Ныгуылæн бафæллад Украинæйæ

Аххосджын та чи у? … Путин!

Тохы быдыры Уæрæсейæн ис зынгæ æнтыстытæ, Байдены администрацийы æмæ ныгуылæны иннæ бæстæты æрдыгæй Украинæйæн æххуыс та зынгæ æрлæмæгъ ис — æрхæндæг æмæ тыхстæй фыссы коллективон Ныгуылæны прессæ. Сæ газеткæсджытæ комментариты фыссынц, зæгъгæ, ахæм ахасты уадиссагæй ницы ис, уымæн æмæ, дам, америкæгтæ æмæ европæйæгты æхсæн украинаг прокси-конфликт популярон нал у.

Цымыдисаг у æмткæй сæ медиа-ресурсты æрмæджыты мидис — фæстаг æртæ къуырийы, дам, Уæрæсейы президент Владимир Путин æвдисы фидар ныфс æмæ æнцойдзинад. Зыны йыл, Украинæйы операци куыд цæуы, уый йæ тынг нæ тыхсын кæны, уæдæ Ныгуылæн бæстæты ахаст дæр æй рагæй нал æфтауы дисы. Фыссынц ма ноджыдæр, зæгъгæ, нæ прессæйы иу иннæйы фæдыл уацтæ мыхуыр кæнæм, хъæр кæнæм, Путин уæззау мæлæтдзаг рынчын у, бирæ йын нал баззад! Путин та камерæтæм йæ мидбылты худы, хъазæн ныхæстæ кæны. Фæнда нæ фæнда, уæддæр сæ аналитиктæ сæттынц, кæй ис æртæ сæйраг факторы: политикон, экономикон æмæ хæстон — уыдоны фадат фидар кæны Путины командæйы моралон тыхтæ. Равзарæм уæдæ, цавæр факторты кой кæнынц æмæ сын сæ куыдæй уынынц не ‘нусон «æлгъыст æрдхæрдтæ»

Политикон фактор

Стырбританы аналитикты хъуыдымæ гæсгæ Путины æнцойдзинад æппынфæстаг йæ оппонентты куыд ныфæллайын кæны, æндæр ахæм виртуоз дунеон политикон Олимпы ссарæн нæй. Ныртæккæ дæр та равдыста йæ дæсныйад, уымæн æмæ АИШ-ы конгресс æмæ сенатмæ æвзæрстытæ куыд хæстæг кодтой, афтæ Байдены администрацийы ‘рдыгæй Украинæйы æгæрон æгъдауæй фарсхæцынад дæр ныдздзедзырой кодта. 24 октябры 30 конгрессмен-демократы Байденмæ барвыстой официалон фыстæг æмæ йæм æрсидтысты, зæгъгæ, æвæстиатæй хъæуы дипломатон æгъдауæй Кремлимæ райдайын диалог, цæмæй Украинæйы хæстæн кæронгонд æрцæуа. Уыцы баздæхты ма уыдис ахæм хъуыды, ома, цæмæй Кремлимæ æнцондæр дзурæн уа, уый тыххæй хъуамæ уа стимул — санкциты уæз фæкъаддæр кæныны хуызы.

Уыцы фыстæджы ныхмæ Ныгуылæны райдыдта информацион цунами. Æмæ уæд конгрессментæ сæ фыстæг фæстæмæ æрдомдтой — ома, фæрæдыдыстæм, бахатыр кæнут, уый хъуамæ мыхуыргонд ма ‘рцыдаид… Цæй æлгъаг стут, уæддæр, ныгуылæйнаг политиктæ, цæй æлгъаг! Фæлæ ам фыстæгæн йæ фæзынд у сæйрагдæр: æппæт Ныгуылæны бæстæты æмæ Вашингтонæн йæхи мидæг дæр, æвæццæгæн, сæ позици ивын райдыдтой.

Æркæсæм уæдæ Америкаг стырдæр æмæ рагондæр информацион фæрæзтæм, куыд мæнæ The New York Times, The Washington Post æмæ Newsweek. Æрæджы дзы фæзындысты политикон æгъдауæй конфликт æрсабыр кæнынмæ сидæг уацтæ. Уыцы æрмæджыты автортæй бирæты фæнды, цæмæй АИШ Украинæйы хицауады хуыздæр контроль кæна финансон æмæ хæстон æххуысы фæрæзтæй куыд пайда кæнынц, уыцы хъуыддаджы. Газеткæсджытæн та сæ зæрдыл æрлæууын кодтой, Украинæйы коррупцион уавæр æмæ сæ хицауады дызæрдыггаг, хатгай фидиссаг, хъуыддæгты статистикæ. Уыимæ иумæ Германи æмæ Италийы бæрнон чиновниктæ фехъусын кодтой, зæгъгæ, фæнды нæ Мæскуыимæ диалог райдайын æмæ хæстæн кæрон скæнын. Афтæмæй та раздæрау коммуналон æмæ хæлцадон æргътæ Европæйы рæзынц — уыцы рæзты ныхмæ демонстрациты нымæц фылдæрæй-фылдæр кæны…

Экономикон фактор

Амæй-ай фыддæр æмæ тæссагдæр сценаритæ фыстой ныгуылæйнаг аналитиктæ-политиктæ-эксперттæ, зæгъгæ, мах Уæрæсейы цыбыр рæстæгмæ санкцитæй ныххурх кæндзыстæм… Мæгуыр, дам, йæ фынтæй хъал. Уымæй сын ницы рауадис æмæ хъыгзæрдæйæ ныр сæтты сæ прессæ — фæрæдыдыстæм, хатыр.

30 октябры газет The New York Times ныммыхуыр кодта уац «Цы фиды конфликтыл Уæрæсе». Ацы уацы анализ кæны Уæрæсе æмæ Европæйы, Азийы, Америкæйы стырдæр экономикæты æхсæн базарады уавæр. Уыцы автор фыссы, зæгъгæ, æцæгдæр АИШ æмæ Стырбританийы Уæрæсеимæ æмбазарадон ахастытæ дзæвгар фæкъаддæр сты, фæлæ иннæ паддзахæдтæ кæд санкцитимæ сразы сты, уæддæр сæ нæ фæнды Уæрæсеимæ экономикон тох адард кæнын. Цыбыр ныхасæй, АИШ-ы партнертæн сæ фылдæры нæ фæнды Уæрæсеимæ бастдзинæдтæ халын. Фыссынц ма ноджы, Китай, Бразили, Турк, Инди æмæ Уæрæсейы æмбазарад та рекордон æгъдауæй кæй сырæзт, уый дæр.

Æфсæддон фактор… æмæ сырх кънопкæ

Иу мæйæ фылдæр рацыд, Харьковы облæсты Уæрæсе цы горæттæ æмæ хъæутæ бацахста, уыдоны ныууа-дзын æй куы бахъуыд, уæдæй нырмæ. Ныгуылæйнаг прессæ гъеуæд эйфорийы бахаудта, цин кодта Уæрæсейы «фæхæрдыл», уымæй фылдæр та Украинæйы «стыр уæлахизтыл»… Абон та æнкъардæй сæттынц, зæгъгæ, Уæрæсе стратегион уæлдæфон æмæ ракетон атакæйы хурх кæны Киев. Æртæ къуырийæ фылдæр алы бон дæр украинаг горæттæ æмæ вазыгджын инфраструктурон объекттæ системон æгъ-дауæй пырх кæны Уæрæсе.

Ныридæгæн уал Украинæйы энергогенерацион объекттæй 45% нал бæззынц æмæ 60% рæхджы уыцы нымæц куы схиза, уæд национ масштабон коллапс ралæудзæн. «Хорз хабар нæ уыдзæн уый Зеленскийæн, уæлдайдæр та зымæгон уазæлтты», — фыссы ныгуылæйнаг прессæ. Æмæ газеткæсджыты зæрдæйыл лæууын кæнынц, зæгъгæ, рох уæ ма уæд, украинаг контрбырст кæй æрнымæг ис. Уый та, дам, æвдисæн у, бирæ æфсæддонтæ сæ кæй ныццагъд сты, резервтæй спайда кæнын та, æвæццæгæн, сæ бон нæу.

Уæрæсейаг æфсæддон командæгæнджытæн та бантыстис фронты хахх бараст кæнын æмæ афтæмæй фронты уавæр стабилондæр скæнын. Фыссынц ноджыдæр, Донецкы фронты ‘рдыгæй хайы уырыссæгтæ размæ цæуынц, уымæн æмæ сæ къухы бафтыдис украинæйы æфсады æмæ оперативон пълæнтты сусæгдзинæдтæм баххæссын æмæ суанг се знаджы æфсæддон операциты кодтæ æмæ алгоритмтæ базонын. Ныртæккæ зæгъынц уырыссаг æфсæддонтыл бафтыдис резервистты радон тыхтæ, декабры та æрхæццæ уыдзысты мобилизацигондтæ иууылдæр.

Тынг тыхсынц Белорусы ‘рдыгæй дыккаг фронт куы байгом уа, уæд тохы быдыры уавæр Уæрæсейы зынгæ кæй фæтыхджындæр кæндзæнис, ууыл дæр.

Æппынфæстаг, æрæджы цы уæрæсейаг стратегион ядерон ахуыртæ уыдис «ГРОМ-2022», уыдон сын сæ туг бынтон ныууазал кодтой — фыццаг хатт, зæгъынц, Путин æргомæй хъуыды кæны АИШ æмæ НАТО-йы ныхмæ стырмасштабон «ядерон дзуаппыл» æмæ æмбарын кæны йе знæгтæн — куы бахъæуа, уæд Мæскуы нылхъивдзæн «сырх кънопкæ». Уыимæ Путин раздæрау у ныфс-джын æмæ æппæтæй дæр æвдисы стыр оптимизм.

 

Р. S. Ныгуылæйнаг газеткæсджыты комментаритæ.

Тынг цымыдисаг сты уыдон дæр. Мæнæ сæ иу PaulA фыссы: «Алы конфликты дæр сабырдзинад бадзырдты æххуысæй агурын хъæуы. Цас фылдæр уа ацы уавæр, уыйбæрц фылдæр украинаг горæттæ ныппырх уыдзысты. Уыйбæрц фылдæр адæм фæмард уыдзæн. Цæстмæхъус европæйаг паддзахæдтæ та дарддæр цыдæр бæрзонд моралон хæзнаты кой кæндзысты. Абон ма уæ исчи хъуыды кæны, ИНО-йы программæ «Хæлцад нефтыл баивын»-ы рæстæджы французаг зенитон-ракетон комплекстæ Иракмæ куыд ныххæццæ сты æмæ сæ уайтагъд АИШ-ы æмæ Стырбританы хæдтæ-хæгтæ куыд фехстой, ома, мæнæ курдты сæрыл хæцæм, зæгъгæ, уыцы æфсонæй?

The Wooza — Раздæр нын нæ сæрты уагътат, Путин тагъд йæ уæрджытыл æрхаудзæн, Путин тагъд уæззау низæй æрбамæлдзæн, йе ‘фсæдтæ та фæхæрд уыдзысты. Гъей, журналисттæ, кæцы хабæрттыл æууæндæм уæддæр?

Paul: Советон дуджы хъомылгонд демократтæй ма чи баззадис, уыдон раджы бамбæрстой, америкæгты æхсæн тиран Байдены прокси-конфликт популярон кæй нæу. Адæмы нæ фæнды Украинæйы тыххæй ядерон цæхæры басудзын. Германы адæмы дæр нæ фæнды уый, æмæ уымæн бамбарын кодтой, Путинæй газ дарддæр кæй æлхæндзысты. Джо Байден æмæ НАТО-йы аххосæй Зеленский нæ разы кæны Путинимæ бадзырдтыл. Ныртæккæ та нæ советон демократты бафæндыд Байдены Путинимæ бадзурынмæ арвитын. Цыдæр рагæй нал фæхæрд стæм хæсты быдыры…

ДАМБЕГТИ Иринæ