РХИ-йы Хицауады Сæрдар Пухаты Эрикы къухдариуæгадæй ауагъд æрцыд Хицауады радон рабадт. Æмбырды æркастæуыд национ æвзаджы райрæзты, Мидхъуыддæгты министрады кусджытæн уæлæмхас бафыстытæ фæфылдæр кæныны, таможнæйон бафыстытæ фæивын æмæ æндæр фарстытæм дæр.
Фæлæ уал райдианы Хицауады Сæрдар раарфæ кодта рабадты хайадисджытæн, Уæрæсейы Федерацийы президентон æвзæрстытæ Владимир Путины уæлахизæй кæй фесты, уый тыххæй.
«Владимир Владимиры фырт Путины уæлахиз ноджыдæр фенын кодта уæрæсейаг адæмы æууæнк сæ лидермæ. Нæ республикæйæн уый у, стыр нысаниуæг кæмæн ис, ахæм цау. Йæ равзæрст нæ адæмæн нысан кæны сæ фидæныл æууæндын, ноджыдæр алыварсонæй нæ ахастытæ сфидар кæнын Стыр Уæрæсеимæ», – банысан кодта Пухаты Эрик.
Дарддæр рабадты хайадисджытæ байхъуыстой, Паддзахадон таможнæйон комитеты сæрдар Цхуырбаты Мурат таможнæйон бафыстытæ сисыны тыххæй цы фарст æрæвæрдта, уымæ.
«Таможнæйон фиддонтæ, ставкæтæ сфидар кæныны тыххæй РХИ-йы Хицауады 2001 азы 13 октябры №211 уынаффæмæ гæсгæ товартæ æддæмæ ласыны тыххæй фиддон у товарты таможнæйон аргъæн йæ 2 проценты æмæ уый та мæгуырауæрдæм æндавы нæ куыстуæттыл, уæлæмхас ныхдуртæ аразы республикæйæн æддейæ фыдыбæстæйон продукци реализаци кæнынæн», – загъта Цхуырбаты Мурат. – Уынаффæйы проектмæ барасткæнинæгтæ, сæрмагондæй, та йæм товартæ сæ аласыны тыххæй фиддонтæ сисыны фæдыл æм 2-аг пункт бахæссын, зынгæ фæахъаз уыдзæн, дунеон базары фыдыбæстæйон товаруадзджытæн баххуыс кæнынæн. Афтæ ма фæахъаз уыдзæн экспорты рæзт разæнгард кæнынæн.
Рабадты ма уынаффæ цыдис ирон æвзаг æмæ культурæ бахъахъхъæнын æмæ рæзын кæныны фæдыл. Арæзт æмæ фидар æрцыдысты республикæйы Хицауады цур ирон æвзаджы фæдыл терминологион къамисы æмæ ирон æвзаджы национ культурон рæзты къабазы Цæгат Ирыстонимæ æмгуыстад кæныны фарстыты фæдыл Хуссар Ирыстоны экспертон къамисы скондтæ саразын.
«Национ æвзаг рæзын кæныныл аудын, национ æнгæсдзинад бахъахъхъæнын у паддзахадон политикæйы приоритет. Æвзаг нæй, уæд нæй этнос дæр. Æмæ æрмæстдæр нæ цæгаттаг æфсымæртимæ иумиаг тыхтæй махæн нæ бон суыдзæн ацы къабазы исты саразын. Скъуыддзаг кæнын та хъæуы бирæ фарстытæ», – банысан кодта Пухаты Эрик.
Хицауады Аппараты къухдариуæггæнæг Гаглойты Олег куыд загъта, афтæмæй къамистæ хъуамæ бакусой æмæ Хицауадмæ сфидар кæнынмæ 2 апрелмæ бавдисой сырæзгæ къамисты тыххæй уагæвæрдтæ.
«РХИ-йы Мидхъуыддæгты министрады кусджытæн æхцайы уæлæмхас бафыстыты тыххæй» Хицауады 2008 азы 27 марты №97 уынаффæмæ ивындзинæдтæ бахæссыны тыххæй, кæцытæ ведомствойæн бар дæттынц бюджетон ассигнацийы фæлгæтты æрвылмæйон æхцайы бафыстыты бæрц мидхъуыддæгты кусджытæн фæфылдæр кæнын», – радзырдта ведомствойы сæргълæууæг Наниты Игорь.
Уый куыд загъта, афтæмæй ивындзинæдтæ фадат ратдзысты мидхъуыддæгты кусджытæн 50 процентæй 145 процентмæ уæлæмхас бафыстытæ фæфылдæр кæнынæн.
Афтæ ма рабадты дзырд цыдис нæ бæстæйы Парламентмæ Президентæн цы æрвылазон ныстуан уыдзæнис, уый фæдыл дæр.
Comments are closed, but trackbacks and pingbacks are open.