр азы размæ цы хосгæнæндон сарæзта, Згъуыбиры доны бындурыл, уый тыххæй дæр. Бæстыхай кæд стыр нæу, уæддæр уыцы-иу рæстæг райсы 9-10 адæймаджы. Сæрды бонты уырдæм улæфынмæ цыдысты бынæттон цæрджытæ. Уыдис сæм уазджытæ Мæскуы, Донецкы Адæмон Республикæ æмæ Беларусæй дæр. Улæфджытæ райгондæй аздæхынц, æрвыл хатт дæр. Зымæгон бонтæм дæр бирæтæ ныффыссын кодтой сæхи. Амалиуæггæнæг фæнд кæны хосгæнæндоны территори фæуæрæхдæр кæнын. Зымæгон ам чи улæфа, уыдонæн къахдзоныгътыл бырæн фæз саразын. Хъавы бæхтæ самал кæнын дæр, цæмæй улæфджытæ Урс Туалгоммæ экскурсийы цæуой. Йæ зæрды ис фермерон хæдзарад бакæнын дæр, цæмæй санаторийы цы пациенттæ улæфой, уыдонæн хæрын кæной бынæттон урсаг æмæ фыдызгъæл. Хос-гæнæндон, амалиуæггæнæджы ныхæстæм гæсгæ, ис денджызы æмвæзадæй 1551 метры бæрзæндæн. Хосгæнæндон æмæ суаруадзæн заводы проект дæр реализаци æрцыдысты амалиуæггæнæгæн йæхи фæрæзтæй æмæ паддзахадæй цы хатырон кредит райста, уыдонæй.
Ацы æрмæг куы цæттæ кодтам, уæд Згъуыбиры хосгæнæндонмæ улæфынмæ фæуазæг сты, æртæ боны æмгъуыдмæ, нæ республикæйы æбæрæгæй сæфт адæймæгты бинонтæ. Ацы экскурси саразынæн сын æхцайы фæрæзтæ рахицæн кодта Сырх Дзуары Дунеон Комитет.
Уазæгты Марфа
Comments are closed, but trackbacks and pingbacks are open.