Ивгъуыд къуырийы кæрон информацион агентад «Спутник»-ы пресс-центры чысыл пресс-конференци радтой республикон соматикон рынчындоны дохтыр-онколог Кулиджанов Григори æмæ нæ республкæйы сывæллæтты хæрзаудæн фонд «Подари крылья»-йы президент Цхуырбаты Татьянæ. Уыдонæн сæ ныхасы сæр уыдис нæ республикæйы дæр онкологийæ рынчынтæ кæй ис æмæ ацы æгъатыр низмæ куыдфæндыйы цæстæй кæй нæ хъæуы кæсын, афтæ ма рæстæгыл кæй фæхъæуы дохтыртæм бацæуын æмæ йын хос кæнын. Уымæн æмæ уый бирæ бинонтæн æрхаста æнамонддзинад. Банысангонд æрцыд, зæгъгæ, онкологион низ катай кæй æвзæрын кæны æхсæнадмæ æмæ кæй у глобалон проблемæ.
Пресс-конференцийы дохтыр-онколог Кулиджанов Григори фыццаджыдæр бузныджы ныхæстæ загъта журналисттæн ацы проблемæмæ хъусдард кæй здахынц æмæ йæ иувæрсты кæй нæ хизынц, уый тыххæй. «Ацы низ æгъатыр у æмæ дзы сывæллæттæ дæр кæй фæрынчын вæййынц, уый тынг уæззау хъуыддаг у. Куыд дунейы æндæр бæстæты, афтæ Хуссар Ирыстоны дæр абон ацы уавæр у катайаг æмæ уæззау», – загъта уый.
Йæ ныхæстæм гæсгæ нæ республикæйы æмбæстæгтæ активонæй нæ рацæуынц диспансеризаци æмæ æрсидт, цæмæй адæм регулярон æгъдауæй – æртæ азы иу хатт рацæуой дохтырты бæстон басгæрст. Уый у æнæмæнг хъуыддаг æмæ дзы хъуамæ хайад исой 18 азæй фæстæмæ. Кулиджанов Григори ма куыд банысан кодта, афтæмæй ракы низæн хоскæнын иууыл эффективондæр вæййы йæ райдиан этапы. Онколог куыд банысан кодта, афтæмæй уый саразæн ис нырыккон диагностикæйы методтæй диспансеризацийы фæлгæтты. «Ацы æгъатыр низы проблемæимæ стохгæнæн ис æрмæстдæр уæд, кæд æмæ нæ адæм æнæмæнг хъуыддагыл нымайой диспансеризаци рац. Махмæ бирæ рынчынтæ фылдæр æрбацæуынц низы фæстаг этапты æмæ уæд та бирæ зындæр вæййы йæ ныхмæ тох кæнын. Уый тыххæй мæнæн кæддæриддæр мæ ныхас у, цæмæй диспансеризаци уа æнæмæнг хъуыддаг, фидар æрцæуа хицауады уынаффæмæ гæсгæ», – банысан кодта онколог.
Кулиджанов Григори ма журналисттæн радзырдта нæ республикæйы онкологийæ рынчынтæн æнæмæнгхъæуæг хостæ лæвæрд кæй цæуынц æнæаргъæй æмæ рæстæгыл, уый. Стæй канд онкологийæ рынчынтæ нæ, фæлæ ма диабетиктæ, психиатрион æмæ рæуджыты низтæй рынчынтæ дæр. «Æз иу æмæ дыууæ хатты нæ фембæлдтæн мæ коллегæтимæ Уæрæсейы Федерацийы æндæр æмæ æндæр регионтæй æмæ уыдон иууылдæр фæдис вæййынц куы фехъусынц, зæгъгæ, махмæ льготæтимæ рынчынтæ æнæаргъæй исынц хостæ», – загъта уый.
Кæронбæттæны ма æрдзырдта онкологийы низтæ абон нырыккон медицинæйы руаджы раздæр азтимæ абаргæйæ хуыздæр хоскæнын кæй райдыдтой æмæ адæммæ æрсидт, цæмæй уарзой сæхи, ма тæрсой басгæрстытæй æмæ афтæмæй лæмбынæг хъусдард здахой се ʻнæниздзинадмæ.
Нæ республикæйы сывæллæтты хæрзаудæн фонд «Подари крылья»-йы президент Цхуырбаты Татьянæ та цыбыртæй радзырдта фонды куысты тыххæй æмæ æрсидт нæ бæстæйы æппæт цæрджытæм дæр, цæмæй рынчын саби Дзæгъиаты Миланæйы тыххæй цы акцитæ ауадзынмæ хъавынц, уыдоны хайад райсой. Дзæгъиаты чызгæн хъæуы тагъдыл саразын æнæмæнгхъæуæг операци Израилы æмæ лæууы тынг зынаргъ. «Æрæджы нæм фондмæ æххуысы тыххæй æрбахатыд Дзæгъиаты Миланæйы ныййарæг мад. Чызгæн ис астæумагъзы рак æмæ йын хъæуы æвæстиатæй Израилы хирургион операци скæнын. Уæрæсейы сын не сразы сты операци скæнын, уымæн æмæ сын ницы ныфс бавæрдтой инвалидæй кæй нæ баззайдзæн, уымæй. Æрмæст операцийæ сæ ркуырдтой æртæ милуан сомы. Кæй зæгъын æй хъæуы, ахæм стыр æхцатæ та бинонтæм нæй. Уымæ гæсгæ мах сфæнд кодтам баххуыс кæнын ацы чызгæн æмæ хъуамæ ауадзæм алыгъуызон акцитæ», – радзырдта Цхуырбаты Татьянæ.
Уый ма куыд радзырдта, афтæмæй хæрзаудæн фонд фыццаг акци аразынвæнд кæны 17 июлы кафе «Винченцо»-йы. Ам акцийы фæлгæтты сывæллæттæн арæзт æрцæудзæнис бæрæгбон, цыран уагъд цæудзысты алыгъуызон мастер-кластæ, флешмоб, аквагрим. Сфæлдыстадон галуаны æххуысæй та сывæллæттæн æвдыст æрцæудзæн куклæты спектакль. Уымæй дарддæр ма фонд нæ республикæйы Фæсивæды хъуыддæгтæ, спорт æмæ туризмы комитеты æххуысæй фæнд кæнынц спорткомплекс «Олимп»-ы 2-æм августы хæрзаудæн акци ауадзын ленк кæнынæй. «Акциты фæлгæтты цы æхцаты фæрæзтæ æрбамбырд уой, уыдон лæвæрд æрцæудзысты Дзæгьиаты Миланæйы мадмæ. Мах социалон хызæгты дæр радтам ацы чызджы тыххæй информаци æмæ уайтагъд бангмæ райдыдтой æрвитын æхцайы фæрæзтæ. Мæн фæнды зæгъын уыдонæн стыр бузныджы ныхæстæ сæ ххуысты тыххæй, сæ зæрдæтæ кæй риссынц не сабийы хъысмæтыл æмæ йын уымæй уæлдай лæггад кæй кæнынц», – загъта фонды президент.
Уый ма йæ ныхасмæ бафтыдта, рынчын сывæллæтты нымæц кæй фылдæр кæны æмæ уыдон кæддæриддæр кæй райсынц æххуыс нæ республикæйы Æнæниздзинад хъахъхъæнын æмæ социалон рæзты министрадæй. Банысан ма кодта, зæгъгæ, нæ республикæйы æмбæстæгтæ æмбаргæдзинад æвдисынц æмæ ацы риссаг фарсты иувæрсты нæ хизынц. Низ у фæзынгæйæ æмæ цы гæнæн ис, уымæй хъæуы рынчын æмæ рынчыны бинонты фарсмæ балæууын, уæлдайдæр та дзырд куы цæуа онкологи кæнæ та æндæр уæззау низтыл. Уый та моралон æгъдауæй стыр æххуыс у рынчынæн æмæ йын царды фæвæййы ныфсдæттæг.
Цхуырбаты Лариса
Comments are closed, but trackbacks and pingbacks are open.