Ныхас – ирон æвзаджы рæзты фæдыл

РХИ-йы Хицауады Сæрдар Пухаты Эрикы сæрдариуæгадæй ауагъдæуыд республикæйы Хицауады цур ногæй сырæзгæ Терминологион къамисы  æмбырд. Къамисы скондмæ бацыдысты Хуссар Ирыстоны зонадон-педагогон интеллигенцийы минæвæрттæ, афтæ ма æххæстгæнæг хицауиуæгады органты минæвæрттæ дæр.

Хицауады сæргълæууæг куыд банысан кодта, афтæмæй бындур æвæрд æрцыд ирон æвзаджы бахъахъхъæнын æмæ йæ райрæзын кæныны фарстыл кусыны ноджы иу здæхтæн, кæцы иумиагадæмон боны фæткы ис фыццаг бынаты.

«Æвзаджы рæзты фадыджы сæвзæрд проблемæтæ, кæцыты аскъуыддзаг кæнынмæ ирон адæм хъуамæ аздахой се ‘ппæт тыхтæ. Цæгат æмæ Хуссары Терминологион къамистæ кусдзысты æвзагон нормæтæ фæхуыздæр кæныныл, æппæт иронæвзагон тыгъдады сæ унификацийыл», – загъта Пухаты Эрик.

Уый æмбырды хайадисджытæн бахæс кодта, цæмæй къуырийы æмгъуыдмæ бацæттæ кæной фæндæттæ Къамисы фæдыл уагæвæрд саразыны тыххæй, цыран æвдыст хъуамæ æрцæуой сæ куысты нысæнттæ, хæслæвæрдтæ æмæ формæтæ.

Æмбырды рæстæджы дзырд цыд Ирон æвзаг бахъахъхъæнын æмæ йæ райрæзын кæныны паддзахадон программæтæ сног кæныны æнæмæнгхъæуындзинадыл, афтæ ма Къамисы сконды корректировкæйыл.

Зæрдыл æрлæууын кæнынæн банысан хъæуы уый дæр, æмæ Терминологион къамисæй дарддæр Хицауады цур арæзт кæй æрцыд ноджы иу координацион-уынаффæгæнæн орган – Республикæ Хуссар Ирыстоны Экспертон къамис Республикæ Цæгат Ирыстон – Аланиимæ æмгуыстады фарстаты фæдыл.

Æнгæс структурæтæ æмбæлон уынаффæимæ фидар æрцыдысты Цæгат Ирыстоны дæр, сæ сæргъ лæууы Республикæ Цæгат Ирыстон – Аланийы Хицауады Сæрдар Тускъаты Таймураз.

Республикæты ‘хсæн æмархайд æххæст цæуы 2018-2020 азтæн «Ирон адæмы националон-культурон рæзты» программæйы фæлгæтты.

Республикæ Хуссар

Ирыстоны Хицауады

пресс-службæ