Коронавирусы пандемийы аххосæй фæстæдæр æмгъуыдмæ хаст æрцыдысты 2020 азы Токиойы сæрдыгон Олимпион хъæзтытæ. «Токио-2020»-йы организацион комитеты сæргълæууæг Æсиро Мори ацы бонты фехъусын кодта, зæгъæ, Олимпиадæ уагъд æрцæудзæн 2021 азы 23 июлы – 8 августы. Паралимпийаг хъæзтытæ та райдайдзысты 24 августы æмæ аххæсдзысты 5 сентябры онг. Морийы ныхæстæм гæсгæ, уый тыххæй уынаффæ хаст æрцыд Æхсæнадæмон Олимпион комитеты президент Томас Бахимæ ныхас кæныны фæстæ.
«Олимпиадæйы райдианы бон æвзаргæйæ, хынцыд цыдысты спортсментæн сæхи бацæттæ кæнын, афтæ ма волонтертæн æмæ спортуарзджытæн куыд æнцондæр уыдзæн, уый», – загъта Мори.
«Токио-2020» органзиацион комитеты генералон секретарь Тосиро Муто та фехъусын кодта, зæгъгæ, ма уыдон аскъуыдзаг кодтой Олимпиадæ официалонæй баконд кæд æрцæудзæн, уыцы бон. Сæрмагондæй æвзæрст æрцыд майрæмбон. Организаторты ныхæстæм гæсгæ ацы бон æнцонвадатдæр у.
Æхсæнадæмон Олимпион комитет дæргъвæтин рæстæджы нæ разы кодта Олимпиадæ-2020 иннæ азмæ ахæссыны тыххæй. Уымæн æмæ комитетæн уый æрхæсдзæн стыр финансон зиан. Япон йæ бацæттæ кæныны тыххæй бахардз кодта 12 миллиард доллары. Экспертты хъуыдымæ гæсгæ Олимпиадæ кæй ахастой, уый аххосæй бахъæудзæн ноджы 1 миллиард доллары.
ХУРИТЫ Батрадз
Comments are closed, but trackbacks and pingbacks are open.