Хъӕууон фӕллойгӕнджыты культурон домӕнтӕ ӕххӕст кӕныныл зӕрдиагӕй кусы Цхинвалы районы администрацийы культурӕйы хайад (йӕ хистӕр Гаглойты Ростислав). Библиотекӕты кусджытӕ архайынц, цӕмӕй сӕм цӕуа фылдӕр чиныгкӕсжытӕ ӕмӕ зонгӕ кӕной ирон, уырыссаг ӕмӕ ӕндӕр адӕмты аивадон литературӕимӕ. Хицӕн ӕмӕ хицӕн хъӕуты та уӕвынад кӕнынц аивадон коллективтӕ, бацӕттӕ кӕнынц концертон программӕтӕ ӕмӕ уый фӕстӕ зӕрдылдарӕн бонтӕ ӕмӕ бӕрӕгбонон мадзӕлтты ралӕууынц адӕмы раз. Уыдоны нымӕцы сты кафты ансамбль «Амонд», адӕмон театр, сывӕллӕтты ансамбль «Малусӕг» ӕмӕ ӕндӕртӕ. Уыдон рӕстӕгӕй рӕстӕгмӕ ацӕуынц куыд районы хъӕутӕм, афтӕ ма республикӕ ӕмӕ уымӕн ӕддтæмæ дӕр ӕмӕ сын сӕ арæхстдзинадимæ базонгæ вæййынц.
Ӕрӕджы та фӕуазӕг сты Къостайыхъӕумӕ фæуазæг сты ӕмӕ бынӕттон цӕрджытӕн равдыстой сӕ аивад вокалон-инструменталон ансамбль «Арвырон» ӕмӕ вокалон къорд «Ирон фӕндыр». Разамынд сын кӕнынц Республикӕ Хуссар Ирыстоны аивӕдты сгуыхт архайджытӕ Ӕлборты Шоренӕ ӕмӕ Пухаты Нодар. Сценӕмӕкӕсджытӕ сыл ӕхсызгонӕй сӕмбӕлдысты, уæлдайдæр та нӕ республикӕйы сгуыхт артист Хуыгаты Дзамболат, Хацырты Земӕ, Гогинова Кристинӕ ӕмӕ Задыты Олесяйыл, фӕндырыл та аив цагъта Ӕлборты Шоренӕ.
Концерты программӕйы уыдысты ирон ӕмӕ уырыссаг зарджытӕ «Чызджытӕ», « Дард дӕ мӕнӕй», «Ӕнӕ дӕу», «Донхӕрис», «Терчы был», «Радио- бейби», «Цард дарддӕр кӕны», «Цин кӕнын» ӕмӕ ӕндӕртӕ. Сценӕмӕкӕсджытӕ сын сæ арæхстдзинадæн дзуапп лæвæрдтой зӕрдиаг къухӕмдзӕгъдæй.
Хуыбиаты Никъала
Comments are closed, but trackbacks and pingbacks are open.